ខេត្តកំពង់ធំ ប្រកាស​ផ្លាស់ប្តូរ​តំណែងប្រធានសាខាពន្ធដារថ្មី​ ​

ក្នុង​ឱកាស​ចូលរួម​ប្រកាស​ផ្លាស់ប្តូរ​តំណែងប្រធានសាខាពន្ធដារថ្មី​ខេត្តកំពង់ធំ លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកនៃអគ្គនាយកដ្ឋានពន្ធដារបាន​ជំរុញ​​ឲ្យ​លោក ប៉ូ ពិសិដ្ឋ ដែល​ត្រូវ​ចូលកាន់​មុខតំណែងប្រធានសាខាពន្ធដារខេត្តកំពង់ធំ ​ខិតខំប្រមូលពន្ធ​​ឲ្យទទួលជោគជ័យបន្ថែមទៀត។

លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និង​ជាប្រតិភូរាជរដ្ឋាភិបាលទទួលបន្ទុកនៃអគ្គនាយកដ្ឋានពន្ធដារ បាន​ថ្លែង​ថា ដើម្បីឱ្យការប្រមូលពន្ធដារទទួលបានភាពជោគជ័យ ក្នុងនាមពន្ធដារខេត្តត្រូវផ្សព្វផ្សាយច្បាប់ និងបទប្បញ្ញត្តិស្តីពីពន្ធដារ អនុលោមតាមការកែទម្រង់ ការធ្វើទំនើបកម្មរបស់អគ្គនាយកដ្ឋានពន្ធដារ ជាពិសេសការផ្សព្វផ្សាយ និងការបណ្តុះ​បណ្តាលតាមប្រព័ន្ធអនឡាញ និងថ្នាលឌីជីថល និងត្រូវរៀបចំផែនការយុទ្ធសាស្ត្រ ផែនការសកម្មភាពដោយដាក់ចេញនូវសូចនាករ សំខាន់ៗក្នុងក្របខ័ណ្ឌខេត្តកំពង់ធំ សម្រាប់អនុវត្តការងារគ្រប់គ្រង ដឹកនាំការងារ ដើម្បីសម្រេចបាននូវ ផែនការរបស់ថ្នាក់ដឹកនាំប្រគល់ជូន។

បន្ថែមលោក បាន​ជំរុញលើកទឹកចិត្តដល់លោក ប៉ូ ពិសិដ្ឋ ដែល​ត្រូវ​ឡើង​កាន់តំណែង​ជា​ប្រធានសាខាពន្ធដារ​ខេត្តកំពង់ធំ ត្រូវ​សហការសាមគ្គីផ្ទៃក្នុងឱ្យបានល្អ ដើម្បីសម្រេចលទ្ធផលការងាររបស់អង្គភាព និងបង្កើនកិច្ចសហការ​ឱ្យបានល្អជាមួយអាជ្ញាធរគ្រប់ថ្នាក់ ដើម្បីសម្រេចគោលដៅក្នុងការអនុវត្តគោលនយោបាយប្រមូលចំណូលពន្ធនៅខេត្តកំពង់ធំឱ្យទទួលមានជោគជ័យ។

លោកថា ការបង្កើនទំនាក់ទំនងឱ្យបានជិតស្និទ្ធជាមួយអាជ្ញាធរដែនដីគ្រប់លំដាប់ថ្នាក់ មន្ទីរអង្គភាពជំនាញ ស្ថាប័នពាក់ព័ន្ធនានាក្នុងខេត្តគឺនឹងសំដៅដល់ការធារឱ្យបាននូវប្រសិទ្ធភាព នៃការងារគ្រប់គ្រងប្រមូលចំណូលពន្ធដារ បង្កើនចំណូល និងធនធានគ្រប់គ្រាន់ក្នុងការអភិវឌ្ឍមូលដ្ឋានខេត្ត។ ប្រាក់ចំណូលដែលកើតចេញពីការប្រមូលពន្ធដារ គឺនឹងជួយលើកកម្ពស់ជីវភាពរបស់ប្រជាពលរដ្ឋ ចូលរួមចំណែកអភិវឌ្ឍសេដ្ឋកិច្ច-សង្គមកម្ពុជា។

ក្នុងឱកាសនោះ លោក នួន ផារ័ត្ន អភិបាលខេត្តកំពង់ធំបាន​លើកឡើថា ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល បានយកចិត្តទុកដាក់ លើកទឹកចិត្តវិនិយោគក្នុងស្រុកនិងក្រៅស្រុក។ ក្នុងនោះខេត្តកំពុងបោះជំហាន​ដោយភាពជឿជាក់ វិវត្តខ្លួនយ៉ាងឆាប់រហ័សទៅជាមជ្ឈមណ្ឌលកសិកម្ម និងឧស្សាហកម្មទំទើប និងជាខេត្តមានសក្តានុពលទេសចរណ៍ផងដែរ។

ឈរលើមូលដ្ឋាននេះ លោក​ថា ខេត្តកំពង់ធំនឹងទាក់ទាញ អ្នកវិនិយោគនានាទាំងក្នុងស្រុកនិងក្រៅស្រុក មកកាន់ខេត្តដែលស្ថិតនៅចំណ្តាលប្រទេស ធ្វើឱ្យប្រជាពលរដ្ឋ នៅមួលដ្ឋានមានមុខរបរ បង្កើនប្រាក់ចំណូលសម្រាប់គ្រួសារកាន់តែប្រសើរ ដែលនេះនឹងជំរុញឱ្យការអនុវត្តការប្រមូលពន្ធដារក្នុងខេត្តកំពង់ធំកាន់តែរីកចម្រើនមួយកម្រិតថែមទៀត។

អត្ថបទ៖ ឈាង មករា