នយោបាយ

ប្រធានាធិបតីបារាំងសរសេរលើបណ្ដាញសង្គម X ជាភាសាខ្មែរ បញ្ជាក់ពីទំនាក់ទំនងកាន់តែរឹងមាំជាមួយកម្ពុជា

បានផុស

២ ខែ មុន

នៅ

ថ្ងៃព្រហស្បតិ៍ ៩ មេសា ២០២៦

ដោយ

ប្រធានាធិបតីបារាំងលោក អេម៉ានុអែល ម៉ាក្រុង (Emmanuel Macron) បានសរសេរលើបណ្ដាញសង្គម X របស់លោកថ្លែងអំណរគុណនាយករដ្ឋមន្ត្រីកម្ពុជាជាភាសាខ្មែរ និងបានបញ្ជាក់ពីចំណងទំនាក់ទំនងដែលកាន់តែរឹងមាំរវាងបារាំង និងកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានសរសេរកាលពីយប់មិញម៉ោងនៅកម្ពុជាជាភាសាខ្មែរថា៖ «សូមអរគុណលោកនាយករដ្ឋមន្ត្រីកម្ពុជា ហ៊ុន ម៉ាណែត សម្រាប់ការចូលរួមក្នុងកិច្ចប្រជុំកំពូល One Health កាលពីម្សិលមិញនៅទីក្រុងល្យុង និងសម្រាប់ការពិភាក្សារបស់យើងនៅថ្ងៃនេះនៅទីក្រុងប៉ារីស។ រវាងកម្ពុជា និងបារាំង ប្រវត្តិសាស្ត្ររបស់យើងមានជម្រៅយ៉ាងខ្លាំង ហើយកាន់តែរឹងមាំឡើងនៅក្នុងវិស័យថាមពល សុខាភិបាល និងបេតិកភណ្ឌ»។

លោកម៉ាក្រុង បានបញ្ជាក់ថាលោកនឹងធ្វើដំណើរមកកម្ពុជាក្នុងខែវិច្ឆិកា ឆ្នាំ២០២៦ខាងមុខនេះ ដែលជាឱកាសបន្ថែមមួយទៀត ដើម្បីពង្រឹងទំនាក់ទំនងដែលភ្ជាប់ កម្ពុជា-បារាំង ឱ្យកាន់តែខ្លាំងឡើង។

គួរឱ្យដឹងផងដែរថានាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានដឹកនាំគណៈប្រតិភូរាជរដ្ឋាភិបាលកម្ពុជាទៅចូលរួមកិច្ចប្រជុំកំពូលស្ដីពីសុខភាពតែមួយ (One Health Summit) នៅទីក្រុងលីយ៉ុង និងទស្សនកិច្ចការងារ នៅទីក្រុងប៉ារីសប្រទេសបារាំងពីថ្ងៃទី៦ ដល់ថ្ងៃទី៩ ខែមេសា ឆ្នាំ២០២០៦នេះ។

កាលពីថ្ងៃទី៨ ខែមេសា ម្សិលមិញនាយករដ្ឋមន្ត្រីកម្ពុជាក៏មានជំនួបផ្លូវការជាមួយប្រធានាធិបតីបារាំងលោក ម៉ាក្រុង នៅវិមានអេលីហ្ស៊េផងដែរ។ យ៉ាងណាក្ដីខ្លឹមសារនៃជំនួបនេះនៅមិនទាន់បានដឹងនៅឡើយទេ។

ទំនាក់ទំនងកម្ពុជាបារាំងគឺចាប់ផ្ដើមមានប្រវត្តិទាក់ទងគ្នាខ្លាំងចាប់តាំងពីឆ្នាំ១៨៦៣ ពេលដែលកម្ពុជាទទួលយកអាណាព្យាបាលបារាំង មុននឹងប្រគល់ឯករាជ្យមកវិញនៅឆ្នាំ១៩៥៣។ បារាំងក៏ជាអ្នកផ្ដល់ជំនួយដល់កម្ពុជាលើការងារជាច្រើនជាពិសេសការអប់រំ និងកិច្ចការអភិរក្សវប្បធម៌ ប្រទេសនេះក៏ជាតួអង្គសំខាន់នាំយកសន្ដិភាពដល់កម្ពុជាវិញផងដែរ។

គួរជម្រាបផងដែរថា កម្ពុជាគឺជារដ្ឋសមាជិកនៃក្រុមប្រទេសនិយាយភាសាបារាំង អង្គការអន្តរជាតិហ្វ្រង់កូហ្វូនី (OIF)នឹងធ្វើជាម្ចាស់ផ្ទះនៃកិច្ចប្រជុំក្រុមប្រទេសទាំងនេះនៅចុងឆ្នាំ២០២៦៕