ពលករនៅថៃសន្សំថវិកា​បាន​ដើមទុន បង្កើតមុខរបរនៅស្រុកកំណើត រកចំណូលផ្គត់ផ្គង់គ្រួសារ

អតីត​ពលករនៅប្រទេសថៃ អ្នកស្រី ផល្លី រស់នៅក្នុងឃុំភ្នំសំពៅ ស្រុកបាណន់ ខេត្តបាត់ដំបងបានសម្រេចចាប់ផ្តើមបើកមុខរបរលក់ដូរនៅក្នុងស្រុក​កំណើត​វិញ ស្របពេលទីតាំងលក់ដូរ​អាចរកចំណូលបាន ក្រោយពីទីតាំងល្អាងប្រចៀវភ្នំសំពៅបានក្លាយជារមនីយដ្ឋានដ៏មានសក្តានុពលទាក់ទាញអ្នកទេសចរមកកម្សាន្ត។

អ្នកស្រី ផល្លី បាន​ឲ្យ​ដឹង​ថា ក្រោយពីអ្នកស្រី​និងស្វាមីមកពីស្រុកថៃ ដើម្បីចូលរួមក្នុងពិធីបុណ្យចូលឆ្នាំ បាន​សង្កេតឃើញតំបន់ទេសចរណ៍​ភ្នំសំពៅមានសេដ្ឋកិច្ច​អាច​រកចំណូល អ្នកស្រីក៏​​សម្រេចចិត្ត​បើក​មុខរបរ​លក់ដូរ​ក្នុង​ស្រុក​កំណើត​វិញ ខណៈ​ប្តីអ្នកស្រីនៅបន្ត​ធ្វើការ​នៅ​ប្រទេស​ថៃ​មួយ​រយៈសិន ដើម្បី​សន្សំលុយក្រែងបានដើមទុនបន្ថែមទៀត។

ស្រ្តី​រូបនេះបាន​អះអាង​ថា មួយ​រយៈ​ក្រោយ​​បើក​មុខ​របរលក់ដូរ​ឃើញ​ថា​លក់ដាច់គ្រាន់បើ ខណៈ​រាល់ល្ងាច​អ្នកស្រី​ចាប់ផ្តើមរៀបចំលក់​ដូរ ហើយភ្ញៀវក្នុងស្រុកមកលេងច្រើន​រួមទាំង​បរទេស​មួយ​ចំនួន​ផ​ង​ដែរ។

ស្រ្តីអតីតពលរដ្ឋ​នៅ​ប្រទេស​ថៃ​បាន​រៀបរាប់​បទពិសោធន៍ ក្នុងរយះពេលជាង ២ ឆ្នាំក្នុងការធ្វើជាពលករនៅក្នុងប្រទេសថៃជាមួយស្វាមីគឺ​មានភាពហត់នឿយ ប៉ុន្តែក៏​បាន​សន្សំប្រាក់​បានមួយ​ចំនួន​ជាដើមទុនមករកមុខរបរក្នុងស្រុកវិញមិនពិបាកពឹងផ្អែកលើ​ការ​ខ្ចី​បុល​ធនាគារ។

បើតាម​អ្នកស្រី ផល្លី ការងារនៅស្រុកថៃ អ្នកស្រីនិងស្វាមីដែល​ធ្វើជាកម្មករសំណង់អាច​រក​កម្រៃបាន​ចន្លោះពី ១២០ ទៅ ១៥០ បាតប្រាក់ថៃក្នុងមួយថ្ងៃ តែប្តីអ្នកស្រីទទួលបានចន្លោះពី ៤០០ ដល់ ៤៥០ បាតក្នុងមួយថ្ងៃ។

លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង​បាន​ឲ្យ​ដឹង​ថា នៅតំបន់រមនីយដ្ឋានភ្នំសំពៅ នៅរយះពេលចុងក្រោយនេះ មានប្រជាពលរដ្ឋក្នុងមូលដ្ឋានលក់ដូរច្រើនទាំងនៅក្នុងផ្សាររាត្រី ទាំងនៅតាមបរិវេណរមនីយដ្ឋាន។

អ្វីដែលលោកត្រូវសំណូមពរដល់អាជីករទាំងនោះ គឺត្រូវចេះរាក់ទាក់ភ្ញៀវ ជាពិសេសជនបរទេសហើយរាល់ទំនិញឬផលិតផលត្រូវលក់ក្នុងតម្លៃមួយសមរម្យដែលអ្នកមកកម្សាន្តអាចទទួលយកបាន ជៀសវាងភ្ញៀវទិញម្តងឈប់ទិញរហូត គឺវាបាត់បង់ទាំងចំនួនអ្នកមកកម្សាន្ត និង​បាត់បង់ទាំងផលប្រយោជន៍អ្នកលក់៕

អត្ថបទ÷សៅ សារិទ្ធ