កម្ពុជាបញ្ជាក់ជាថ្មីថា ខ្លួនមិនបានប្រើ ឬដាក់មីនថ្មីតាមព្រំដែនឡើយ

ក្រសួងការពារជាតិកម្ពុជា តាមរយៈអ្នកនាំពាក្យរបស់ខ្លួន បានបញ្ជាក់សារជាថ្មីថា កម្ពុជាមិនបានប្រើប្រាស់ ឬដាក់មីនថ្មីឡើយ។ អ្នកនាំពាក្យ បញ្ជាក់ថា ជារដ្ឋភាគីនៃអនុសញ្ញាអូតាវ៉ា កម្ពុជានៅតែប្តេជ្ញាចិត្តយ៉ាងពេញលេញ និងគោរពតាមគោលការណ៍ស្តីពីការហាមប្រាមប្រើប្រាស់មីនប្រឆាំងមនុស្សនេះ។

ការបញ្ជាក់របស់កម្ពុជាបានធ្វើឡើងក្រោយមានឧប្បត្តិហេតុផ្ទុះមីនម្ដងទៀត កាលពីថ្ងៃទី២៧ ខែសីហា ដែលបណ្តាលឱ្យទាហានថៃរងរបួស។ ប៉ុន្តែចំពោះឧប្បត្តិហេតុ លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានលើកឡើងពីការក្រើនរំលឹកជាញឹកញាប់របស់កម្ពុជាទៅកាន់ថៃ ថា នៅតាមតំបន់ព្រំដែនក្នុងទឹកដីកម្ពុជា គឺនៅមានគ្រាប់មីន ឬសំណល់ជាតិផ្ទុះដែលបន្សល់ពីសម័យសង្គ្រាម។

កម្ពុជាទាមទារឱ្យភាគីថៃគោរពលក្ខខណ្ឌទាំងអស់ដែលមានចែងក្នុងកិច្ចព្រមព្រៀងឈប់បាញ់ ក៏ដូចជាស្មារតីនៃកិច្ចព្រមព្រៀងក្នុងកិច្ចប្រជុំវិសាមញ្ញ GBC កន្លងមក ដោយភាគីកម្ពុជា-ថៃ បានយល់ព្រមរក្សាទីតាំងឈរជើងរបស់កងទ័ពឱ្យនៅទីតាំងដដែល ដោយមិនត្រូវរំកិលទៅមុខទៀតឡើយ រាប់ចាប់ពីបទឈប់បាញ់បានចូលជាធរមានតាំងពីម៉ោង១២យប់នៅថ្ងៃទី២៨ ខែកក្កដា ឆ្នាំ ២០២៥ ពិសេសនោះគឺមិន​ត្រូវ​ចល័ត​ទ័ព រួម​ទាំង​ការ​ល្បាត​ទៅ​កាន់​ទីតាំង​ភាគី​ម្ខាង​ទៀត​ឡើយ។ លោកស្រី ម៉ាលី សុជាតា គូសបញ្ជាក់ដូច្នេះ។

ក្នុង​ន័យ​នេះ អ្នកនាំពាក្យក្រសួងការពារជាតិកម្ពុជា បាន​ជំរុញ​ឱ្យភាគីថៃ​ប្រកាន់​ខ្ជាប់​នូវ​ស្មារតីខាងលើដែលបានឯកភាពគ្នាដោយភាគីទាំងពីរ ក្នុងនោះ ធ្វើយ៉ាងណាអនុវត្តយ៉ាងម៉ឺងម៉ាត់នូវកិច្ចព្រមព្រៀងឈប់បាញ់ ដែលសម្រេចបាននៅថ្ងៃទី២៨ ខែកក្កដា ឆ្នាំ២០២៥ និងគោលការណ៍ឯកភាព ១៣ ដែលត្រូវបានសម្រេចក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) នៅថ្ងៃទី៧ ខែសីហា ឆ្នាំ២០២៥ រួមទាំងស្មារតីឯកភាពគ្នា ដែលបានព្រមព្រៀងដោយភាគីទាំងពីរក្នុងកិច្ចប្រជុំវិសាមញ្ញរបស់ RBC នាពេលថ្មីៗនេះ ជាពិសេសកិច្ចប្រជុំវិសាមញ្ញ RBC រវាងយោធភូមិភាគទី៤ កម្ពុជា និងតំបន់កងទ័ពទី២ ថៃ៕