ព័ត៌មានជាតិ

៦ ខែ ឆ្នាំនេះ ខ្យល់កន្ត្រាក់ បង្កឲ្យមនុស្សស្លាប់-របួស ជាង ៣០ នាក់ និងបំផ្លាញផ្ទះជិត ៦ ពាន់ខ្នង កើនឡើងជាងឆ្នាំមុន

បានផុស

១០ ខែ មុន

នៅ

ថ្ងៃសុក្រ ៤ កក្កដា ២០២៥

ដោយ

នៅក្នុងរយៈពេល ៦ ខែ ឆ្នាំ ២០២៥ នេះ ខ្យល់កន្ត្រាក់ បានកើតឡើងជិត ២០០ លើក បណ្ដាលឲ្យមនុស្សស្លាប់ និងរងរបួសជាង ៣០ នាក់ និងបំផ្លាញផ្ទះសម្បែងជាង ៦ ពាន់ខ្នង ព្រមទាំងហេដ្ឋារចនាសម្ព័ន្ធផ្សេងៗ មួយចំនួនទៀត មានការកើនឡើង បើធៀបទៅនឹងរយៈពេល ៦ ខែ ដូចគ្នា ឆ្នាំ ២០២៤ កន្លងទៅ។

លោក សុទ្ធគឹម កុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍នៅព្រឹកថ្ងៃទី ៤ កក្កដា នេះថា ខ្យល់កន្ត្រាក់ ក្នុងឆមាសទី ១ ឆ្នាំ ២០២៥ នេះ កើតមានចំនួន ១៩០ លើក នៅមូលដ្ឋានរាជធានី-ខេត្ត ទូទាំងប្រទេស បណ្តាលឲ្យផ្ទះរលំ និងខូចខាតធ្ងន់ធ្ងរចំនួន ៣៩៣ ខ្នង របើកដំបូល និងខូចខាតមធ្យមចំនួន ៥.៥០០ ខ្នង របើកដំបូលសាលារៀន ៣៦ អគារ ដួលរលំតូបលក់ដូរ ២១ អគាររដ្ឋបាល កុដិ ព្រះវិហារ ១៩ កន្លែង អគារគ្រូស្នាក់នៅ ២ កន្លែង អគារកងទ័ព ៤ កន្លែង ដួលរលំអង់តែនវិទ្យុទាក់ទង ១ ដួល រលំរោងការ និងស្តង់ដំឡូង ១០ កន្លែង រោងម៉ាស៊ីនកិនស្រូវ ២ ដួលរលំបង្គោលភ្លើង និង សូឡា ៦៥ ដើម ដួលរលំដើមឈើ ១៣៧ ដើម ចម្ការកៅស៊ូ ៥ ហិតា ខូចខាតរថយន្ត ២ គ្រឿង ម៉ូតូ ៨ គ្រឿង រងគ្រោះស្លាប់ ៥ នាក់ និង របួស ២៧ នាក់។

លោកបានបន្តថា តួលេខនេះ បើធៀបទៅនឹងរយៈពេល ៦ ខែ ឆ្នាំមុន ឃើញថា មានការកើនឡើងគួរឲ្យកត់សម្គាល់ ដោយ ៦ ខែ ឆ្នាំមុន ខ្យល់កន្ត្រាក់ បានកើតឡើងចំនួន ១៨២ លើក នៅទូទាំងប្រទេស បណ្តាលឲ្យរលំផ្ទះធ្ងន់ធ្ងរចំនួន ៣៧៥ ខ្នង របើកដំបូលផ្ទះ និងខូចខាតមធ្យមចំនួន ៣ ៣២៧ ខ្នង របើកដំបូលសាលារៀនចំនួន ៣៧ ខ្នង តូបផ្សារចំនួន ១៧ តូប អគាររដ្ឋបាលចំនួន ១៣ កន្លែង បណ្ដាលឲ្យមនុស្សស្លាប់ចំនួន ៣ នាក់ និងរបួសចំនួន ២៣ នាក់។

លោកបានបន្តទៀតថា អ្នកស្លាប់ដោយសារខ្យល់កន្ត្រាក់ចំនួន ៥ នាក់ ក្នុងនោះ នៅខេត្តកំពង់ស្ពឺ ១ នាក់ ព្រៃវែង ១ នាក់ កំពត ១ នាក់ បាត់ដំបង ១ នាក់ និងសៀមរាប ១ នាក់៕

អត្ថបទ ៖ សំអឿន