ព័ត៌មានជាតិ

រោងចក្រកែច្នៃផ្លែឈើតម្លៃប្រមាណ ២៧ លានដុល្លារ បោះទីតាំងវិនិយោគក្នុងខេត្តបាត់ដំបង

បានផុស

១០ ខែ មុន

នៅ

ថ្ងៃព្រហស្បតិ៍ ៤ កញ្ញា ២០២៥

ដោយ

រោងចក្រកែច្នៃផ្លែឈើដ៏ធំមួយទទូលបានការអនុញ្ញាតិពីក្រុមប្រឹក្សាអភិវឌ្ឍន៍កម្ពុជា ដើម្បីបោះទីតាំងវិនិយោគនៅស្រុករតនមណ្ឌលខេត្តបាត់ដំបង។

រោងចក្រនេះបោះទុនវិនិយោគប្រមាណ ២៧ លានដុល្លារ ដែលអាចបង្កើតការងារបានចំនួន ១ ១៦០ កន្លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបឯកសារ

បើតាមក្រុមប្រឹក្សាអភិវឌ្ឍន៍កម្ពុជា ក្នុងខែសីហាមានគម្រោងធំៗទទួលបានការអនុញ្ញាតិសម្រាប់ដំណើរការវិនិយោគក្នុងប្រទេសកម្ពុជា ក្នុងនោះមានគម្រោងវិនិយោគបង្កើតរោងចក្រកែច្នៃជ័រកៅស៊ូនៅស្រុកមេមត់ខេត្តត្បូងឃ្មុំ ដែលមានទុនវិនិយោគប្រមាណ ៨,៧ លានដុល្លារអាម៉េរិក គម្រោងវិនិយោគបង្កើតរោងចក្រផលិតដែកគ្រោងសំណង់គ្រប់ប្រភេទ នៅតំបន់សេដ្ឋកិច្ចពិសេស ឈីលូ ជាន ពុ ចាយ ស្ថិតនៅខេត្តស្វាយរៀង ដែលទំហំទុនវិនិយោគប្រមាណ ១៧ លានដុល្លារអាម៉េរិក គម្រោងវិនិយោគបង្កើតរោងចក្រផលិតទឹកស្អាត សម្អាតទឹក និងផ្គត់ផ្គង់អគ្គិសនី នៅតំបន់សេដ្ឋកិច្ចពិសេស ខេមបូឌាន ចេជាង ហ្គ័រជី ស្ថិតនៅខេត្តព្រះសីហនុ ដែលមានទំហំទុនវិនិយោគប្រមាណ ១១ លានដុល្លារអាម៉េរិក គម្រោងវិនិយោគសាងសង់ និងអាជីវកម្មសណ្ឋាគារលំដាប់ផ្កាយ ៤ ចំនួន ១០០ បន្ទប់ នៅតំបន់សេដ្ឋកិច្ចពិសេស ស្វាយរៀង ហ្គីហ្គា រីសស៍ ស្ថិតនៅខេត្តស្វាយរៀងដែលមានទំហំទុនវិនិយោគប្រមាណ ៨លានដុល្លារអាម៉េរិក។

ក្នុងខែសីហា ឆ្នាំ២០២៥ គណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជា បានសម្រេចចុះបញ្ជីគម្រោងវិនិយោគសរុបចំនួន ៥១ គម្រោង ក្នុងទំហំទុនវិនិយោគសរុបប្រមាណ ៦០៨ លានដុល្លារអាម៉េរិក ដែលអាចបង្កើតការងារបានប្រមាណ ២៧ ពាន់កន្លែង។

ក្នុងចំណោមគម្រោងវិនិយោគសរុប គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ៣៥ គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន ១៦ គម្រោង។

បើតាមគណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជា ក្នុងរយៈពេល ៨ ខែឆ្នាំ២០២៥ បានសម្រេចុះបញ្ជីគម្រោងវិនិយោគចំនួន ៤៩១ គម្រោង ក្នុងទំហំទុនវិនិយោគសរុបប្រមាណ ៧,២ ប៊ីលានដុល្លារអាម៉េរិក។ បើប្រៀបធៀបនឹងគម្រោងវិនិយោគដែលត្រូវបានចុះបញ្ជីក្នុងឆ្នាំ ២០២៤ ដែលមានត្រឹមតែ ៤១៤ គម្រោង ក្នុងរយៈពេល ៨ ខែ គណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជា បានចុះបញ្ជីគម្រោងវិនិយោគលើសការចុះបញ្ជីគម្រោងវិនិយោគពេញមួយឆ្នាំ២០២៤ រហូតដល់ ទៅ ៧៧ គម្រោង៕