ព័ត៌មានជាតិ

ផ្លូវកៅស៊ូ ២ ជាន់ ជាង ៩ គីឡូម៉ែត្រ កំពុងដំណើរការសាងសង់ជូនពលរដ្ឋ នៅស្រុកកំពង់ស្វាយ

បានផុស

១២ ខែ មុន

នៅ

ថ្ងៃព្រហស្បតិ៍ ៨ ឧសភា ២០២៥

ដោយ

ផ្លូវកៅស៊ូ ២ ជាន់ ដែលមានប្រវែង ៩,៥០ គីឡូម៉ែត្រ កំពុងដំណើរការសាងសង់ជូនប្រជាពលរដ្ឋ តភ្ជាប់ពីភូមិឥន្ទកុមារ រហូតដល់ភូមិតាប៉ោង ឃុំកំពង់ស្វាយ ស្រុកកំពង់ស្វាយ។

កាលពីថ្ងៃទី ៧ ខែឧសភា ឆ្នាំ ២០២៥ ម្សិលមិញ លោក នួន ផារ័ត្ន អភិបាលខេត្តកំពង់ធំ បានអញ្ជើញជួបសំណេះសំណាលជាមួយប្រជាពលរដ្ឋ និងចុះត្រួតពិនិត្យការដ្ឋានសាងសង់ផ្លូវកៅស៊ូ ២ ជាន់ ប្រវែង ៩,៥០ គីឡូម៉ែត្រ ស្ថិតនៅឃុំកំពង់ស្វាយ ស្រុកកំពង់ស្វាយ ខេត្តកំពង់ធំ។

នាឱកាសនោះដែរ លោក នួន ផារ័ត្ន បានមានប្រសាសន៍ថា ដើម្បីជំរុញឲ្យខេត្តកំពង់ធំកាន់តែរីកចម្រើនថែមទៀត រាជរដ្ឋាភិបាលដែលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណដំណាក់កាលទី ១ ដោយក្នុងនោះ ផ្លូវ នៅតែជាគន្លឹះអាទិភាពជួយឲ្យកម្ពុជាសម្រេចបានចក្ខុវិស័យឆ្នាំ ២០៥០ ក្លាយជាប្រទេសមានចំណូលខ្ពស់។

លោកបានបន្តថា ផ្លូវមួយខ្សែខាងលើនេះ ជាផ្លូវសេដ្ឋកិច្ចមួយសម្រាប់ប្រជាពលរដ្ឋក្នុងការធ្វើដំណើរ តភ្ជាប់ពីភូមិឥន្ទកុមារ រហូតដល់ភូមិតាប៉ោង ឃុំកំពង់ស្វាយ ហើយក៏ជាផ្លូវសម្រាប់ភ្ញៀវទេសចរជាតិ- អន្តរជាតិ ធ្វើដំណើរទៅលេងកម្សាន្តនៅរមណីយដ្ឋានប្រវត្តិសាស្ត្រប្រាសាទសំបូរព្រៃគុកផងដែរ។

ជាមួយនេះ លោក នួន ផារ័ត្ន បានសំណូមពរដល់អ្នកប្រើប្រាស់ផ្លូវទាំងអស់ សូមចូលរួមថែរក្សាផ្លូវថ្នល់ខាងលើនេះឲ្យបានគង់វង្ស យូរអង្វែង ដោយមិនត្រូវដឹកជញ្ជូនទំនិញលើផ្លូវថ្នល់ដែលផ្ទុកលើសទម្ងន់ ធ្វើឲ្យស្រុតផ្លូវថ្នល់ បែកលូកាត់ទទឹងផ្លូវ ឬ បាក់ស្ពាន នោះទេ។

លោកក៏បានបន្ថែមថា ការចូលរួមគោរពច្បាប់ ដោយផ្ទុកទម្ងន់ត្រឹមត្រូវតាមច្បាប់កំណត់របស់ប្រជាពលរដ្ឋ គឺជាការចូលរួមចំណែកមួយយ៉ាងសំខាន់ ដើម្បីការពារផ្លូវថ្នល់កុំឲ្យខូចខាតមុនអាយុកាលកំណត់ និងកាត់បន្ថយគ្រោះថ្នាក់ចរាចរណ៍ដែលនាំឲ្យខូចខាតដល់ទ្រព្យសម្បត្តិ និងអាយុជីវិតអ្នកធ្វើដំណើរតាមដងផ្លូវជាមួយគ្នាផងដែរ៕

អត្ថបទ ៖ ឈាង មករា