រដ្ឋាភិបាល សិក្សា​​បូមស្តារ​ផ្លូវទឹកពីភ្នំពេញដល់ខេត្ត​​កំពង់ចាម សម្រួល​នាវាចំណុះ ៣ ០០០ DWT ធ្វើនាវាចរណ៍បានពេញមួយឆ្នាំ

មន្រ្តីក្រសួងសាធារណការនិងដឹកជញ្ជូន កាលពី​​រសៀលម្សិលមិញនេះបាន​បើកកិច្ចប្រជុំ​មួយ​ជាមួយ​តំណាង​ក្រុមហ៊ុន CRBC ដើម្បី​ពិនិត្យសិក្សាសមិទ្ធិលទ្ធភាពគម្រោងបូមស្តារ​ផ្លូវទឹកទន្លេមេគង្គ ចាប់ពីរាជធានីភ្នំពេញដល់ខេត្តកំពង់ចាម ដើម្បី​អាច​ឲ្យ​នាវាចំណុះ ៣ ០០០ DWT អាចធ្វើនាវាចរណ៍បានពេញមួយឆ្នាំ។

​កិច្ចប្រជុំ​នេះ មានការ​ចូលរួមពីរដ្ឋ​មន្រ្តីក្រសួងសាធារណការនិងដឹកជញ្ជូនដឹកនាំ​ដោយ​លោក ប៉េង ពោធិ៍នា ​តំណាង​ក្រុមហ៊ុន CRBC និង​មន្រ្តីពាក់ព័ន្ធផ្សេង​ទៀត។

បើតាមប្រភពពី​មន្រ្តីក្រសួង​សាធារណការ​និងដឹកជញ្ជូនបាន​គូស​បញ្ជាក់ថា កិច្ចប្រជុំនេះ​ធ្វើ​ឡើង​មានគោលបំណងដើម្បីពិនិត្យលទ្ធផលនៃការសិក្សាសមិទ្ធិលទ្ធភាពគម្រោងធ្វើឱ្យប្រសើរឡើងវិញផ្លូវទឹកទន្លេមេគង្គដែលមានប្រវែង ១០៦ គីឡូម៉ែត្រ ចាប់ពីរាជធានីភ្នំពេញ ដល់​​​ខេត្តកំពង់ចាម។

គម្រោងធ្វើឱ្យប្រសើរឡើងវិញផ្លូវទឹកទន្លេមេគង្គនៅ​ផ្នែក​ខាងលើ នឹង​អាច​​ឲ្យ​នាវាដែលមាន​ចំណុះ ៣ ០០០ DWT អាចធ្វើនាវាចរណ៍បានពេញមួយឆ្នាំ។

ប្រភព​បន្ត​ថា តាមរយៈ​គម្រោង​​សិក្សា​នេះ នឹង​មាន​ការ​បូមស្តារកំណាត់ផ្លូវទឹកដែលរាក់ ការរៀបចំទីតាំងចាក់អាចម៍ដី និងការបំពាក់និង​ដំឡើងសញ្ញាជំនួយនាវាចរណ៍​​។

កន្លងទៅនេះ សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា​​ ក៏​បានប្រកាស​ពី​ផែនការ​ក្នុងការ​ស្ដារទន្លេនៅ​ផ្នែក​​ខាងលើ ដែលភាគច្រើនគោករាក់ដោយសារដីល្បាប់ ដែលបង្កឱ្យរាំងស្ទះដល់ផ្លូវនាវាចរណ៍។

នៅក្នុងពិធីអបអរសាទរខួប ២០ ឆ្នាំដែល​កម្ពុជាចូលសមាជិកអង្គការពាណិជ្ជកម្មពិភពលោក​ សម្ដេចធិបតីនាយករដ្ឋមន្រ្តី​បាន​គូស​បញ្ជាក់ថា ការ​ស្ដារល្បាប់នៅបាតទន្លេ ដើម្បីពង្រឹងប្រព័ន្ធនាវាចរណ៍ឱ្យតភ្ជាប់ប្រទាក់ក្រឡាជាមួយប្រព័ន្ធដឹកជញ្ជូននៅទូទាំងប្រទេស។

ខណៈ​គម្រោងបូមស្តារ​ផ្លូវទឹកទន្លេមេគង្គដែលគោករាក់កំពុង​ស្ថិតនៅក្នុងដំណាក់កាល​សិក្សា​​ ក៏ស្របពេលដែលរាជរដ្ឋាភិបាល​​​កម្ពុជា​កំពុងសាងសង់ព្រែកជីកហ្វូណនតេជោ ដែលនឹង​ទាញ​ភ្ជាប់ការដឹកជញ្ជូនផ្លូវទឹកពីទន្លេមេគង្គទៅកាន់ខេត្តមាត់សមុទ្រប្រទេស​កម្ពុជា៕