សម្ដេចតេជោ គូសបញ្ជាក់ថា សម្ដេច​ គ្មានរឿងអ្វីត្រូវចរចាជាមួយបក្សនយោបាយណាមួយទេ

សម្ដេចតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា បានគូសបញ្ជាក់ថា សម្ដេច មិនមានអ្វីត្រូវចរចាជាមួយគណបក្សនយោបាយណាមួយនោះទេ។

ការគូសបញ្ជាក់របស់សម្ដេចតេជោ ហ៊ុន សែន បានធ្វើឡើងក្នុងពិធីប្រគល់សញ្ញាបត្រជូនគរុសិស្ស គរុនិស្សិត និស្សិត និងបុគ្គលិកអប់រំជាង ២ពាន់នាក់ នៃវិទ្យាស្ថានជាតិអប់រំ (NIE) នាព្រឹកថ្ងៃទី ២៥ ខែមេសា ឆ្នាំ ២០២៣នេះ។

សម្ដេចតេជោ ហ៊ុន សែន បានថ្លែងថា សម្ដេច មិនមានហេតុផលអ្វីត្រូវជួបចរចាជាមួយគណបក្សនយោបាយណាមួយនោះទេ តែបើត្រឹមស្នើសុំជួបសម្ដែងការគួរសម គឺសម្ដេច អាចផ្ដល់ឱកាស។

សម្ដេចតេជោ ហ៊ុន សែន ថ្លែងបែបនេះថា «សូម្បីបណ្ដាបក្សនយោបាយក្នុងស្រុកគ្មានរឿងចរចាទេ បើអ្នកឯងសុំសម្ដែងការគួរសម ខ្ញុំអាចផ្ដល់ឱកាស បើខ្ញុំមានពេល អត់មានរឿងអីមកត្រូវចរចា»។

ជាមួយគ្នានេះ សម្ដេចតេជោ ហ៊ុន សែន លើកឡើងជាសំណួរថា តើគណបក្សនយោបាយចរចាគ្នាអំពីរឿងអ្វី? និងថាតើគណបក្សនយោបាយ ចង់ចរចាជាមួយនាយករដ្ឋមន្ត្រីអំពីរឿងអ្វីដែរ?

ត្រង់ចំណុចនេះ សម្ដេចតេជោ ហ៊ុន សែន ស្នើឲ្យបណ្ដាគណបក្សនយោបាយ គោរពអនុវត្តច្បាប់ឲ្យត្រឹមត្រូវទៅបានហើយ មិនចាំបាច់ចរចាអ្វីទេ៕

អត្ថបទ៖ ឃួន សុភ័ក្រ