លោក មាជ សុវណ្ណរ៉ា ក្លាយជាប្រធានគណបក្សជំនាន់ថ្មី

អង្គសមាជជាលើកដំបូងបង្អស់របស់គណបក្សជំនាន់ថ្មី បានសម្រេច ផ្ដល់សេចក្ដីទុកចិត្តឱ្យលោក មាជ សុវណ្ណរ៉ា កាន់តំណែងជាប្រធានគណបក្ស។ នេះបើតាមសេចក្ដីប្រកាសព័ត៌មានរបស់គណបក្សជំនាន់ថ្មី ដែលចេញកាលពីថ្ងៃទី០៤ ខែមិថុនា។

ក្រៅពីនេះ  អង្គសមាជដែលរៀបចំឡើងនៅក្នុងភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប បានសម្រេចផ្ដល់សេចក្ដីទុកចិត្ត ដល់លោក ប៉ាត មុន្នី និងលោក​ ជឹង វិទ្យាឬទ្ធិ ជាអនុប្រធានគណបក្ស។

អង្គសមាជ ក៏បានបោះឆ្នោតផ្ដល់សេចក្ដីទុកចិត្តគាំទ្រ សមាសភាពគណៈកម្មាធិការនាយកគណបក្សចំនួន៥៣នាក់ និងបោះឆ្នោតផ្ដល់សេចក្ដីទុកចិត្តគាំទ្រសមាសភាពគណកម្មាធិការអចិន្ត្រៃយ៍គណបក្សចំនួន១៥រូប។

គួរឱ្យដឹងថា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស សុខា នៅថ្ងៃទី២៨ ខែកញ្ញា ឆ្នាំ២០២៤ បានអនុញ្ញាតឱ្យបង្កើតគណបក្សខ្មែរជំនាន់ថ្មី។ គណបក្សនេះមានទីស្នាក់ការកណ្ដាលនៅភូមិច្រេស ​ឃុំកណ្ដែក ស្រុកប្រាសាទបាគង ខេត្តសៀមរាប៕