នយោបាយ

កម្ពុជាបញ្ជាក់ជំហរពង្រឹងចំណងមិត្តភាពជាមួយអាមេរិកក្នុងខួប៧៥ឆ្នាំនៃទំនាក់ទំនងការទូត

បានផុស

១ year មុន

នៅ

ថ្ងៃសៅរ៍ ២៥ មករា ២០២៥

ដោយ

ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជាលោក ប្រាក់ សុខុន បានថ្លែងអំណរគុណសហរដ្ឋអាមេរិកចំពោះកិច្ចសហប្រតិបត្តិការទូលំទូលាយជាមួយកម្ពុជា និងបានបញ្ជាក់ថាកម្ពុជាមានការ «ប្ដេជ្ញាចិត្តឥតងាករេ» ក្នុងការពង្រឹងចំណងមិត្តភាព ដើម្បីផលប្រយោជន៍ទៅវិញទៅមកនៃប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីលៀងសាយភោជន៍ ប្រារព្ធខួប៧៥ឆ្នាំនៃទំនាក់ទំនងការទូតកម្ពុជា-អាមេរិក នៅសារៈមន្ទីរជាតិថ្ងៃទី២៤ ខែមករា ឆ្នាំ២០២៥ ឧបនាយករដ្ឋមន្ត្រី ប្រាក់ សុខុន បានលើកឡើងពីការពេញចិត្តចំពោះទំនាក់ទំនងមិត្តភាពជាមួយសហរដ្ឋអាមេរិក «ដោយឈរលើគោលការណ៍គោរពគ្នាទៅវិញទៅមក» ព្រមទាំងរីករាយចំពោះសន្ទុះវិជ្ជមានក្នុងទំនាក់ទំនងទ្វេរភាគ នាឆ្នាំកន្លងទៅនេះ រាប់ចាប់តាំងពីវិស័យពាណិជ្ជកម្ម និងការតភ្ជាប់រវាងប្រជាជន និងប្រជាជន រហូតដល់ការបន្តកិច្ចសហប្រតិបត្តិការរវាងយោធា និងយោធា។ លោកក៏បានកត់សម្គាល់នូវការបញ្ជូនមកវិញនូវរតនសម្បតិ្តរបស់កម្ពុជាដែលត្រូវបានយកចេញពីកម្ពុជាកាលពីសម័យសង្គ្រាមផងដែរ។

ក្នុងសេចក្ដីប្រកាសព័ត៌មានចុះថ្ងៃ២៤ មករា ឆ្នាំ២០២៥ ក្រសួងការបរទេសបានដកស្រង់ប្រសាសន៍របស់លោកឧបនាយករដ្ឋមន្ត្រីថា៖ «ឯកឧត្តមឧបនាយករដ្ឋមន្ត្រីបានបញ្ជាក់ជាថ្មីនូវការប្ដេជ្ញាចិត្តឥតងាករេររបស់កម្ពុជាក្នុងការពង្រឹងចំណងមិត្តភាពដើម្បីផលប្រយោជន៍ទៅវិញទៅមកនៃប្រទេសទាំងពីរ»។

ភារធារីស្ថានទូតអាមេរិកប្រចាំកម្ពុជាលោកស្រី Bridgette L. Walker បានថ្លែងក្នុងពិធីនោះផងដែរថា ប្រជាជនគឺជានិមិត្តរូបនៃការស្វែងរកការរួបរួមគ្នារវាងអាមេរិក និងកម្ពុជា ក្នុងការចាប់យកនូវភាពរុងរឿង សន្ដិភាព និងវឌ្ឍនភាព។

ក្នុងសេចក្ដីប្រកាសព័ត៌មានរបស់ស្ថានទូតអាមេរិកប្រចាំកម្ពុជាក៏បានកត់សម្គាល់ផងដែរថា៖ «ការប្រារព្ធខួបមួយឆ្នាំនៃទំនាក់ទំនងការទូតនឹងបញ្ជាក់ពីភាពទូលំទូលាយនៃទំនាក់ទំនងរវាងសហរដ្ឋអាមេរិក និងកម្ពុជា ដែលត្រូវបានបង្កើតឡើងនៅលើមូលដ្ឋាននៃការគោរព និងផលប្រយោជន៍ទៅវិញទៅមក»។

សហរដ្ឋអាមេរិកបានបង្កើតទំនាក់ទំនងការទូត ដោយផ្ទាល់របស់ខ្លួនជាលើកតំបូង ជាមួយប្រទេសកម្ពុជា នៅថ្ងៃទី២៩ ខែមិថុនា ឆ្នាំ១៩៥០ ដោយបានតែងតាំងលោក Donald R. Heath អោយធ្វើជាតំណាងវិសាមញ្ញ និងពេញសមត្ថភាព។ លោក Heath បានថ្វាយសារតាំងទៅព្រះករុណាសម្តេចព្រះបាទនរោត្តមសីហនុ នៅថ្ងៃទី១១ ខែកក្កដា ឆ្នាំ១៩៥០។ ការិយាល័យតំណាងសហរដ្ឋអាមេរិក បានបើកនៅភ្នំពេញ នៅថ្ងៃទី១៤ ខែវិច្ឆិកាឆ្នាំដដែល ដោយយកសណ្ឋាគារឡឺរ៉ូយ៉ាល់ជាកន្លែងធ្វើការតំបូងរបស់ស្ថានទូត៕