ពីអ្នកជំនួញបរាជ័យម្នាក់ ងាកមកចាប់អាជីព​​ផលិតស្រាស ផ្ដល់ការងារដល់អ្នកភូមិ​ជាច្រើន​នាក់​

លោក ថន ណាគ្រី រស់នៅឃុំជ្រោយបន្ទាយ ក្នុងស្រុកព្រែកប្រសព្វ​ ខេត្ត​ក្រចេះ​បានឲ្យដឹងថា ពីដើមដំបូងមក លោកជាអ្នកជំនួញម្នាក់ ប៉ុន្តែរកស៊ីបរាជ័យ ក៏ងាកមកចាប់យកអាជីពជាអ្នកផលិតស្រាសវិញម្តង តាំងពីឆ្នាំ ២០១០ រហូតមកដល់ពេលនេះ គឺ ១៥ ឆ្នាំ​ហើយ។

ដោយបានដើរទិញស្រូវអង្ករពីប្រជាពលរដ្ឋក្នុងភូមិ ពេលខ្លះត្រូវមកផ្សារនៅទីរួមខេត្តក្រចេះ ដើម្បីទិញអង្ករ​យកមកដាំ ឬ ចំហុយឲ្យក្លាយជាបាយ រួចហាលឲ្យត្រជាក់ រួចប្រឡាក់ជាមួយដំបែរស្រា រួចក៏ដាក់តាមធុងដើម្បីរក្សាទុកពី១យប់ ទៅ២យប់ ហើយក៏យកទៅចំហុយ បានជាស្រាសរមក ហើយក៏ច្រកដាក់កាន ដើម្បីចែកចាយលក់ឲ្យអតិថិជនដែលបានកម្មង់។

លោក ថន ណាគ្រី បាន​ឲ្យ​ដឹ​ង​ថា ក្នុងមួយថ្ងៃ លោកប្រើអង្ករដាំ ឬចំហុយបាយ អស់ចំនួន ៥៥០ គីឡូក្រាម ប្រើឆ្នាំងខ្ទះធំៗចំនួន ១១ ក្នុងការចម្អិន ដែលអាចផលិតជាស្រាសបានចំនួន ១,០៥០ លីត្រ ស្មើនឹង ៣៥ កាន។

ស្រាដែល​បិត​រួច ត្រូវបានអ្នកភូមិខ្លះយកទៅលក់ដល់ខេត្តសៀមរាប និងតាមខេត្តនានា ព្រោះនៅពេលពួកគាត់មកទិញ បានឃើញពីវិធីក្នុងការផលិតស្រា ពិសារទៅរសជាតិអាចទទួលយកបាន ក៏បន្តគាំទ្រជួយទិញយកទៅលក់បន្តទៀត។ នេះពើតាមការ​អះអាង​របស់​លោក ថន ណាគ្រី។

កាលពីអំឡុងខេត្តក្រចេះ កើតមានករណីពុលស្រាសនោះ គឺមានមន្ត្រីបច្ចេកទេសនៃមន្ទីរឧស្សាហកម្មខេត្ត អាជ្ញាធរខេត្ត ស្រុក និងអាជ្ញាធរមូលដ្ឋាន ចុះមកពិនិត្យតាមដានតាមមូលដ្ឋានរយៈពេលបីខែម្តង ប៉ុន្តែក្រោយមកឃើញថា រយៈពេល១ឆ្នាំម្តងវិញ។

លោករៀបរាប់បន្តទៀតថា ដោយមើលឃើញអាជីពនេះល្អ អាចរកបានប្រាក់ចំណូលសមរម លោកក៏សម្រេចចិត្តធ្វើអាជ្ញាប័ណ្ណត្រឹមត្រូវតាមច្បាប់ និងបានពង្រីកមុខរបរនេះបន្ថែម ហើយថែមទាំងផ្ដល់ការងារដល់អ្នកភូមិថែមទៀតផង សព្វថ្ងៃ មានកម្មករ ៦ នាក់ ស្រី ២នាក់ ដោយកម្មករបុរស ទទួលបានប្រាក់ឈ្នូល ៣ ម៉ឺនរៀល រីឯស្រ្តី ទទួលបានប្រាក់ឈ្នួល ២ ម៉ឺន ៥ ពាន់រៀល ក្នុង១ថ្ងៃ និងមានអាហារពេលថ្ងៃត្រង់។

លោកបានលើងឡើងថា មុនដំបូងមានគេថាឲ្យគាត់ គ្មានពីណាគេគ្រាន់តែបិទស្រាសសោះធ្វើអាជ្ញាប័ណ្ណដែរ តែសម្រាប់រូបលោកវិញ ពេលគេហៅទៅរៀន​ក៏ទៅរៀនរហូតដល់ចេះ ហើយនៅពេលមានករណីពុលស្រា ខាងមន្ត្រីជំនាញក៏បានហៅទៅរៀនបន្ថែមពីបច្ចេកទេស។

លោកបានបញ្ជាក់ថា មុខរបរផលិតស្រាសនេះ ធ្វើមិនស្រួលពុលគេ ពិបាកគ្រោះថ្នាក់ដល់ខ្លួន។ យើងបានច្បាប់ហើយ យើងធ្វើត្រូវគោរពតាមគោលការណែនាំរបស់ក្រសួងឧស្សាហកម្ម ពេលគេចុះមកត្រួតពិនិត្យណែនាំ ដោយ១ឆ្នាំ ចុះមកម្តង៕

អត្ថបទ៖ ប្រុញ វិធិន