ព័ត៌មានជាតិ

រដ្ឋមន្ត្រីក្រសួងការងារ អំពាវនាវដល់កម្មករកុំមានការព្រួយបារម្ភក្នុងការចាក់វ៉ាក់សាំងកូវីដ១៩

បានផុស

៥ years មុន

នៅ

ថ្ងៃពុធ ៧ មេសា ២០២១

ដោយ

លោក បណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានអំពាវនាវដល់បងប្អូនកម្មករនិយោជិត សូមកុំមានការព្រួយបារម្ភក្នុងការចាក់វ៉ាក់សាំង ព្រោះមិនធ្វើឲ្យមានផលប៉ះពាល់ដល់សុខភាពបងប្អូនអ្វីឡើយ ព្រោះគុណភាពនៃវ៉ាក់សាំង គឺមានគុណភាពល្អអាចទទួលយកបាន។

ថ្លែងនៅសៀលថ្ងៃទី០៦ ខែមេសា ឆ្នាំ២០២១ ខណៈអញ្ជើញពិនិត្យមើលទីតាំងសម្រាប់យុទ្ធនាការចាក់វ៉ាក់សាំងជូនបងប្អូនកម្មករ លោករដ្ឋមន្ត្រីបានមានប្រសាសន៍ថា ការស្ម័គ្រចិត្តចាក់វ៉ាក់សាំង គឺជាជំរើសតែមួយគត់ដែលជួយឲ្យយើងទាំងអស់គ្នា អាចជៀសផុតពីជំងឺកូវីដ១៩ ដែលកំពុងរាតត្បាតដ៏កាចសាហាវនេះបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រីបានអំពាវនាវថា «ខ្ញុំសូមអំពាវនាវដល់បងប្អូនកម្មករនិយោជិត សូមកុំមានការព្រួយបារម្ភក្នុងការចាក់វ៉ាក់សាំង ដែលរាជរដ្ឋាភិបាលបាននឹងកំពុងផ្តល់ជូនដោយឥតគិតថ្លៃនេះ ព្រោះគុណភាពនៃវ៉ាក់សាំងដែលរាជរដ្ឋាភិបាល និងក្រសួងសុខាភិបាល បានយកមកចាក់ជូនតាំងពីចាប់ផ្តើមដំបូងរហូតដល់ពេលនេះ គឺមានគុណភាពល្អអាចទទួលយកបាន ហើយយសូមឲ្យបងប្អូនទាំងអស់មានការជឿជាក់លើរាជរដ្ឋាភិបាល និងក្រសួងសុខាភិបាល ដែលបានគិតគូរខ្ពស់ដល់សុខភាពរបស់បងប្អូន»។

គួរបញ្ជាក់ថា ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹងស្តីពីការចាក់វ៉ាក់សាំងកូវីដ១៩(ស៊ីណូវ៉ាក់) ជូនបងប្អូនកម្មករ និយោជិត តាមរោងចក្រ សហគ្រាសនៅរាជធានីភ្នំពេញ ចាប់ពីថ្ងៃទី០៧ ខែមេសា ឆ្នាំ២០២១នេះតទៅហើយ និងនៅតាមបណ្តាខេត្តអាទិភាពផ្សេងៗទៀតក៏បាននឹងកំពុងរៀបចំយុទ្ធនាការចាក់វ៉ាក់សាំងជាបន្តបន្ទាប់ទៀត៕

អត្ថបទ ៖ សំអឿន