ខេត្តកែបមាន ៣ គណបក្សបានដាក់ផែនការឃោសនា​ទៅគ.ជ.ប

នាថ្ងៃទី ៤ ខែកក្កដា ឆ្នាំ២០២៣ លោក គីវ សាឌុំ ប្រធានគណៈកម្មការរៀបចំការបោះឆ្នោតខេត្តកែបបានប្រាប់ឱ្យដឹងថាខេត្តកែបមានគណកប្ស ៣ ដែលមានទី១ គណបក្សប្រជាជនកម្ពុជា និងទី២ គណបក្សហ្វ៊ុនស៊ិនប៉ិច និងទី៣ គណបក្សខ្មែររួបរួមជាតិ បានដាក់ផែនការកម្មវិធីឃោសនា ស្វែងរកសំលេងឆ្នោតនៅ​ក្នុងការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ ដែលនឹងប្រព្រឹត្តិទៅនាថ្ងៃទី២៣ ខែកក្កដា ឆ្នាំ២០២៣ខាងមុន ខណៈគណបក្សនយោបាយចំនួន ៧ ទៀត មិនមានផែនការឃោសនាអ្វីនោះទេ ក្នុងយុទ្ធនាការឃោសនាបោះឆ្នោតអាណត្តិនេះ។

លោក គីវ សាឌុំ បាន​បញ្ជាក់ថា ក្នុងចំណោមគណបក្សនយោបាយទាំង ១០ ដែលបានដាក់ពាក្យឈរឈ្មោះបោះឆ្នោត ជ្រើសតាំងតំណាងរាស្រ្តនីតិកាលទី៧ ឆ្នាំ២០២៣ សម្រាប់ខេត្តកែបមានតែ ៣ គណបក្សប៉ុណ្ណោះ ដែលបានដាក់កម្មវិធីឃោសនាមកកាន់គ.ជ.បខេត្ត។ ក្នុងនោះមានតែគណបក្សប្រជាជនមួយប៉ុណ្ណោះ ដែលបានចេញធ្វើយុទ្ធនាការឃោសនា ដែលមានសមាជិកប្រមាណជាង ១ ម៉ឺនបានចូលរួម ខណៈគណបក្ស ២ ផ្សេងទៀតមិនមានការចេញឃោសនាអ្វីនោះទេ។

លោក គី វុទ្ធី ប្រធានលេខាធិការដ្ឋាននៃគណៈកម្មការរៀបបចំការបោះឆ្នោតខេត្តកែបបាន​បន្ត​ថា ក្នុងរដូវកាលនៃការឃោសនាបោះឆ្នោត លោកសំណូមពរដល់សកម្មជនគណបក្សទាំងអស់ ធ្វើយ៉ាងណាគោរពនូវសេចក្តីថ្លៃថ្នូរ រក្សានូវសន្តិសុខសណ្តាប់ធ្នាប់ល្អ។

សម្រាប់ការបោះឆ្នោតជ្រើសតាំងតំណាងរាស្រ្តនីតិកាលទី ៧ ឆ្នាំ២០២៣ ខេត្តកែបមានអ្នកចុះឈ្មោះបោះឆ្នោតសរុប ២៨.១៩៨​ នាក់ និងមានការិយាល័យបោះឆ្នោតសរុប ៦៩ ការិយាល័យ នៅទូទាំង ៥ ឃុំសង្កាត់ ២ ក្រុងស្រុក។

អត្ថបទ៖ សឹង រ៉ាត់