លោក គុជ លី ចាត់ទុកជនរារាំងពលរដ្ឋមិនឲ្យទៅបោះឆ្នោតជាការប្រកាសធ្វើបដិវត្តពណ៌

ប្រធានគណបក្សខ្មែរតែមួយ លោក គុជ លី បានចាត់ទុកក្រុមបុគ្គលដែលឃោសនាមិនឲ្យប្រជាពលរដ្ឋជាម្ចាស់ឆ្នោតទៅចូលរួមការបោះឆ្នោតជ្រើសតាំងតំណាងរាស្ត្រ អាណត្តិទី៧ នៅខែកក្កដា ឆ្នាំ២០២៣ ខាងមុខ ជាការប្រកាសធ្វើបដិវត្តន៍ពណ៌នៅកម្ពុជា។

ការចាត់ទុកបែបនេះរបស់លោក គុជ លី គឺក្រោយក្រុមប្រឆាំង ជាពិសេសអ្នកគាំទ្រគណបក្សភ្លើងទៀនបានឃោសនាទុច្ចរិត ដោយបានប្រកាសអំពាវនាវមិនឲ្យប្រជាពលរដ្ឋទៅបោះឆ្នោត ឬគូសសន្លឹកឆ្នោតចោល ក្រោមហេតុផលថា ការបោះឆ្នោតជាតិខាងមុខនេះ មិនមានវត្តមានចូលរួមរបស់គណបក្សភ្លើងទៀន។

ទាក់ទិននឹងការប្រកាសនេះ លោក គុជ លី បានថ្លែងប្រាប់សារព័ត៌មានកម្ពុជាថ្មី ថា«ការអំពាវនាវមិនឲ្យប្រជាពលរដ្ឋទៅបោះឆ្នោតនេះ មិនមែនជារឿងចៃដន្យ ហើយក៏មិនមែនជារឿងថ្មីដែរ ខណៈដែលកាលពីឆ្នាំ២០១៨ អតីតមេបក្សប្រឆាំង ក៏បានប្រកាសអំពីយុទ្ធនាការដេកផ្ទះឈ្នះឯង ឬម្រាមដៃស្អាត ជាដើម»។

ក្នុងនាមជាប្រធានគណបក្សនយោបាយដែលបានចូលរួមការបោះឆ្នោតប្រកួតប្រជែង លោក គុជ លី បានចាត់ទុកការប្រកាសរារាំងប្រជាពលរដ្ឋមិនឲ្យទៅបោះឆ្នោត ក្រោមហេតុថា មិនមានគណបក្សភ្លើងទៀនចូលរួមនោះ គឺជាគំនិតទុច្ចរិត ដោយបានធ្វើបាបប្រជាពលរដ្ឋជាម្ចាស់ឆ្នោតក្នុងការសម្រេចជោគវាសនាប្រទេសជាតិរបស់ខ្លួន។ លោក បានបន្តថា ការប្រកាសអំពាវនាវនេះ ក៏ជាការប្រឆាំងនឹងរដ្ឋធម្មនុញ្ញរបស់កម្ពុជា និងជាការប្រមាថដល់ប្រជាពលរដ្ឋជាម្ចាស់ផ្ទះទៀតផង។

បើតាមលោក គុជ លី ក្រុមប្រឆាំងទាំងនេះបានខិតខំរៀបចំសេនារីយ៉ូគ្រប់រូបភាព ដោយមានបរទេសនៅពីក្រោយខ្នង ដែលតាមរយៈនេះ ក្រុមប្រឆាំងហាក់កំពុងតែបម្រើបរទេសដោយមិនដឹងខ្លួន។ លោកសង្កត់ធ្ងន់ថា សកម្មភាពទាំងនេះ បានសបញ្ជាក់ថា ក្រុមបុគ្គលប្រឆាំងកំពុងមានគំនិតចង់ធ្វើបដិវត្តន៍ពណ៌នៅកម្ពុជា និងចង់បំផ្លាញដល់សន្តិភាពរបស់ប្រជាពលរដ្ឋដែលមានសព្វថ្ងៃនេះ។

ក្នុងន័យនេះ លោក គុជ លី បានថ្លែងអះអាងថា សន្តិភាពនេះ មិនមែនសំដៅតែលើគណបក្សកាន់អំណាចដែលបាននាំសន្តិភាពទេ តែជាបំណងប្រាថ្នារបស់ប្រជាពលរដ្ឋគ្រប់ៗគ្នា មិនថានិន្នាការណាឡើយ រួមទាំងក្រុមប្រឆាំង។ តែយ៉ាងណា ក្ដី អ្នកនយោបាយរូបនេះ ក៏បានអំពាវនាវ និងជំរុញលើកទឹកចិត្តដល់ប្រជាពលរដ្ឋខ្មែរទាំងអស់ អញ្ជើញចូលរួមបោះឆ្នោត នៅថ្ងៃ២៣ ខែកក្កដា ឆ្នាំ២០២៣ ឲ្យបានគ្រប់ៗគ្នា ដើម្បីប្រឆាំងទៅនឹងបដិវត្តន៍ពណ៌នៅកម្ពុជា និងឈានឆ្ពោះទៅកាន់ការអភិវឌ្ឍជាតិ ក៏ដូចជាធានាដល់សុខសន្តិភាពនៅកម្ពុជាតទៅមុខទៀត៕

ដោយ៖ ធឿន វ៉ាន់សុង