រយៈពេល៥ថ្ងៃ នគរបាលរាជធានីឃាត់ខ្លួនក្រុម​ជនសង្ស័យ២០នាក់ ពាក់ព័ន្ធបទល្មើសចំនួន​៦​ផ្សេងគ្នា

ក្នុងរយៈពេល៥ថ្ងៃ គិតចាប់ពីថ្ងៃទី១៧ ដល់ថ្ងៃទី២០ ខែតុលា ឆ្នាំ២០២៥ កម្លាំងនគរបាលការិយាល័យព្រហ្មទណ្ឌកម្រិតស្រាល​នៃស្នងការដ្ឋាននគរបាលរាជធានីភ្នំពេញ បានស្រាវជ្រាវ និងបង្ក្រាបក្រុមជនសង្ស័យសរុប២០នាក់ ពាក់ព័ន្ធបទល្មើសចំនួន៦ផ្សេងគ្នានៅក្នុងភូមិសាស្ដ្ររាជធានីភ្នំពេញ និងបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីអនុវត្តវិធានការច្បាប់។

លោកវរសេនីយ៍ឯក ម៉ម សាវន នាយការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានឲ្យដឹងនៅក្នុងសន្និសីទ្ធសារព័ត៌មានបង្ហាញមុខក្រុមជនសង្ស័យនារសៀលថ្ងៃទី២១តុលានេះថា ក្រុមជនសង្ស័យទាំងនេះ គឺជាមុខសញ្ញាដែលធ្វើសកម្មភាព ធាក់ និងវាយប្លន់ លួច និងហិង្សា ដែលធ្វើឲ្យជនរងគ្រោះមួយចំនួនរងរបួស ដែលប្រព្រឹត្តនៅភូមិសាស្ដ្រខណ្ឌជ្រោយចង្វារ ១ករណី ខណ្ឌដង្កោ ១ករណី ខណ្ឌមានជ័យ ៣ករណី និងខណ្ឌសែនសុខ ១ករណី។

នាយការិយាល័យព្រហ្មទណ្ឌកម្រិតស្រាល បន្ថែមថា ក្នុងប្រតិបត្តិការបង្ក្រាប កម្លាំងជំនាញបានដកហូតវត្ថុតាងរួមមាន ចបជីក ដងឆ័ត្រ ត្រសេះ កាំបិតផ្គាក់ កាំបិតបុ័ងតោ ដាវសាំម៉រ៉ៃ កាំបិតចុងស្រួច កាំភ្លើងហ្គាស (ប្រើគ្រាប់កង់) មួកសុវត្ថិភាព ស្លាកលេខចំនួន២ និងម៉ូតូចំនួន១០គ្រឿង។

បច្ចុប្បន្នជនសង្ស័យទាំង២០នាក់ ត្រូវបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីបន្តនីតិវិធីតាមច្បាប់៕

អត្ថបទ៖ រដ្ឋា