កម្មករក្នុងវិស័យសំណង់ជាង៤ម៉ឺននាក់បានចុះឈ្មោះចូលជាសមាជិក ប ស ស

លោកបណ្ឌិត ហេង សុផាន់ណារឹទ្ធ អគ្គនាយករង ប.ស.ស. និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍នៅព្រឹកថ្ងៃទី៣០ឧសភានេះថា បច្ចុប្បន្ននេះមានកម្មករចំនួន៤២,១៦៤ នាក់ ស្រី ៧,៦៤៩
នាក់កំពុងបម្រើការងារនៅក្នុងសហគ្រាសក្នុងវិស័យសំណង់ចំនួន៨៣៤សហគ្រាសបានចុះឈ្មោះចូលជាសមាជិក ប.ស.ស.ដែលបានជួយលើកកម្ពស់សុខភាព និងជីវភាពរស់នៅកាន់តែប្រសើរ។

លោកបណ្ឌិតបានបន្តថា ក្រៅពីនេះ ប.ស.ស.កំពុងដំណើរការការចុះបញ្ជីសហគ្រាសចំនួន៦២២បន្ថែមទៀតដែលមានកម្មករសរុប ១៨,៥១៧ នាក់ ស្រី ៣,៩០៤ នាក់។ យ៉ាងណាក៏ដោយ លោកបណ្ឌិត បានធ្វើការអំពាវនាវដល់ក្រុមហ៊ុនសហគ្រាសក្នុងវិស័យសំណង់ដែលនៅមិនទាន់ចុះបញ្ជីសូមរួសរ៉ាន់មកចុះបញ្ជីជាមួយ ប.ស.ស.ដើម្បីឱ្យកម្មករសំណង់ទទួលបានការគាំពារសង្គម និងអត្ថប្រយោជន៍ផ្សេងៗពីប.ស.ស.ពិសេសទទួលបានការពិនិត្យ និងព្យាបាល
ជំងឺនៅតាមមន្ទីរពេទ្យដែលជាដៃគូរបស់ ប.ស.ស.។

លោកបណ្ឌិតបានបន្តទៀតថា ការមានប័ណ្ណប.ស.ស.នឹងជួយធ្វើឱ្យកម្មករយើងលែងសូវខ្វល់ខ្វាយទាក់ទិនទៅនឹងការចំណាយផ្សេងៗទៅលើការពិនិត្យ និងព្យាបាលជំងឺនៅតាមមន្ទីរពេទ្យនៅពេលដែលឈឺ ព្រោះថារាល់ការចំណាយជាបន្ទុករបស់ប.ស.ស.។

លោកបណ្ឌិតបានបន្ថែមទៀតថា «ប​.​ស​.​ស បាន​ក្លាយ​ជា​និមិត្តរូបនៃ​សុខភាព​ក្នុង​ចិត្ត​របស់​ប្រជាជន ដោយ​អាច​ជួយ​កាត់បន្ថយ​បន្ទុក​ចំណាយពង្រឹង​ស្ថិរភាព និង​ការ​ព្យាករណ៍​បាន នៃ​ចំណូលព្រមទាំង​ធ្វើ​ឱ្យ​ប្រសើរ​ឡើង​នូវ​សុខភាព​របស់​ខ្លួន»។

សូមរំលឹកថា គិតមកត្រឹមខែមេសា ឆ្នាំ២០២៥នេះ ប.ស.ស.មានសមាជិកកើនឡើងដល់៣ ០៦០ ៣៩២នាក់ ស្រី ១ ៦៨៦ ៨៨៧នាក់ ក្នុងនោះបុគ្គលដែលស្ថិតក្នុងវិស័យសាធារណៈចំនួន ៥០៨ ៦៦៩នាក់ស្រី ១៥០៩០៨នាក់ បុគ្គលដែលស្ថិតក្នុងវិស័យឯកជន ចំនួន ១ ៨៦៦ ១២២នាក់ស្រី ១១២៤ ៨០១នាក់ បុគ្គលស្វ័យនិយោជន៍ចំនួន ៤៩៨ ៥៤៦នាក់
ស្រី៣០៣៤១៩នាក់ និងអ្នកក្នុងបន្ទុក១៨៧ ០៥៥នាក់ ស្រី ១០៧ ៧៥៩នាក់៕

អត្ថបទ៖ សំអឿន