ព័ត៌មានជាតិ

ប្រធានសភាលើកពេលទៅទស្សនកិច្ចនៅហុងគ្រីដោយសារមានការងារអទិភាពក្នុងប្រទេស

បានផុស

១០ ខែ មុន

នៅ

ថ្ងៃចន្ទ ១៦ មិថុនា ២០២៥

ដោយ

ប្រធានសភាកម្ពុជា សម្ដេចសភាធិបតី ឃួន សុដារី បានសម្រេចលើកពេលទៅទស្សនកិច្ចផ្លូវរដ្ឋនៅប្រទេសហុងគ្រី ដោយសារមានការងារជាអទិភាពនៅក្នុងប្រទេស។

តាមគម្រោងសម្ដេចនឹងធ្វើដំណើរទៅធ្វើទស្សនកិច្ចនៅប្រទេសហុងគ្រីចាប់ពីថ្ងៃទី១៥ ខែមិថុនា ចំពេលដែលកម្ពុជាប្ដឹងប្រទេសថៃទៅតុលាការយុត្តិធម៌អន្តរជាតិ និងស្ថានការណ៍ព្រំដែនកម្ពុជាកំពុងកើនកម្ដៅ។

ទោះជាយ៉ាងណានាយកខុទ្ទកាល័យ និងជាអ្នកនាំពាក្យសម្ដេចប្រធានសភាលោក កែវ ពិសិដ្ឋ ប្រាប់កម្ពុជាថ្មីថា ការលើកពេលនេះមិនមានជាប់ពាក់ព័ន្ធនឹងស្ថានការណ៍ព្រំដែនកម្ពុជា-ថៃទេ។

លោកថា៖ «ការលើកពេលនេះអត់មានទាក់ទងនឹងការតានតឹងរឿងព្រំដែនទេ។ ដោយសារតែសម្ដេចមានការងារអទិភាពក្នុងស្រុកដែលលោកត្រូវយកចិត្តទុកដាក់»។

ដោយឡែកចំពោះស្ថានការណ៍ព្រំដែនវិញលោកថាសភាជាតិនៅបន្តតាមដាន ហើយបើក្នុងករណីពិសេសមានគោលការណ៍ពីថ្នាក់ដឹកនាំ សភាអាចបើកកិច្ចប្រជុំពេញអង្គដើម្បីពិនិត្យលើស្ថានការណ៍វិវត្តន៍ផងដែរ។

គួរឱ្យដឹងថាសម្ដេចប្រធានរដ្ឋសភាគ្រោងធ្វើដំណើរទស្សនកិច្ចទៅកាន់ប្រទេសហុងគ្រីចាប់ពីថ្ងៃទី១៥ ដល់ថ្ងៃទី២០ ខែមិថុនានេះ ដើម្បីរឹតចំណងមិត្តភាព ដ៏ល្អដែលមានស្រាប់រវាងប្រទេសទំាងពីរឱ្យកាន់តែសកម្ម គ្រប់ជ្រុងជ្រោយបន្ថែមទៀតទំាងក្របខណ្ឌទ្វេភាគីនិងពហុភាគី ដោយយកផលប្រយោជន៍ប្រជាពលរដ្ឋជាស្នូល។ ចំពោះពេលវេលាដំណើរទស្សនកិច្ចនៅពេលក្រោយអគ្គលេខាធិការសភានឹងជូនដំណឹងជាផ្លូវការនៅពេលក្រោយ៕

អត្ថបទដោយ ហ៊ុន សិរីវឌ្ឍន៍