ព័ត៌មានជាតិ

ពលរដ្ឋសម្ដែងក្ដីរីករាយក្នុងឱកាសបុណ្យភ្ជុំបិណ្ឌរាជរដ្ឋាភិបាលបញ្ចេញរថយន្តក្រុង ជិត ៦០០ គ្រឿង ត្រៀមដឹកជញ្ជូនដោយឥតគិតថ្លៃ

បានផុស

១០ ខែ មុន

នៅ

ថ្ងៃព្រហស្បតិ៍ ១១ កញ្ញា ២០២៥

ដោយ

ប្រជាពលរដ្ឋ បានសម្ដែងក្ដីសប្បាយរីករាយក្នុងឱកាសបុណ្យភ្ជុំបិណ្ឌ ខណៈរាជរដ្ឋាភិបាលបញ្ចេញរថយន្តក្រុងជិត ៦០០ គ្រឿង ត្រៀមដឹកជញ្ជូនអ្នកទៅលេងស្រុកកំណើតដោយឥតគិតថ្លៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្ដែងក្ដីសប្បាយរីករាយនេះ ខណៈ រដ្ឋបាលរាជធានីភ្នំពេញ បានត្រៀមរៀបចំរថយន្តក្រុងជិត ៦០០ គ្រឿង សម្រាប់បម្រើសេវាដឹកជញ្ជូនប្រជាពលរដ្ឋក្នុងរាជធានីភ្នំពេញប្រចាំថ្ងៃ និងសម្រាប់ដឹកជញ្ជូនអ្នកទៅលេងស្រុកកំណើតក្នុងរយៈពេល ០៦ ថ្ងៃ ដោយឥតគិតថ្លៃ នាឱកាសបុណ្យភ្ជុំបិណ្ឌ។

លោក សៅ ពិសិដ្ឋ ជាប្រជាពលរដ្ឋនៅខេត្តកំពត មកបម្រើការងារនៅរាជធានីភ្នំពេញ បានសម្ដែងក្ដីរីករាយយ៉ាងក្រៃលែង និងលើកឡើងថា ជារៀងរាល់ឆ្នាំ ក្នុងឱកាសបុណ្យភ្ជុំបិណ្ឌ និងចូលឆ្នាំ លោក តែងតែធ្វើដំណើរតាមរយៈរថយន្តក្រុងរបស់សាលារាជធានីភ្នំពេញ ព្រោះមានផាសុកភាព ជាពិសេសនោះកាត់បន្ថយការចំណាយប្រាក់បានច្រើនសមល្មមសម្រាប់ធ្វើបុណ្យនៅស្រុកកំណើតផងដែរ។

លោកបានបន្តទៀតថា ប្រទេសជាតិមានសុខសន្តិភាព ក្រោមការដឹកនាំដ៏ឈ្លាសវៃរបស់ សម្តេចតេជោ ហ៊ុន សែន បន្តមកដល់ សម្ដេចមហាបវរធិបតី ហ៊ុន ម៉ាណែត មានការគិតគូរជាប្រយោជន៍ដល់ប្រជាពលរដ្ឋ និង ប្រទេសជាតិមានការអភិវឌ្ឍ។

គួរជម្រាបថា នាព្រឹកថ្ងៃទី ១១ ខែកញ្ញា ឆ្នាំ ២០២៥ នេះ តាមរយៈបណ្ដាញសង្គមហ្វេសប៊ុក និងឆាណែលតេលេក្រាម សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានប្រកាសថា «ដូចដែលបានរៀបចំជាច្រើនឆ្នាំកន្លងមក ដើម្បីជួយសម្រាលបន្ទុកចំណាយរបស់បងប្អូនប្រជាពលរដ្ឋ ក្នុងការធ្វើដំណើរទៅលេងស្រុកកំណើតក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ បានផ្តល់គោលការណ៍ជូនរដ្ឋបាលរាជធានីភ្នំពេញរៀបចំនូវរថយន្តក្រុងសម្រាប់ដឹកជញ្ជូនបងប្អូនប្រជាពលរដ្ឋធ្វើដំណើរទៅលេងស្រុកកំណើតដោយឥតគិតថ្លៃ ចំនួន ០៦ ថ្ងៃ ដោយគិតចាប់ពីថ្ងៃទី ២០ ដល់ថ្ងៃទី ២៥ ខែកញ្ញា ឆ្នាំ ២០២៥ នេះ»៕

អត្ថបទ ៖ សុភា