សម្ដេច សាយ ឈុំ ថា គោលការណ៍គណបក្សប្រជាជន គឺការពង្រឹងសមត្ថភាពមន្រ្តីបន្តវេន ជារឿងសំខាន់

សម្ដេចវិបុលសេនាភក្តី សាយ ឈុំ បានថ្លែងថា​ ជាគោលការណ៍របស់គណបក្សប្រជាជននៅគ្រប់កាលៈទេសៈ គឺការផ្ដល់ឱកាស និងការបណ្ដុះបណ្ដាលសមត្ថភាព និងចំណេះដឹងដល់មន្ត្រីបន្តវេនវ័យក្មេងរបស់ខ្លួន ជាកិច្ចការដ៏សំខាន់។

សម្តេចវិបុលសេនាភក្តី សាយ ឈុំ អនុប្រធានគណបក្សប្រជាជនកម្ពុជា គូសបញ្ជាក់ថា ការអប់រំបណ្តុះបណ្តាលមន្ត្រីដឹកនាំរបស់គណបក្សនៅគ្រប់ថ្នាក់ គ្រប់ផ្នែក ជាពិសេសមន្រ្តីបន្តវេន គឺជាគោលការណ៍ចម្បងរបស់គណបក្សប្រជាជនកម្ពុជា ដែលតែងតែបានចាត់តាំងអនុវត្តនៅក្នុងគ្រប់ដំណាក់កាលនៃការតស៊ូរបស់គណបក្ស។ ការគូសបញ្ជាក់របស់សម្តេចវិបុលសេនាភក្តីបែបនេះ ក្នុងឱកាសសម្ដេចអញ្ជើញជាអធិបតីក្នុងពិធីបើកវគ្គអប់រំនយោបាយរបស់គណបក្ស កម្រិត ២ ជំនាន់ទី១៣ នាព្រឹកថ្ងៃទី២ ខែកញ្ញា ឆ្នាំ២០២៤ ដែលរៀបចំដោយគណៈឃោសនាអប់រំនៃគណៈកម្មាធិការកណ្តាលគណបក្សប្រជាជនកម្ពុជា នៅវិមាន៧មករា។

សម្ដេច សាយ ឈុំ បានកត់សម្គាល់ថា វគ្គអប់រំនយោបាយនេះ គឺស្ថិតក្នុងបរិយាកាសសប្បាយរីករាយ សាមគ្គីជិតស្និទ្ធ និងសុទិដ្ឋិនិយមខ្ពស់ ស្របពេលដែលគណបក្សប្រជាជនកម្ពុជា បាននិងកំពុងកាន់អំណាច តាមរយៈជ័យជម្នះយ៉ាងភ្លូកទឹកភ្លូកដីក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ កាលពីថ្ងៃទី២៣ ខែកក្កដា ឆ្នាំ២០២៣កន្លងមកនេះ។ សម្ដេចបានចាត់ទុកថា នេះជាកត្តាអំណោយផលបំផុត ដែលអនុញ្ញាតឱ្យគណបក្សប្រជាជនផ្ទេរការដឹកនាំរាជរដ្ឋាភិបាលឱ្យទៅអ្នកបន្តវេនវ័យក្មេង ដែលបានបណ្ដុះបណ្ដាលយ៉ាងម៉ត់ចត់ និងយ៉ាងត្រឹមត្រូវ។

តាមការបញ្ជាក់របស់សម្ដេច សាយ ឈុំ ក្នុងរយៈពេល១ឆ្នាំកន្លងមកនេះ រាជរដ្ឋាភិបាល នីតិកាលទី៧ ក្រោមការដឹកនាំដោយសម្តេចធិបតី ហ៊ុន ម៉ាណែត បាននិងកំពុងចាត់តាំងអនុវត្តយុទ្ធសាស្ត្របញ្ចកោណ ដំណាក់កាលទី១ យ៉ាងសកម្ម និងរស់រវើកប្រកបដោយផ្លែផ្កាជាវិជ្ជមានលើគ្រប់វិស័យ សំដៅឆ្លើយតបយ៉ាងស័ក្តិសមទៅនឹងទំនុកទុកចិត្តរបស់គណបក្សប្រជាជន និងប្រទេសជាតិ។

អនុប្រធានគណបក្សកាន់អំណាច បន្តថា វគ្គអប់រំនយោបាយរបស់គណបក្សកម្រិត២ ជំនាន់ទី១៣ នាពេលនេះ សំដៅលើកកម្ពស់ការយល់ដឹងបន្ថែមទៀតជូនសិក្ខាកាមគ្រប់រូបអំពីទ្រឹស្ដីគោលការណ៍ គោលនយោបាយ បទពិសោធន៍ និងការប្រតិបត្ដិជាក់ស្ដែង​ ស្របតាមសំណូមពរការងាររបស់គណបក្ស និងសភាពការណ៍របស់ប្រទេសជាតិ។ ទន្ទឹមនឹងនេះ វគ្គអប់រំនយោបាយនេះ ក៏ជាឱកាសដ៏មានតម្លៃរបស់មន្ត្រីមកពីគណបក្សនៃបណ្ដាក្រសួង-ស្ថាប័ន រាជធានី-ខេត្តផ្សេងៗគ្នា បណ្តាអង្គការមហាជនរបស់គណបក្ស និងបណ្ដាស្ថាប័នគណបក្សជុំវិញថ្នាក់កណ្តាល បានស្គាល់គ្នា បានផ្លាស់ប្តូរការយល់ដឹង និងបទពិសោធន៍ការងារជាមួយគ្នាផងដែរ។

តាមរយៈនេះ ក៏នឹងធ្វើឱ្យចំណងមិត្តភាព សាមគ្គីភាពផ្ទៃក្នុងរបស់គណបក្សកាន់តែត្រូវបានពង្រឹង និងពង្រីកបន្ថែមទៀត ។ នេះជាការលើកឡើងបន្ថែមរបស់សម្ដេច សាយ ឈុំ អនុប្រធានគណបក្សប្រជាជនកម្ពុជា៕