សម្តេចតេជោ ហ៊ុន សែន ៖ កម្ពុជា​នឹងក្លាយជាទីកន្លែង​នៃការសម្រុះសម្រួលមួយ​រវាង​មហាអំណាចចិន និងសហរដ្ឋអាមេរិក

សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានថ្លែងថា នៅប៉ុន្មានថ្ងៃខាងមុខនេះ បើសិនជាមិនមានអ្វីប្រែប្រួលទេ ទឹកដីកម្ពុជា នឹងក្លាយជាទីកន្លែងមួយ សម្រាប់សម្រុះសម្រួលឲ្យមានកិច្ចជំនួប រវាងរដ្ឋមន្រ្តីក្រសួងការពារជាតិអាមេរិក និងចិន ដោយសម្តេចរំពឹងថា កិច្ចជំនួបរវាងប្រមុខការពារជាតិ ប្រទេសមហាអំណាចទាំងពីរនេះ នឹងនាំមកនូវភាពវិជ្ជមាន ដើម្បីសន្តិសុខក្នុងតំបន់ និងពិភលោក។

សម្តេចតេជោ ថ្លែងបែបនេះ នៅក្នុងពិធីពិធីបើកព្រឹត្តិការណ៍កីឡាជាតិលើកទី៣ និង កីឡាជនពិការលើកទី១ នៅពហុកីឡាដ្ឋានជាតិមរតកតេជោ នាព្រលប់ថ្ងៃទី២១ ខែវិច្ឆិកា ឆ្នាំ២០២២។

បើតាមសម្តេចតេជោ ជំនួបនេះគ្រោងធ្វើឡើងនៅខេត្តសៀមរាប។ សម្តេចតេជោ ថ្លែងបន្តដូច្នេះថា« យើងសង្ឃឹមថា រដ្ឋមន្រ្តីក្រសួងការពារជាតិសហរដ្ឋអាមេរិក និងចិន នឹងធ្វើកិច្ចការដ៏ល្អនៅក្នុងទឹកដីនៃខេត្តសៀមរាប ដែលខ្ញុំនឹងមានវត្តមានផងដែរ»។