ឆ្លង​កូវីដ​មិន​ដឹង​ខ្លួន មនុស្សជាង ១០០នាក់ជាប់ពាក់ព័ន្ធ មាន​ទាំង​ម្តាយ​និង​ប្រពន្ធ

អាជ្ញាធរនិងក្រុមគ្រូពេទ្យខេត្តស្វាយរៀង បានចុះយកសំណាក មនុស្សចំនួន ១១១ នាក់ បន្ទាប់ពីរកឃើញថាបានជាប់ពាក់ព័ន្ធជាមួយបុរសជនជាតិខ្មែរដែលឆ្លងជំងឺកូវីដ១៩ ម្នាក់មានអាយុ ៥២។

សេចក្តីជូនដំណឹងរបស់រដ្ឋបាលខេត្តស្វាយរៀង បញ្ជាក់ថាបុរសជនជាតិខ្មែរដែលមានវិជ្ជមានកូវីដ១៩ ស្នាក់នៅបន្ទប់ជួលមួយកន្លែងក្នុងក្រុងបាវិត។ នៅថ្ងៃទី ២១ខែមីនា បុរសរូបនេះ មានអាការមិនស្រួលខ្លួនបានឲ្យប្រពន្ធទៅទិញថ្នាំយកមកលេបតែមិនធូរស្បើយហើយបានធ្វើដំណើរទៅផ្ទះម្ដាយ។

នៅថ្ងៃទី២៦ ខែមីនាបានជួលរថយន្តតាក់ស៊ីធ្វើដំណើរមកសម្រាកព្យាបាលនៅមន្ទីរពេទ្យបង្អែកខេត្តស្វាយរៀងដោយស្ថានភាពមិនធូរស្រាលនៅថ្ងៃទី២៨ខែមីនាក្រុមគ្រូពេទ្យបានយកវត្ថុសំណាកបុរសជនជាតិខ្មែរខាងលើដែលមានរោគសញ្ញាចូលក្នុងនិយមន័យសង្ស័យថាមានជំងឺកូវីដ១៩ដើម្បីធ្វើតេស្តនៅវិទ្យាស្ថានសុខភាពសាធារណៈ។

ជាលទ្ធផលមានវិជ្ជមានកូវីដ១៩ នឹងត្រូវបានបញ្ជូនទៅព្យាបាលនៅមន្ទីរពេទ្យបង្អែកស្វាយជ្រុំនៅយប់ថ្ងៃទី៣០ខែមីនា។ក្រុមការងារបានរកឃើញអ្នកប៉ះពាល់និងប្រយោលសរុបចំនួន១១១ នាក់ស្រី៥៣នាក់ហើយបានយកសំណាកអ្នកពាក់ព័ន្ធផ្ទាល់ចំនួន៩៧អ្នកស្រី៤១នាក់ត្រូវធ្វើតេស្តនិងធ្វើចត្តាឡីស័ករយៈពេល១៤ថ្ងៃ។

រដ្ឋបាលខេត្តបានបន្តថាចំពោះទីតាំងដែលមានការពាក់ព័ន្ធជាមួយអ្នកជំងឺខាងលើត្រូវបានធ្វើជាទីកន្លែងចត្តាឡីស័ករួមមានទីតាំងផ្ទះជួលស្ថិតនៅភូមិបាវិតលើសង្កាត់បាវិត ទីតាំងផ្ទះឈ្មោះ អន សុវណ្ណ នៅភូមិប្រសប់លាក់ សង្កាត់បាទី ក្រុងបាវិត ត្រូវជាម្ដាយបង្កើតរបស់ឈ្មោះហួត សុខា។

រដ្ឋបាលខេត្តសូមអំពាវនាវដល់អ្នកដែលពាក់ព័ន្ធឬបានដឹងថាបានប៉ះពាល់ជាមួយបុរសខាងលើនិងទីតាំងដែលបានម្ចាស់លើគឺចាប់ពីថ្ងៃទី១៥ខែមីនាឆ្នាំ២០២១ត្រូវធ្វើចត្តាឡីស័កនៅផ្ទះរយៈពេល ១៤ថ្ងៃប្រសិនមានបញ្ហាសុខភាពប្រែប្រួលត្រូវផ្ដល់ដំណឹងទៅអាជ្ញាធរមូលដ្ឋានជាបន្ទាន់៕

អត្ថបទ៖សំអឿន