នយោបាយ
តើពលរដ្ឋអាចប្ដឹងជំទាស់ ទៅលើបេក្ខជនឈរឈ្មោះបោះឆ្នោត ដែលពុំមានលក្ខខណ្ឌគ្រប់គ្រាន់ដែរឬទេ?
មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា ប្រជាពលរដ្ឋអាចមានសិទ្ធិ ប្ដឹងជំទាស់ទៅលើបេក្ខជនឈរឈ្មោះបោះឆ្នោត ជ្រើសរើសក្រុមប្រឹក្សាឃុំ-សង្កាត់ ដែលពុំមានលក្ខខណ្ឌគ្រប់គ្រាន់ដើម្បីឈរឈ្មោះ ជាពិសេសបេក្ខជនដែលមិនចេះសរសេរ និងអានអក្សរខ្មែរ។
លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប មានប្រសាសន៍ប្រាប់កម្ពុជាថ្មី នៅថ្ងៃទី ១៥ ខែមីនានេះថា មកដល់ពេលនេះស្ទើរគ្រប់ឃុំ-សង្កាត់ទាំងអស់ នៅទូទាំងប្រទេសហើយ បាននិងកំពុងបិទផ្សាយ បញ្ជីបេក្ខជនឈរឈ្មោះបោះឆ្នោតដំបូង។ គោលបំណង នៃការបិទផ្សាយបញ្ជីដំបូងនេះ គឺដើម្បីឲ្យប្រជាពលរដ្ឋដាក់ពាក្យប្ដឹងតវ៉ា ទៅលើបេក្ខជនរូបណា ដែលពុំមានលក្ខខណ្ឌគ្រប់គ្រាន់ ដើម្បីឈរឈ្មោះជាបេក្ខជន។
លោកបន្តថា ចំនួនគណបក្ស ដែលបានចុះបញ្ជីបេក្ខជនឈរឈ្មោះបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិទី ៥ គឺនៅ ១៧គណបក្សដដែល។ ប៉ុន្តែមានបណ្ដឹងច្រើន ពាក់ព័ន្ធនឹងបេក្ខជនដែលមិនបានដឹងខ្លួនថា មានគណបក្សនយោបាយដាក់ឈ្មោះរបស់ខ្លួន ជាបេក្ខជនឈរឈ្មោះបោះឆ្នោត រហូតដល់ជាង ១៤០បណ្ដឹង។ ក្នុងនោះ ក៏មានបណ្ដឹងទាក់ទងនឹងការរំខាន របស់គណៈកម្មការឃុំ-សង្កាត់រៀបចំការបោះឆ្នោត ដែលបណ្ដឹងនេះអាចនាំទៅដល់ ការដាក់ទោសតាមជំពូកទី ១៤ នៃច្បាប់ ស្ដីពី ការបោះឆ្នោតជ្រើសរើសក្រុមប្រឹក្សាឃុំ-សង្កាត់។
អ្នកនាំពាក្យ គ.ជ.ប បានឲ្យដឹងបន្ថែមថា «ហើយក៏មានបណ្ដឹងមួយចំនួនទៀត ទាក់ទងទៅនឹងលិខិត ឬក៏ការបដិសេធមិនទទួលស្គាល់បេក្ខជន អញ្ចឹងយើងពិនិត្យទៅនៅតាមឃុំ-សង្កាត់ ១៦៥២ ឃុំ-សង្កាត់ហ្នឹងជារួម ប៉ុន្តែមិនមែនគ្រប់ឃុំ-សង្កាត់ទាំងអស់សុទ្ធតែមានបណ្ដឹងទេ ប៉ុន្តែពាក្យបណ្ដឹងសរុបទៅមានប្រមាណ ១៥២បណ្ដឹងហើយ…ហើយមកដល់ គ.ជ.ប គឺមាន ៥បណ្ដឹងហើយ ដែលទាក់ទងទៅនឹងការបិទផ្សាយបញ្ជីបេក្ខជនដំបូង»។
លោក សោម សូរីដា បានឲ្យដឹងដែរថា ប្រជាពលរដ្ឋអាចប្ដឹងជំទាស់ ទៅលើបេក្ខជនដែលពុំមានលក្ខខណ្ឌគ្រប់គ្រាន់ នៅក្នុងការឈរឈ្មោះជាបេក្ខជនបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិទី ៥នេះ។ លោកថា «ការបិទផ្សាយបញ្ជីបេក្ខជនដំបូងនេះ គឺដើម្បីឲ្យប្រជាពលរដ្ឋប្ដឹងជំទាស់ អំពីបេក្ខជនដែលពុំមានលក្ខខណ្ឌគ្រប់គ្រាន់ ដើម្បីឈរឈ្មោះជាបេក្ខជន ឧទាហរណ៍ថា ប្រជាពលរដ្ឋលោកដឹងថា បេក្ខជននៅក្នុងឃុំ-សង្កាត់របស់គាត់ ហើយក៏បានគណបក្សនយោ បាយ យកមកធ្វើជាបេក្ខជនឈរឈ្មោះ គាត់មិនចេះអាន មិនចេះសរសេរ អញ្ចឹងការមិនចេះអាន មិនចេះសរសេរ គឺជាលក្ខខណ្ឌមួយ ដែលតម្រូវដោយច្បាប់មាត្រា ៣៥ គឺបេក្ខជនត្រូវតែចេះអាន ចេះសរសេរ»។
ត្រង់ចំណុចនេះ អគ្គលេខាធិការរង គ.ជ.ប បានបញ្ជាក់ថា ប្រសិនបើបេក្ខជនឈរឈ្មោះបោះឆ្នោត មិនចេះអានអក្សរ និងមិនចេះសរសេរអក្សរខ្មែរទេនោះ គឺមិនគ្រប់លក្ខខណ្ឌ នៅក្នុងការឈរឈ្មោះជាបេក្ខជនឡើយ។ បើតាមមន្ត្រីជាន់ខ្ពស់ គ.ជ.ប រូបនេះ គឺជាទូទៅច្បាប់បានផ្ដល់អំណាច ដល់គណៈកម្មការឃុំ-សង្កាត់រៀបចំការបោះឆ្នោត ក្នុងការពិនិត្យលើពាក្យសុំចុះបញ្ជីបេក្ខជន គណបក្សនយោបាយឈរឈ្មោះបោះឆ្នោត ហើយច្បាប់ក៏បានចងចំពោះលក្ខខណ្ឌ សម្រាប់ ឈរឈ្មោះជាបេក្ខជន និងលក្ខខណ្ឌសម្រាប់ដាក់ពាក្យសុំចុះបញ្ជីបេក្ខជន។
ដូច្នេះហើយក្នុងមាត្រា ៣៥ នៃច្បាប់ ស្ដីពី ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលបញ្ជាក់អំពីលក្ខខណ្ឌបេក្ខជន ដែលប្រសិនបើគណៈកម្មការឃុំ-សង្កាត់រៀបចំការបោះឆ្នោត ពិនិត្យឃើញថា ប្រជាពលរដ្ឋផ្ដល់យោបល់ទៅលើបេក្ខជន ដែលពុំមានលក្ខខណ្ឌគ្រប់គ្រាន់ទេនោះ គឺគណៈកម្មការអាចស្នើសុំគណបក្សនយោបាយ ធ្វើការកែតម្រូវលក្ខខណ្ឌរបស់បេក្ខជននោះ ឬក៏រកបេក្ខជនថ្មីមកជំនួស៕
អត្ថបទ៖ ឃួន សុភ័ក្រ
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៣ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៦ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៤ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ