កម្ពុជា-ថៃ នឹងបន្តរៀបចំកិច្ចប្រជុំ RBC នាថ្ងៃទី២៤សីហាស្អែកនេះ ដែលធ្វើឡើងនៅខេត្តប៉ៃលិន

នៅថ្ងៃទី២៤ ខែសីហា ឆ្នាំ២០២៥ កម្ពុជា និងថៃ នឹងរៀបចំកិច្ចប្រជុំគណៈកម្មាធិការ​ព្រំដែន​ថ្នាក់​យោធភូមិភាគ​ (RBC) ជាថ្មីម្ដងទៀត ដែលគ្រោងធ្វើឡើងនៅខេត្តប៉ៃលិន ប្រទេសកម្ពុជា។

អ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតា ថ្លែងឱ្យដឹងថា កិច្ចប្រជុំនាថ្ងៃទី២៤ ខែសីហា ស្អែកនេះ គឺជាកិច្ចប្រជុំ​ថ្នាក់​លេខាធិការដ្ឋាននៃគណៈកម្មាធិការ​ព្រំដែន​ថ្នាក់​យោធភូមិភាគ​កម្ពុជា​-​ថៃ (RBC) រវាងយោធភូមិភាគទី៥ របស់កម្ពុជា និងបញ្ជាការដ្ឋានការងារចន្ទបូរី-ត្រាត របស់ថៃ ដែលកិច្ចប្រជុំលើកនេះ កម្ពុជា នឹងធ្វើជាម្ចាស់ផ្ទះ ដែលនឹងប្រព្រឹត្តទៅនៅខេត្តប៉ៃលិន។

កិច្ចប្រជុំនេះធ្វើឡើងបន្ទាប់ពីការវិវត្តជាវិជ្ជមានកន្លងមកនេះនៃកិច្ចប្រជុំវិសាមញ្ញគណៈកម្មាធិការ​ព្រំដែន​ថ្នាក់​យោធភូមិភាគ​កម្ពុជា​-​ថៃ (RBC) ជាអាទិ៍រវាងយោធភូមិភាគទី៣ របស់កម្ពុជា និងបញ្ជាការដ្ឋានការងារចន្ទបុរី-ត្រាត របស់ថៃ កាលពីថ្ងៃទី១៦ ខែសីហា និងកិច្ចប្រជុំ RBC រវាងយោធភូមិភាគទី៥ របស់​កម្ពុជា​ និងយោធភូមិភាទី១ របស់​ថៃ កាលពីថ្ងៃទី២២ ខែសីហា ឆ្នាំ២០២៥ នៅខេត្តស្រះកែវ ប្រទេសថៃ។

សម្រាប់កិច្ចប្រជុំខាងមុខនេះ កម្ពុជា រំពឹងថា នឹងទទួលបានលទ្ធផលជាវិជ្ជមានបន្ថែមទៀត។ អ្នកនាំពាក្យក្រសួងការពារជាតិ លើកឡើងថា ការវិវត្តជាវិជ្ជមានជាបន្តបន្ទាប់ទាំងនេះនឹងអនុញ្ញាតឱ្យភាគីទាំងពីរអាចជំរុញការអនុវត្តបទឈប់បាញ់កាន់តែមានប្រសិទ្ធភាពពេញលេញ ដោយនាំមកនូវសន្តិភាព ស្ថិរភាព និងស្ថានភាពប្រក្រតីវិលត្រលប់មកវិញបានឆាប់រហ័ស៕

ដោយ៖ ធឿន វ៉ាន់សុង