ប្រមុខការទូតចិន រំពឹងថា កម្ពុជា-ថៃ នឹងចាប់យកឱកាសពន្លឿនដំណើរការផ្សះផ្សាជម្លោះព្រំដែន

រដ្ឋមន្ត្រីការបរទេសចិន លោក វ៉ាង យី ដាក់ក្ដីរំពឹងថា កម្ពុជា-ថៃ នឹងចាប់យកឱកាសពន្លឿនការដោះស្រាយបញ្ហាជម្លោះព្រំដែន និងអះអាងថា ចិនបានត្រៀមខ្លួនជាស្រេច ក្នុងការផ្ដល់ជំនួយស្របតាមការស្នើសុំរបស់ភាគីទាំងពីរ។ រដ្ឋមន្ត្រីក្រសួងការបរទេសចិន សម្ដែងសង្ឃឹមបែបនេះ  នៅក្នុងជំនួបជាមួយឧបនាយករដ្ឋមន្ត្រី ស៊ុន ចាន់ថុល អនុប្រធានក្រុមប្រឹក្សាកម្ពុជា នៅទីក្រុងប៉េកាំង ប្រទេសចិនកាលពីថ្ងៃទី១៦ ខែកញ្ញា។

ឯកអគ្គរដ្ឋទូតចិនប្រចាំកម្ពុជា លោក វ៉ាង វិនពីន បានផ្សព្វផ្សាយលទ្ធផលនៃជំនួបរវាងលោក វ៉ាង​ យី និង លោក ស៊ុន ចាន់ថុល នៅលើទំព័រហ្វេសប៊ុកផ្លូវការដូច្នេះ៖«ភាគីចិនបានឃាត់និងជំរុញឱ្យមានពិភាក្សាយ៉ាងសកម្ម ចាប់តាំងពីជម្លោះបានកើតឡើង។ កម្ពុជានិងថៃ គឺជាអ្នកជិតខាងល្អ ហើយមិនមានឧបសគ្គ ឬបញ្ហាណាដែលមិនអាចដោះស្រាយបានរវាងប្រទេសទាំងពីរទេ។ យើងសង្ឃឹមថាភាគីទាំងពីរនឹងចាប់យកឱកាសនេះ ដើម្បីពន្លឿនដំណើរការផ្សះផ្សា។ បេសកជនពិសេសរបស់ភាគីចិនកំពុងបំពេញបេសកកម្មសម្របសម្រួលលើកទី៣ ហើយរីករាយក្នុងការផ្តល់ជំនួយយ៉ាងសកម្មស្របតាមការចង់បានរបស់ភាគីទាំងពីរ។»។

ជាការឆ្លើយតប ឧបនាយករដ្ឋមន្ត្រី ស៊ុន ចាន់ថុល បានថ្លែងអំណរគុណចំពោះប្រទេសចិនចំពោះតួនាទីដ៏សំខាន់ដែលខ្លួនកំពុងដើរតួក្នុងបញ្ហានេះ ហើយបានបង្ហាញពីឆន្ទៈរបស់កម្ពុជាក្នុងការដោះស្រាយជម្លោះជាមួយប្រទេសថៃតាមរយៈការសន្ទនា និងការចរចាឱ្យបានឆាប់តាមដែលអាចធ្វើទៅបាន។ នេះបើតាមការផ្សព្វផ្សាយរបស់ទីភ្នាក់ងារព័ត៌មាន Xinhua។​

Xinhua ក៏បានរាយការណ៍ថា លោក វ៉ាង យី អះអាងចំពោះមុខ លោក ស៊ុន ចាន់ថុល ថា ចិន-កម្ពុជា តែងតែគាំទ្រគ្នាទៅវិញទៅមកយ៉ាងម៉ឺងម៉ាត់លើបញ្ហាទាក់ទងនឹងផលប្រយោជន៍ស្នូលរៀងៗខ្លួន ដោយបន្ថែមថា ទាំងប្រទេសចិន និងកម្ពុជាប្រឆាំងទៅនឹងការគំរាមកំហែងជាឯកតោភាគីពីបណ្ដាប្រទេសមួយចំនួន និងការបង្ខិតបង្ខំពីពន្ធគយ។

សូមរម្លឹកថា ជម្លោះប្រដាប់អាវុធតាមព្រំដែនកម្ពុជា-ថៃ ផ្ទុះឡើងនៅវេលាព្រឹកថ្ងៃទី២៤ ខែកក្កដា ឆ្នាំ២០២៥។ ជុំវិញបញ្ហានេះ ប្រទេសចិនតែងបង្ហាញជំហរជាផ្លូវការ ដោយជំរុញឲ្យប្រទេសទាំងពីរដោះស្រាយតាមរយៈកិច្ចសន្ទនានិងការពិភាក្សាប្រកបដោយមិត្តភាព។

ចិនក៏បានផ្ដល់ជំនួយម​​នុស្សធម៌ជាបន្ទាន់ ដើម្បីជួយពលរដ្ឋរងគ្រោះព្រោះជម្លោះព្រំដែនបង្កឡើងដោយភាគីថៃ ប្រមាណ៣លានដុល្លារផងដែរ៕

ដោយ៖ ង៉ិល ណារ៉ាត់