ជប៉ុន ប្រកាសផ្តល់ជំនួយមនុស្សធម៌១,៨លានដុល្លារ ជួយដល់ជនភៀសសឹកនៅតាមតំបន់ព្រំដែនកម្ពុជា-ថៃ

រដ្ឋាភិបាលជប៉ុន បានសម្រេចផ្តល់ជំនួយសង្គ្រោះបន្ទាន់(ឥតសំណង)ដែលមានទឹកប្រាក់សរុបប្រមាណ១,៨លានដុល្លារអាមេរិក ដើម្បីឆ្លើយតបទៅនឹងតម្រូវការមនុស្សធម៌ជាបន្ទាន់នៅតាមតំបន់ព្រំដែនកម្ពុជា-ថៃ។ នេះបើតាមការប្រកាសឱ្យដឹងរបស់ស្ថានទូតជប៉ុនប្រចាំនៅកម្ពុជា នៅព្រឹកថ្ងៃទី១៥ ខែសីហា ឆ្នាំ២០២៥ នេះ។

តាមរយៈហ្វេសប៊ុកស្ថានទូតជប៉ុន លោក UENO Atsushi ឯកអគ្គរាជទូតជប៉ុនប្រចាំនៅកម្ពុជា បានអះអាងថា នៅក្នុងកិច្ចសហប្រតិបត្តិការនេះ ជប៉ុននឹងអនុវត្តនូវជំនួយមនុស្សធម៌១,៨លានដុល្លារនេះ ដូចជា ការចែកសម្ភារៈចាំបាច់ប្រើប្រាស់ប្រចាំថ្ងៃ និងជម្រកបណ្តោះអាសន្នជាដើម តាមរយៈអង្គការអន្តរជាតិទេសន្តរប្រវេសន៍ (IOM) និងមូលនិធិអង្គការសហប្រជាជាតិដើម្បីកុមារ(យូនីសេហ្វ)។

លោក UENO Atsushi បានបញ្ជាក់ថា៖ «រដ្ឋាភិបាលជប៉ុនគាំទ្រយ៉ាងខ្លាំងចំពោះកិច្ចព្រមព្រៀងឈប់បាញ់បន្ទាន់ និងឥតលក្ខខណ្ឌរវាងកម្ពុជា និងថៃ ហើយសង្ឃឹមថា នឹងមានសន្តិភាពឡើងវិញយ៉ាងឆាប់រហ័ស ហើយនឹងបន្តខិតខំប្រឹងប្រែងដើម្បីកាត់បន្ថយការលំបាករបស់អ្នកដែលរងគ្រោះ។ ខ្លួនខ្ញុំផ្ទាល់ និងវរសេនីយឯក ហារ៉ា តាកាស៊ី អនុព័ន្ធយោធានៃស្ថានទូតជប៉ុនបានចូលរួមដំណើរទស្សនកិច្ចទៅកាន់តំបន់ព្រំដែន ហើយមានការគ្រាំគ្រាចិត្តជាពន់ពេកចំពោះទំហំនៃការខូចខាត»។ បើតាមលោកឯកអគ្គរាជទូតជប៉ុនប្រចាំនៅកម្ពុជា ស្ថានទូតជប៉ុន ក៏នឹងបន្តខិតខំប្រឹងប្រែង ដើម្បីជួយស្តារសន្តិភាព និងផ្តល់ជំនួយដល់ប្រជាពលរដ្ឋដែលរងគ្រោះនៅក្នុងប្រទេសកម្ពុជា។

ជប៉ុន គឺជាប្រទេសទី២ហើយដែលបានប្រកាសផ្តល់ជំនួយមនុស្សធម៌បន្ទាន់ដល់ជនភៀសសឹកកម្ពុជាដែលបានជម្លៀសចេញពីលំនៅដ្ឋាន ព្រោះតែការប្រយុទ្ធគ្នារវាងកងទ័ពការពារជាតិកម្ពុជា និងកងទ័ពឈ្លានពានថៃ។ កាលពីចុងសប្តាហ៍មុន ឯក​អគ្គរដ្ឋ​ទូតចិនប្រចាំនៅរាជធានីភ្នំពេញ​ លោក វ៉ាង វិនពីន ក៏បានប្រកាសផ្ដល់ជំនួយជាថវិកា១០ម៉ឺនដុល្លារសម្រាប់ជួយដល់ជនភៀសសឹករបស់កម្ពុជា ដែលកំពុងស្នាក់នៅក្នុងជំរុំភៀសខ្លួន ក្នុងខេត្តឧត្តរមានជ័យ។ ការប្រកាសផ្ដល់ជំនួយនេះ ធ្វើឡើងបន្ទាប់ពីលោក វ៉ាង វិនពីន បានចុះទៅមើលឃើញផ្ទាល់ដល់ទីតាំងស្នាក់នៅរបស់ជនភៀសខ្លួនកម្ពុជា ដែលបានរត់គេចចេញពីការប្រយុទ្ធឈ្លានពានរបស់យោធាថៃមកលើកម្ពុជា។

មិនខុសគ្នានឹងឯកអគ្គរដ្ឋទូតចិនប្រចាំនៅកម្ពុជាដែរ ការប្រកាសផ្តល់ជំនួយមនុស្សធម៌បន្ទាន់របស់ជប៉ុននាពេលនេះ ធ្វើឡើងបន្ទាប់ពីលោក UENO Atsushi រួមជាមួយនឹងអង្គទូតបរទេសដទៃទៀត បានចុះទៅឃើញផ្ទាល់ជាក់ស្តែងតំបន់ដែលបានរងផលប៉ះពាល់ដោយការប៉ះទង្គិចគ្នារវាងយោធាកម្ពុជា និងថៃ ក៏ដូចជា កន្លែងជម្រកសម្រាប់ពលរដ្ឋដែលបានភៀសខ្លួនចេញពីតំបន់ជម្លោះព្រំដែនកម្ពុជា-ថៃ។ ក្រោយពីបានឃើញអំពីទំហំនៃការខូចខាតដោយសារការប៉ះទង្គិចរវាងយោធានេះ និងស្ថានភាពលំបាករបស់ពលរដ្ឋដែលបានភៀសខ្លួនកម្ពុជា លោក UENO Atsushi មានការគ្រាំគ្រាចិត្តជាពន់ពេក។

លោក UENO Atsushi ក៏ដូចជា អង្គទូតបរទេសដទៃទៀត បានប្រកាសគាំទ្រចំពោះការមានបទឈប់បាញ់រវាងកម្ពុជា និងថៃ និងអំពាវនាវឱ្យមានការគោរព និងអនុវត្តឱ្យបានពេញលេញនូវបទឈប់បាញ់នេះ ដើម្បីឆ្ពោះទៅបញ្ចប់អរិយភាពនៅតាមបណ្តោយព្រំដែនកម្ពជា-ថៃ។ គិតមកដល់ពេលនេះ ភាគីកម្ពុជា បានអនុវត្តយ៉ាងពេញលេញចំពោះបទឈប់បាញ់នេះ ខណៈដែលភាគីថៃ ចេះរកលេសរំលោភបំពានម្តងហើយម្តងទៀតជាបន្តបន្ទាប់ ដូចជា ការចល័តទ័ពចូលដែនអធិតេយ្យភាពកម្ពុជា ការយកគ្រឿងចក្រមកឈូសឆាយធ្វើផ្លូវ ធ្វើលេណដ្ឋាន រាយបន្លាលួស និងប្រើចម្ពាមបាញ់មកលើកងទ័ពកម្ពុជាជាដើម។ កម្ពុជា បានទាមទារឱ្យភាគីថៃ បញ្ឈប់សកម្មភាពបង្កហេតុទាំងអស់នេះជាបន្ទាន់ និងបានអំពាវនាវឱ្យអន្តរជាតិជួយជំរុញទៅថៃឱ្យគោរពឱ្យបានពេញលេញនូវបទឈប់បាញ់នេះផងដែរ៕