នយោបាយ

មេធាវីបដិសេធលោក កឹម សុខា នៅពីក្រោយខ្នងការបង្កើត “គណបក្សបេះដូងជាតិ”

បានផុស

៥ years មុន

នៅ

ថ្ងៃអង្គារ ២៩ មិថុនា ២០២១

ដោយ

លោក ចាន់ ចេន សហមេធាវីការពារក្តីឲ្យលោក កឹម សុខា បានចេញមុខបដិសេធនារសៀល ថ្ងៃទី២៩ ខែមិថុនា នេះថា លោក កឹម សុខា មិនបាននៅពីក្រោយ នៃការបង្កើត “គណបក្សបេះដូងជាតិ” នោះទេ ហើយលោក កឹម សុខា ក៏មិន បានគាំទ្រក្រុមណាមួយឲ្យបង្កើតបក្សថ្មី នោះដែរ ហើយបានអំពាវនាវឲ្យប្រជា ពលរដ្ឋនៅមូលដ្ឋាន តាមបណ្តាខេត្តនានា កុំចាញ់បោកអ្នកទាំងនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ចាន់ ចេន បានបញ្ជាក់ថា នៅអំឡុងពេលនេះ អ្នកដែលបង្កើតបក្សថ្មី មួយឈ្មោះ “គណបក្សបេះដូងជាតិ” ពួកគេបានទៅដល់ខេត្តកំពង់ចាម ខេត្តត្បូងឃ្មុំ បន្ទាយមានជ័យ និងខេត្តមួយចំនួនទៀត។ ដើម្បីសម្រេចបានមហិច្ឆតារបស់ក្រុមខ្លួន ពួកគេបាននិយាយបញ្ចុះបញ្ចូលអ្នកគាំទ្រអតីតសង្គ្រោះជាតិថា គណបក្សរបស់ក្រុមខ្លួន គឺលោក កឹម សុខា ជាអ្នកឲ្យបង្កើត ហើយលោក កឹម សុខា នៅពីក្រោយខ្នង ហើយលោក កឹម សុខា ក៏ជាអ្នកបើកភ្លើងខៀវឲ្យបង្កើតផងដែរ។

លោក ចាន់ ចេន បញ្ជាក់ថា “ដើម្បីកុំឲ្យអ្នកគាំទ្រ និងប្រជាពលរដ្ឋខ្មែរមានការភាន់ច្រឡំ ចាញ់បោកការអូសទាញរបស់អស់លោកទាំងអស់នោះ ខ្ញុំសូមបញ្ជាក់សាជាថ្មីថា ឯកឧត្តម កឹម សុខា តាមរយៈមេធាវីនាពេលកន្លងមក បានចេញសេចក្តីថ្លែងការ ហើយបានផ្សាយជាសាធារណៈជាច្រើនលើក ច្រើនសារមកហើយថា ឯកឧត្តម កឹម សុខា មិនគាំទ្រក្រុមណា មួយឲ្យបង្កើតបក្សថ្មី ហើយក៏មិនដែលនៅពីក្រោយខ្នងក្រុមណាមួយដែរ ហើយពេលនេះក៏ដូចគ្នាដែរ”។

ដូច្នេះ “បងប្អូនយើងនៅមូលដ្ឋានតាមបណ្តាខេត្តនានា ក្នុងប្រទេសកម្ពុជាទាំង មូល កុំចាញ់បោកអស់លោកទាំងនោះឲ្យសោះ ព្រោះវាមិនមែនជាការពិតនោះទេ សូមអស់លោកឈប់ប្រើស្នៀតរបៀបនេះតទៅទៀតទៅ ព្រោះអ្នកគាំទ្រ ក៏ដូច ជាប្រជាពលរដ្ឋខ្មែរ បានដឹងអស់ហើយ”។

សូមបញ្ជាក់ថា ថ្មីៗនេះ ក្រសួងមហាផ្ទៃបានអនុញ្ញាតឲ្យបង្កើតគណបក្សថ្មីមួយទៀត ដែលមានឈ្មោះថា “គណបក្សបេះដូងជាតិ” ហើយទាក់ទងការបង្កើតគណបក្សថ្មីនេះ មានប្រភពមួយចចំនួនបានបង្ហើបថា គណបក្សបេះដូងជាតិនេះ រួមគ្នាបង្កើតឡើងដោយលោក ថាច់ សេដ្ឋា អតីតមន្ត្រីជាន់ខ្ពស់ នៃអតីតគណបក្សសង្គ្រោះជាតិ និងជាប្រធានសហគមន៍ខ្មែរកម្ពុជាក្រោម ដែលទើបទទួលបានសម្បទា ធ្វើនយោបាយឡើងវិញកាលពីថ្មីៗនេះ៕

ដោយ ៖ កោះកែវ