ចិនគាំទ្របទឈប់បាញ់រវាងកម្ពុជា-ថៃ ដោយជំរុញឱ្យភាគីទាំងពីរឆាប់វិលទៅរកសន្តិភាព

ប្រធានសភាប្រឹក្សានយោបាយប្រជាជនចិន លោក វ៉ាង ហ៊ូនឹង (Wang Huning) បង្ហាញការគាំទ្រចំពោះបទឈប់បាញ់រវាងកម្លាំងយោធាកម្ពុជា និងថៃ ដោយលោកប្រធានសភាចិន បានជំរុញឱ្យប្រទេសកម្ពុជា និងថៃ ឆាប់វិលទៅរកប្រក្រតីភាពឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញរបស់ប្រធានសភាចិន គឺបានធ្វើឡើងក្នុងជំនួបពិភាក្សាការងារជាមួយនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត នាថ្ងៃទី៣១ ខែសីហា ឆ្នាំ២០២៥នេះ ក្នុងពេលដែលសម្តេចធិបតី កំពុងចូលរួមកិច្ចប្រជុំកំពូលអង្គការសហប្រតិបត្តិការងារសៀងហៃ បូក ដែលប្រារព្ធធ្វើឡើងនៅទីក្រុងធានជីន ប្រទេសចិន។

ក្នុងជំនួបសន្ទានានោះ ក្រៅពីពិភាក្សាអំពីចំណងទាក់ទង និងកិច្ចសហប្រតិបត្តិការទ្វេភាគីកម្ពុជា-ចិន សម្ដេចធិបតី ហ៊ុន ម៉ាណែត និងលោក វ៉ាង ហ៊ូនឹង ក៏បានជជែកពាក់ព័ន្ធ​ជម្លោះ​​ព្រំដែន​រវាងកម្ពុជា និងថៃ។

លោក វ៉ាង ហ៊ូនឹង ប្រធានសភាប្រឹក្សានយោបាយប្រជាជនចិន បានបញ្ជាក់អំពីការគាំទ្ររបស់ប្រទេសចិនដល់បទឈប់បាញ់រវាងកងទ័ពកម្ពុជានិងថៃ ក៏ដូចជាគាំទ្រដល់តួនាទីរបស់ប្រទេសម៉ាឡេស៊ីក្នុងការសម្របសម្រួលបទឈប់បាញ់ និងជំរុញឱ្យទំនាក់ទំនងរវាងប្រទេសកម្ពុជា និងប្រទេសថៃឆាប់វិលត្រឡប់ទៅរកប្រក្រតីភាពនាពេលឆាប់ៗខាងមុខ។

ជម្លោះព្រំដែនរវាងកម្ពុជានិងថៃនេះ សម្ដេចនាយករដ្ឋមន្ត្រី ហ៊ុន ម៉ាណែត ក៏បានស្នើឱ្យចិនជំរុញឱ្យភាគីទាំងពីរជៀសវាងការប្រើប្រាស់កម្លាំងយោធា ដើម្បីដោះស្រាយបញ្ហាព្រំដែន ដែលមិនទាន់ដាច់ស្រេច ជាពិសេសនៅតំបន់ដែលមានប្រជាពលរដ្ឋរស់នៅ។

តាមខ្លឹមសារលើបណ្ដាញសង្គមផ្លូវការរបស់សម្ដេចធិបតី បានលើកឡើងបន្ថែមថា៖ «សូមឱ្យដោះស្រាយបញ្ហាព្រំដែនដោយសន្តិវិធី តាមរយៈការប្រើប្រាស់យន្តការព្រំដែនដែលមានស្រាប់ គឺគណៈកម្មការចម្រុះព្រំដែនកម្ពុជា-ថៃ (JBC) ដោយផ្អែកលើមូលដ្ឋាននៃកិច្ចព្រមព្រៀងរវាងកម្ពុជានិងថៃដែលមានជាធរមាន សន្ធិសញ្ញាពាក់ព័ន្ធ និងច្បាប់អន្តរជាតិ»៕

ដោយ៖ ធឿន វ៉ាន់សុង