Connect with us

នយោបាយ

ប្រធាន គ.ជ.ប ​ឆ្លើយតបចម្ងល់ ៥ចំណុច របស់អ្នករាយការណ៍ពិសេស ទាក់ទងនឹងការបោះឆ្នោតនៅកម្ពុជា

បានផុស

នៅ

ការ​ឆ្លើយតបនេះ បានធ្វើឡើងនៅក្នុង​ជំនួប​ពិភាក្សា រវាងលោក ប្រាជ្ញ ចន្ទ ប្រធានគណៈ​កម្មាធិការជាតិរៀបចំការបោះ ឆ្នោត (គ.ជ.ប)​ ​ជាមួយលោក វិទិត មុនតាប៊ន (Mr. Vitit Muntarbhorn) អ្នករាយការណ៍ពិសេស ទទួលបន្ទុកស្ថានភាពសិទ្ធិមនុស្សនៅកម្ពុជា កាលពី​រសៀលថ្ងៃព្រហស្បតិ៍ទី ១០ ខែមីនា ឆ្នាំ ២០២២​ តាមប្រព័ន្ធវីដេអូអនឡាញ។

លទ្ធផលនៃជំនួប​ដែល គ.ជ.ប​ ទើបផ្សព្វផ្សាយ​នារសៀល​ថ្ងៃទី ១១ ខែមីនានេះ បានឲ្យដឹងថា ​នៅក្នុង​ជំនួបនោះ លោក Vitit Muntarbhorn​ បានស្នើសុំការបកស្រាយពីភាគី គ.ជ.ប ទៅលើបញ្ហាចំនួន ៥ ចំណុចរួមមាន៖​ គោលការណ៍តម្លាភាព ដែលធានាឱ្យការបោះឆ្នោតអាចទទួលយកបាន ពីគ្រប់ភាគីពាក់ព័ន្ធ, ការប្រើប្រាស់ប្រព័ន្ធអេឡិចត្រូនិក ក្នុងដំណើរការរៀបចំការបោះឆ្នោត, ការចូលរួមរបស់អ្នកសង្កេតការណ៍ជាតិ និងអន្តរជាតិក្នុងដំណើរការរៀបចំការបោះឆ្នោត, ការទទួល និងដោះស្រាយបណ្ដឹងដោយតម្លាភាព និង​ការបង្កើតការិយាល័យបោះឆ្នោតនៅ​ក្រៅប្រទេស ដើម្បីអនុញ្ញាត ឱ្យប្រជាពលរដ្ឋខ្មែរដែលកំពុងរស់នៅ និងធ្វើការនៅទីនោះបានបោះឆ្នោត។

ជាការឆ្លើយតប ​លោក ប្រាជ្ញ ចន្ទ ​បានលើកឡើងថា​ ​ស្ថាប័ន គ.ជ.ប ត្រូវបំពេញបេសកកម្មរបស់ខ្លួនដោយគោរព និងអនុវត្តតាមរដ្ឋធម្មនុញ្ញ​ច្បាប់ ស្ដីពី ការរៀបចំ និងការប្រព្រឹត្តទៅ នៃគណៈកម្មាធិការជាតិរៀបចំការបោះឆ្នោតច្បាប់ ស្ដីពី ការបោះ​ឆ្នោតជ្រើសតាំងតំណាងរាស្ត្រ បទបញ្ជា និងនីតិវិធីសម្រាប់ការបោះឆ្នោត និងបទបញ្ជាផ្ទៃក្នុងរបស់ គ.ជ.ប។

គ្រប់ភាគីពាក់ព័ន្ធ ដែលរួមមានគណបក្សនយោបាយ សមាគម អង្គការមិនមែនរដ្ឋាភិបាល និងអង្គភាពសារព័ត៌មាន ត្រូវបានលើកទឹកចិត្តឱ្យចូលរួម ក្នុងដំណើរការរៀបចំការបោះឆ្នោតដូចជា​ ការចូលរួមផ្ដល់យោបល់ ឬអនុសាសន៍លើសេចក្ដីព្រាងបទបញ្ជា និងនីតិវិធី សម្រាប់ការបោះឆ្នោត, ការដាក់​ភ្នាក់ងារគណបក្សនយោបាយ អ្នកសង្កេតការណ៍បោះឆ្នោត ​និងអ្នកសារព័ត៌មាន ដើម្បីចូលរួមតាមដាន និងសង្កេតមើលដំណើរការរៀបចំការបោះឆ្នោត​ និងការពង្រឹងការងារអប់រំ និងបណ្ដុះបណ្ដាលធនធានមនុស្ស ការផ្សព្វផ្សាយព័ត៌មានអំពីការបោះឆ្នោត។

ទាក់ទង​ការប្រើប្រព័ន្ធអេឡិចត្រូនិក ក្នុងដំណើរការរៀបចំការបោះឆ្នោត លោក ប្រាជ្ញ ចន្ទ ​បាន​បញ្ជាក់ថា គ.ជ.ប នឹងដាក់ឱ្យដំណើរការនូវកម្មវិធីដូចជា៖ កម្មវិធីរៀបចំបញ្ជីបេក្ខជននៃគណបក្សនយោបាយឈរឈ្មោះបោះឆ្នោត និងកម្មវិធីត្រួតពិនិត្យ ផ្ទៀងផ្ទាត់លក្ខខណ្ឌរបស់បេក្ខ​ជន តាមប្រព័ន្ធកុំព្យូទ័រ, កម្មវិធីផ្ដល់​ឯក​សារបញ្ជាក់អត្តសញ្ញាណបម្រើឱ្យការបោះឆ្នោត និងកម្មវិធីត្រួតពិនិត្យ ផ្ទៀងផ្ទាត់ និងបូកសរុបលទ្ធផលនៃការបោះឆ្នោតតាមប្រព័ន្ធកុំព្យូទ័រ។

ទាក់ទងទៅនឹងតម្លាភាព នៃការដោះស្រាយបណ្ដឹង លោក ប្រាជ្ញ ចន្ទ ​បានបញ្ជាក់ថា ក្នុងដំណើរ​ការរៀបចំការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ គ.ជ.ប មានយន្តការទទួល និងដោះស្រាយលើពាក្យបណ្ដឹង ៣ថ្នាក់ គឺនៅថ្នាក់គណៈកម្មការឃុំ សង្កាត់រៀបចំការ​បោះឆ្នោត ថ្នាក់គណៈកម្មការរាជធានី ខេត្តរៀបចំការបោះឆ្នោត និងថ្នាក់គណៈ កម្មាធិការជាតិរៀបចំការបោះឆ្នោត។

លោកបញ្ជាក់ថា ច្បាប់​តម្រូវឱ្យ គ.ជ.ប រៀបចំការិយាល័យ​បោះឆ្នោតនៅតាមឃុំ សង្កាត់ ក្នុងដែនដី នៃព្រះរាជាណាចក្រកម្ពុជា ហើយ​ប្រជាពលរដ្ឋដែលមានឈ្មោះ​ក្នុងបញ្ជីបោះឆ្នោត នៃការិយាល័យបោះឆ្នោតក្នុងឃុំ-សង្កាត់ណា ត្រូវអញ្ជើញ​ទៅ​បោះឆ្នោត​ នៅការិយាល័យបោះឆ្នោតក្នុងឃុំ សង្កាត់នោះ។ គ.ជ.ប បានលើកទឹកចិត្តប្រជាពលរដ្ឋខ្មែរ ដែលធ្វើការនៅក្រៅប្រទេសឱ្យអញ្ជើញមកបោះឆ្នោត នៅក្នុងប្រទេសដោយធ្វើការផ្សព្វផ្សា​យ ​តាមរយៈស្ថានទូតនៃព្រះរាជាណាចក្រកម្ពុជា៕

អត្ថបទ៖ កោះកែវ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម