ក្រសួងការងារចាប់ផ្ដើមប្រជុំកំណត់ប្រាក់ឈ្នួលកម្មកររោងចក្រសម្រាប់ឆ្នាំ២០២៦

នៅរសៀលថ្ងៃទី២០ ខែសីហា ឆ្នាំ២០២៥នេះ ក្រសួងការងារបានចាប់ផ្ដើមបើកកិច្ចប្រជុំកំណត់​ប្រាក់​ឈ្នួល​ឆ្នាំ២០២៦ សម្រាប់កម្មករ-និយោជិត ដែលធ្វើការក្នុងឧស្សាហកម្មវាយ​ន​ភណ្ឌ កាត់ដេរ ផលិតផល​ស្បែកជើង និង​ផលិតផល​ធ្វើដំណើរ​ និង​កាបូប។

កិច្ចប្រជុំ​ក្រុមប្រឹក្សា​ជាតិ​ប្រាក់​ឈ្នួល​អប្បបរមា​ អាណត្តិ​ទី​៤ លើក​ទី​១នេះ​ គឺបានធ្វើឡើងក្រោមវត្តមានដឹកនាំរបស់លោក ហេង​ សួរ ប្រធាន​ក្រុម​ប្រឹក្សាជាតិ​ប្រាក់​ឈ្នួល​អប្បបរមា ​និង​ជា​រដ្ឋមន្ត្រី​ក្រសួង​ការងារ​ និង​បណ្ដុះបណ្ដាល​វិជ្ជាជីវៈ​ ដោយមាន​ការចូលរួម​ពី​សមាជិក​ក្រុម​ប្រឹក្សា​ជាតិ​ប្រាក់​ឈ្នួល​អប្បបរមាសរុប​ចំនួន៥១រូប ដែលមាន​សមាសភាព​ស្មើៗគ្នា​ មកពី​តំណាង​ភាគី​រាជរដ្ឋាភិបាល តំណាង​ភាគី​កម្មករ​-​និយោជិត និង​តំណាង​ភាគី​និយោជក។

ជាការរំលឹក ឆ្នាំ២០២៥នេះ ​ប្រាក់​ឈ្នួល​ទាបបំផុតរបស់កម្មករ-និយោជិត មានចំនួន២០៨ដុល្លារក្នុងមួយខែ បើធៀបនឹងឆ្នាំ២០២៤ មានត្រឹម២០៤ដុល្លារ ពោលគឺកើនឡើង៤ដុល្លារ ក្រោយមានការបោះឆ្នោតដោយកិច្ចប្រជុំត្រីភាគី ដោយបានឯកភាពដំឡើង២ដុល្លារ និងការបន្ថែម២ដុល្លារទៀតពីសម្ដេចធិបតីនាយករដ្ឋមន្ត្រី ហ៊ុន ម៉ាណែត។

សម្រាប់ដំណើរការប្រជុំចរចាប្រាក់ឈ្នួលពេលនេះ ត្រូវបានភាគីពាក់ព័ន្ធរំពឹងថា នឹងប្រព្រឹត្តទៅដោយរលូន និងទទួលបានលទ្ធផលល្អប្រសើរឡើង យោងតាមបទពិសោធជាច្រើនឆ្នាំកន្លងមក ដើម្បី​ប្រយោជន៍​កម្មករ​ដោយ​អាច​ទទួលយកបាន​ទាំងអស់គ្នា​៕

ដោយ៖ ធឿន វ៉ាន់សុង