ព័ត៌មានជាតិ

៤ ខែឆ្នាំនេះ ខ្យល់កន្ត្រាក់បណ្ដាលឱ្យស្លាប់-របួសមនុស្សជិត ២០ នាក់ និងបំផ្លាញផ្ទះជិត ៤ ពាន់ខ្នង

បានផុស

១២ ខែ មុន

នៅ

ថ្ងៃចន្ទ ១២ ឧសភា ២០២៥

ដោយ

ក្នុងរយៈពេល ៤ ខែ ឆ្នាំ ២០២៥ នេះ ខ្យល់កន្ត្រាក់បានកើតឡើងជាង ១០០ លើក នៅតាមរាជធានី-ខេត្តចំនួន ២៤ លើកលែងខេត្តកែប បានបណ្តាលឱ្យមនុស្សស្លាប់ និងរងរបួសជិត ២០ នាក់ បើធៀបនឹងរយៈពេល ៤ ខែដូចគ្នា ឆ្នាំ ២០២៤ កន្លងទៅ ឃើញថា មានការកើនឡើងគួរឱ្យកត់សម្គាល់។

លោក សុទ្ធគឹម កុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ១២ ឧសភា នេះថា រយៈពេល ៤ ខែ ឆ្នាំ ២០២៥ ខ្យល់កន្ត្រាក់បានកើតឡើងចំនួន ១០៧ លើក បានបណ្តាលឱ្យរលំផ្ទះចំនួន ២៦៧ ខ្នង ផ្ទះរបើកដំបូលចំនួន ៣ ៦៩២ ខ្នង សាលារៀន ២៨ អគារតូបផ្សារ ១៤ តូបអគាររដ្ឋបាល ១២ កន្លែង ស្លាប់មនុស្ស ៤ នាក់ និងរងរបួស ១៥ នាក់។ ក្នុងនោះ នៅក្នុងខែមេសា កើតឡើងច្រើនជាងគេមានរហូតដល់ទៅ ៧១ លើក បណ្តាលឱ្យខូចខាត និងរលំផ្ទះចំនួន ១៤៨ ខ្នងផ្ទះ របើកដំបូល ១ ០៩៦ ខ្នង សាលារៀន ១០ អគារ និងរលំដើមឈើ និងផ្ទះសង្កត់ស្លាប់មនុស្សចំនួន ៣ នាក់។

លោកបានបន្តថា តួលេខនេះ បើធៀបទៅនឹង ៤ ខែ ឆ្នាំ ២០២៤ កន្លងទៅ ឃើញថា មានការកើនឡើង ខណៈ ៤ ខែឆ្នាំមុន ខ្យល់កន្ត្រាក់បានកើតឡើងចំនួន ៤៨ លើកប៉ុណ្ណោះ បណ្តាលឱ្យរលំផ្ទះ ៧៥ ខ្នងផ្ទះ របើកដំបូលចំនួន ៦១៣ ខ្នង សាលារៀន ១២ អគារតូបផ្សារ ៤ តូប អគាររដ្ឋបាល ៣ កន្លែង និងរបួសមនុស្ស ២ នាក់ មិនមានអ្នកស្លាប់ទេ។

លោកបានបន្តទៀតថា តាមរយៈតួលេខ ៤ ខែ ឆ្នាំ ២០២៥ នេះ បង្ហាញឱ្យឃើញថា គ្រោះមហន្តរាយនៅដើមឆ្នាំនេះ ហាក់មានការកើនឡើងខ្ពស់ ខណៈរដូវវស្សានៅឆ្នាំនេះ នឹងចូលមកដល់នៅដើមខែឧសភា លឿនជាងឆ្នាំ ២០២៤។

លោកបានបន្ថែមថា «នៅពេលរដូវវស្សាចូលមកដល់ ខ្យល់កន្ត្រាក់ផ្គររន្ទះ ក៏ចាប់ផ្តើមកើតមានជាមួយគ្នាដែរ។ វានឹងបង្កឱ្យមានភ្លៀងធ្លាក់ ផ្គររន្ទះ និងខ្យល់កន្ត្រាក់ កើតឡើងកាន់តែច្រើនបន្ថែមទៀត ដែលនេះជាបញ្ហាហានិភ័យមួយ»។

លោកបានបញ្ជាក់ថា ឆ្លើយតបនឹងស្ថានភាពនេះ គណៈកម្មាធិការគ្រោះមហន្តរាយ និងស្ថាប័នពាក់ព័ន្ធ បានត្រៀមខ្លួនរួចរាល់ជាស្រេច ក្នុងនោះបានធ្វើបច្ចុប្បន្នភាពផែនការត្រៀមបម្រុងឆ្លើយតបនឹងគ្រោះមហន្តរាយផ្សេងៗ ទាំងថ្នាក់ជាតិ និងក្រោមជាតិ និងជំរុញ និងពង្រឹងការផ្តល់ព័ត៌មានដល់អាជ្ញាធរ និងប្រជាពលរដ្ឋឱ្យបានដឹង ដើម្បីឱ្យពួកគាត់ត្រៀមខ្លួនការពារកាត់បន្ថយផលប៉ះពាល់ឱ្យបានច្រើនពេលមានគ្រោះមហន្តរាយផ្សេងៗ។ ក្រៅពីនេះ កងកម្លាំង ក៏បានរៀបចំរួចរាល់ហើយដែរ ដើម្បីត្រៀមខ្លួនជួយអន្តរាគមន៍ប្រជាពលរដ្ឋឱ្យបានទាន់ពេលវេលានៅពេលមានគ្រោះមហន្តរាយកើតឡើងនារដូវវស្សាខាងមុខនេះ។

លោកបានអំពាវនាវដល់អាជ្ញាធរគ្រប់លំដាប់ថ្នាក់ ត្រូវត្រៀមលក្ខណៈឱ្យបានគ្រប់គ្រាន់ ដើម្បីជួយដល់ប្រជាពលរដ្ឋឱ្យបានទាន់ពេលវេលា។ ចំណែកប្រជាពលរដ្ឋ ក៏ត្រូវត្រៀមខ្លួនផងដែរ ដើម្បីធ្វើយ៉ាងណាកាត់បន្ថយផលប៉ះពាល់ឱ្យនៅអប្បបរមា៕

អត្ថបទ ៖ សំអឿន