អាជ្ញាធរបញ្ជូនឱ្យវៀតណាមនូវជនជាតិរបស់ខ្លួន២៧នាក់ដែលធ្វើការខុសច្បាប់នៅកម្ពុជា

អាជ្ញាធរកម្ពុជាបន្តបញ្ជូនឱ្យវៀតណាមវិញនូវជនជាតិរបស់ខ្លួនចំនួន២៧នាក់ទៀត មានស្រីចំនួន១០នាក់ ដែលបានលួចឆ្លងដែន និងធ្វើការដោយខុសច្បាប់នៅក្នុងប្រទេសកម្ពុជា។

តាមអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ជនជាតិវៀតណាមទាំងនេះ ត្រូវបានអនុវត្តនីតិវិធីបណ្ដេញចេញតាមច្រកទ្វារព្រំដែនអន្តរជាតិត្រពាំងផ្លុង ខេត្តត្បូងឃ្មុំ កាលពីថ្ងៃទី២៥ ខែកញ្ញា ឆ្នាំ២០២៥។

ការអនុវត្តនីតិវិធីបណ្ដេញចេញនេះ អគ្គនាយកដ្ឋានអន្តោប្រវេសន៍ បញ្ជាក់ថា គឺពាក់ព័ន្ធនឹងករណីលួចស្នាក់នៅធ្វើការងារខុសច្បាប់ ករណីលួចឆ្លងដែនខុសច្បាប់ (គ្មានលិខិតឆ្លងដែន) រួមទាំងករណីរក្សាទុក និងប្រើប្រាស់ដោយខុសច្បាប់នូវសារធាតុញៀន (អនុវត្តទោសចប់) និងករណីសញ្ចារកម្ម (អនុវត្តទោសចប់)។

ជនជាតិវៀតណាមទាំង២៧នាក់ខាងលើ គឺនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ទទួលបានពីស្នងការដ្ឋាននគរបាលខេត្តឧត្តរមានជ័យ បាត់ដំបង សៀមរាប និងខេត្តបន្ទាយមានជ័យ៕