រដ្ឋមន្ត្រីក្រសួងអប់រំ ព្រមានថា “អ្នកដែលប្រព្រឹត្តល្មើសត្រៀមខ្លួនទៅ” ស្របពេលក្រសួងកំពុងស៊ើបអង្កេតករណីបែកធ្លាយវិញ្ញាសាបាក់ឌុប២០២៥

ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជននិងកីឡាបណ្ឌិតសភាចារ្យ ហង់ ជួនណារ៉ុន ព្រមានថា” អ្នកដែលប្រព្រឹត្តល្មើសត្រៀមខ្លួនទៅ”។ ឧបនាយករដ្ឋមន្ត្រី ហង់ ជួនណារ៉ុន ព្រមានបែបនេះ តាមរយ:ការប្រើគណនីហ្វេសប៊ុកផ្លូវការចូលទៅបញ្ចេញមតិ នៅក្នុងគណនីហ្វេសប៊ុកមួយដែលចែករំលែកព័ត៌មានដែល ក្រសួងអប់រំកំពុងស៊ើបអង្កេតករណីជជែកវែកញែកថា មានការបែកធ្លាយវិញ្ញាសាការប្រឡងបាក់ឌុបឆ្នាំ២០២៥។

ជាការកត់សម្គាល់ក្រោយការប្រឡងសញ្ញាបត្រមធ្យមសិក្សាទុតិយភូមិឬបាក់ឌុប សម័យប្រឡង២៨ -២៩ សីហា ឆ្នាំ២០២៥ បានបញ្ចប់ទៅ នៅល្ងាចថ្ងៃទី២៩ ខែសីហា នៅលើបណ្ដាញសង្គម មានការជជែកវែកញែកដ៏ក្ដៅគគុកថា វិញ្ញាសាគណិតវិទ្យា សម្រាប់ថ្នាក់វិទ្យាសាស្ត្រពិត ត្រូវបានបែកធ្លាយ និងត្រូវបានយកទៅបង្រៀនពីរបៀបដោះស្រាយលំហាត់នៅរាត្រីថ្ងៃទី២៨ ខែសីហា និងមានការជជែកវែកញែកទៀតថា មានការបែកធ្លាយវិញ្ញាសាផ្សេងៗទៀតដូចជាជីវវិទ្យា គីមីវិទ្យា និងរូបវិទ្យាជាដើម។

យ៉ាងណាក៏ដោយក្រោយពីមានការជជែកវែកញែកដ៏ក្ដៅគគុកកាត់យប់បែបនេះ, នៅព្រឹកថ្ងៃទី៣០ ខែសីហា អ្នកនាំពាក្យក្រសួងអប់រំ យុវជន និងកីឡា លោកស្រី ឃួន វិច្ឆិកា បានអះអាងថា មិនមានការបែកធ្លាយវិញ្ញាសាទេ អំឡុងពេលប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបនេះទេ ប៉ុន្តែក្រសួងអប់រំ យុវជន និងកីឡា បាននិងកំពុងស្រាវជ្រាវយ៉ាងយកចិត្តទុកដាក់ជាទីបំផុត៕

ដោយ÷ ង៉ិល ណារ៉ាត់