ផ្ដើមធ្វើត្រីងៀតលក្ខណៈគ្រួសារ អ៊ីពៅ ក្លាយជាសិប្បកម្មទំនើប រកចំណូលបានជាង១ម៉ឺនដុល្លារក្នុងមួយខែ

គម្រោង CAPFISH-Capture បានជួយជំរុញឱ្យលោកស្រី ទូច ពៅ ក្លាយជាម្ចាស់សិប្បកម្មកែច្នៃត្រីបែបទំនើប ដែលអាចរកចំណូលប្រមាណជាង ១ម៉ឺនដុល្លារក្នុងមួយខែ តាមរយៈផលិតផលត្រីងៀត ប្រហុក និងផ្អក។ ខណៈផលិតផលទាំងនេះ ក៏បានចាប់យកទីផ្សារនាំចេញទៅបរទេស។

​

ក្រៅពីទីផ្សារក្នុងស្រុក លោកស្រី ទូច ពៅ លើកឡើងថា សិប្បកម្ម​កែច្នៃ​ត្រីងៀត និងផលិតផលផ្អាបរបស់លោកស្រី បាននាំទៅលក់នៅបណ្ដាប្រទេសធំៗមួយចំនួន ដូចជា ទីផ្សារនៅប្រទេសអាមេរិក អូស្ត្រាលី កាណាដា និងបារាំង ដោយ​នាំ​ទៅកាន់ប្រទេសទាំង៤នេះ ក្នុងមួយឆ្នាំៗរាប់សិបតោន។

ផលិតផលត្រីងៀតនិងផលិតផលផ្អាប់របស់សិប្បកម្ម អ៊ីពៅ បានកែច្នៃពីត្រីប្រា ត្រីរស់ ត្រីឆ្ពោះ និងត្រីកំភ្លាញជាដើមដែលបង្កើតឡើងប្រមាណជាង៣០ឆ្នាំមកហើយ តាំងពីឆ្នាំ១៩៩២ ដោយដំបូងឡើយជាលក្ខណៈគ្រួសារ ហើយរកចំណូលបានទាបបំផុត។ តាមការរៀបរាប់របស់លោកស្រី ទូច ពៅ ពីមុនលោកស្រីជាអ្នកលក់ត្រីងៀតតូចតាច តែពេលនេះបានក្លាយជាសិប្បកម្មដែលកំពុងឈានដល់ការកែច្នៃផលិតផលជលផលទំនើប ក្រោមជំនួយគាំទ្រ ទាំងហិរញ្ញវត្ថុ និងបច្ចេកទេស តាមរយៈគម្រោងអភិវឌ្ឍន៍ជលផលក្រោយប្រមូលផល (CAPFISH-Capture) រួមទាំងការគាំទ្រពីក្រសួងកសិកម្ម រុក្ខាប្រមាញ់ និងនេសាទ។

លោកស្រីម្ចាស់សិប្បកម្ម បន្តនិយាយថា បច្ចុប្បន្នផលិតផលរបស់សិប្បកម្ម​ គឺកំពុងទទួលបានគាំទ្រខ្លាំងពីអតិថិជន ទាំងក្នុងស្រុក និងក្រៅប្រទេស។ គាំទ្រខ្លាំង ក៏ព្រោះថា ផលិតផលរបស់លោកស្រី ធានាបានទាំងគុណភាព សុវត្ថិភាពចំណីអាហារ និងអនាម័យ ស្របតាមស្ដង់ដារវិញ្ញាបនបត្របញ្ជាក់និមិត្តសញ្ញាគុណភាពផលិតផលជលផលកម្ពុជា (CQS) របស់រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ។

គួរជម្រាបថា គម្រោង CAPFISH-Capture ដែលអនុវត្តដោយរដ្ឋបាលជលផល និងអង្គការ UNIDO ហើយផ្ដល់ជំនួយគាំទ្រពីសហភាពអឺរ៉ុប បានចូលរួមចំណែកផ្ដល់នូវជំនួយគាំទ្រទាំងហិរញ្ញវត្ថុ និងទាំងបច្ចេកទេសដល់សហគ្រាសដែលផលិត និងកែច្នៃផលជលផលកម្ពុជា ក្នុងការពង្រឹងសមត្ថភាពសហគ្រាស ជាពិសេសការបង្កើនផលិតភាព លើកកម្ពស់ស្ដង់ដាសុវត្ថិភាពចំណីអាហារ និងគុណភាពផលិតផល ដើម្បីត្រៀមចាប់យកទីផ្សារប្រកួតប្រជែង ទាំងក្នុងស្រុក និងក្រៅស្រុក៕

ដោយ៖ ធឿន វ៉ាន់សុង