ព័ត៌មានជាតិ

លោក ស៊ុន ចាន់ថុល មានក្ដីសង្ឃឹមខ្ពស់ក្នុងការចរចារឿងពន្ធគយជាមួយអាមេរិក

បានផុស

២ នាទីutes មុន

នៅ

ថ្ងៃសៅរ៍ ១០ ឧសភា ២០២៥

ដោយ

អនុប្រធានទី១ក្រុមប្រឹក្សាអភិវឌ្ឍន៍កម្ពុជា លោកឧបនាយករដ្ឋមន្ត្រី ស៊ុន ចាន់ថុល បានបង្ហាញពីក្ដីសង្ឃឹមខ្ពស់ក្នុងការចរចាជាមួយអាមេរិកពាក់ព័ន្ធនឹងបញ្ហាពន្ធគយបដិការរវាងអាមេរិក និងកម្ពុជា។ ការបញ្ជាក់ធ្វើឡើងក្នុងពេលដែលលោកអញ្ជើញដឹកនាំប្រតិភូកម្ពុជាចេញដំណើរទៅរដ្ឋធានីវ៉ាស៊ីនតោននៅព្រឹកថ្ងៃទី១០ ខែឧសភា ឆ្នាំ២០២៥នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងមុនចេញដំណើរនៅអាកាសយានដ្ឋានអន្តរជាតិភ្នំពេញលោកឧបនាយករដ្ឋមន្ត្រី ស៊ុន ចាន់ថុល បានលើកឡើងថាមានប្រទេសប្រមាណ២០ប៉ុណ្ណោះដែលអាមេរិកយល់ព្រមចរចារជាមួយដែលជាសញ្ញាល្អនៃការចរចារ។ លោកបន្ថែមថារដ្ឋាភិបាលកម្ពុជាប្ដេជ្ញាក្នុងការការពារប្រយោជន៍កម្ពុជា និងការងារជូនប្រជាពលរដ្ឋឱ្យបាន។

លោកថា៖ «បើអត់មានសង្ឃឹមមិនបាច់ទៅ(ចរចារ)ទេ! តែយើងមានសង្ឃឹម១០០ភាគរយតែម្ដង។ ក្រុមការងារយើងធ្វើការច្រើនណាស់បានរៀបចំឯកសារមកអស់ហើយ។ អ្នកដែលទៅនេះគឺសុទ្ធតែអ្នកជំនាញហើយបើចង់និយាយរឿងគយខ្ញុំយករឿងគយ ចង់និយាយរឿងសន្ដិសុខខ្ញុំយកអ្នកសន្តិសុខ post Telecomខ្ញុំមាន ធនាគារខ្ញុំមានអ្នកជំនាញ ការបរទេសក៏មាន ដែលមានសមាជិកទាំងអស់១៩រូប»។

សមាសភាពទៅចរចារពន្ធគយបដិការនេះមានចំនួន១៩នាក់ដែលជាមន្ត្រីជំនាញគ្រប់ផ្នែកទាំងអស់ដែលលោក ស៊ុន ចាន់ថុល ថានឹងអាចឆ្លើយតបចរចារបានគ្រប់ការចោទសួរនិងបកស្រាយ ខណៈការកំណត់ពេលប្រជុំចរចានឹងចាប់ផ្ដើមនៅថ្ងៃទី១៣ពេលរសៀល ថ្ងៃទី១៤ពេលរសៀល និងថ្ងៃទី១៥ ពេញមួយថ្ងៃ។

គួរឱ្យដឹងផងដែរថា ប្រធានធិបតីអាមេរិកលោក ដូណាល់ ត្រាំ បានប្រកាសដាក់ពន្ធគយបដិការទៅលើប្រទេសជាង១៨០នៅទូទាំងពិភពលោកកាលពីថ្ងៃទី២ ខែមេសា ឆ្នាំ២០២៥ ក្នុងនោះក៏មានប្រទេសកម្ពុជាផងដែរដែលបានដាក់ពន្ធ៤៩%។ ២ថ្ងៃបន្ទាប់នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានផ្ញើលិខិតទៅកាន់ប្រធានាធិបតីអាមេរិកបង្ហាញពីការប្ដេជ្ញាក្នុងការនាំចូលផលិតផលអាមេរិក និងទម្លាក់ពន្ធគយលើទំនិញអាមេរិក១៩ប្រភេទពី៣៥%មកនៅត្រឹម៥% និងបង្ហាញពីបំណងចរចាជាមួយអាមេរិកផងដែរ។

នៅថ្ងៃទី៩ ខែមេសា អាមេរិកបានសម្រេចព្យួរការអនុវត្តន៍ពន្ធគយបដិការ៩០ថ្ងៃដើម្បីទុកពេលចរចាក្នុងនោះក៏មានប្រទេសកម្ពុជាងផងដែរ។

កាលពីថ្ងៃទី៦ ខែឧសភា ក្នុងវេទិកាសាធារណៈមួយក្នុងក្រុងតាខ្មៅ ខេត្តកណ្ដាល សម្ដេចធិបតី ហ៊ុន ម៉ាណែត បានស្នើឱ្យពលរដ្ឋទុកចិត្តមកលើរដ្ឋាភិបាលក្នុងស្ថានភាពពិភពលោកបច្ចុប្បន្ន ដោយសម្ដេចរដ្ឋាភិបាលដែលដឹកនាំដោយបក្សប្រជាជនកម្ពុជានៅជាមួយពលរដ្ឋជានិច្ច ព្រមទាំងប្ដេជ្ញាពីការធានានូវសមិទ្ធផល និងប្រយោជន៍ជូនប្រជាពលរដ្ឋឱ្យនៅថិតថេរ៕