សន្តិសុខសង្គម

ចាប់ខ្លួនអ្នកចម្រៀងអនឡាញម្នាក់ បញ្ជូនទៅតុលាការ ករណីប្រើហិង្សាលើជនរងគ្រោះរងរបួសធ្ងន់ធ្ងរ

បានផុស

៨ ខែ មុន

នៅ

ថ្ងៃអង្គារ ២៥ វិច្ឆិកា ២០២៥

ដោយ

កម្លាំងសមត្ថកិច្ចការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ បានធ្វើការឃាត់ខ្លួនអ្នកចម្រៀងតាមអនឡាញម្នាក់ ត្រៀមបញ្ជូនទៅតុលាការ នារសៀលថ្ងៃទី ២៥ ខែវិច្ឆិកា ឆ្នាំ ២០២៥ នេះ ពាក់ព័ន្ធករណីប្រើអំពើហិង្សាដោយចេតនាមានស្ថានទម្ងន់ទោស បណ្ដាលឲ្យពិការភាពដល់ជនរងគ្រោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកចម្រៀងអកកាដង់ម្នាក់នោះមានឈ្មោះ នួន រចនា ហៅ ជីង ភេទប្រុស អាយុ ៣៨ ឆ្នាំ ជាសិល្បករ ត្រូវបានសមត្ថកិច្ចនគរបាលព្រហ្មទណ្ឌឃាត់ខ្លួនតាមដីកាបង្គាប់ឲ្យចាប់ខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ។

ការចាប់ខ្លួនជនសង្ស័យខាងលើនេះបានធ្វើឡើងកាលពីរសៀលថ្ងៃទី ២៤ ខែវិច្ឆិកា ឆ្នាំ ២០២៥ ស្ថិតនៅចំណុចផ្លូវបេតុងលេខ ៥១BT ភូមិសន្សំកុសល ៣ សង្កាត់បឹងទំពុន ១ ខណ្ឌមានជ័យ រាជធានីភ្នំពេញ។

តាមដីកាបង្គាប់ឲ្យចាប់ខ្លួនជនសង្ស័យពីបទហិង្សាដោយចេតនាមានស្ថានទម្ងន់ទោស ដោយសារពិការភាពជនរងគ្រោះ ប្រព្រឹត្តនៅចំណុចអតីតភោជនីយដ្ឋាន D.Lini ផ្លូវកែវចិន្តា ភូមិ ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ កាលពីថ្ងៃទី ១៣ ខែកក្កដា ឆ្នាំ ២០២៣។

បើតាមអង្គហេតុក្នុងដំណើររឿងខាងលើ នៅថ្ងៃកើតហេតុជនសង្ស័យមានកម្មវិធីផឹកស៊ីមួយនៅភោជនីយដ្ឋានខាងលើ និងបានបង្កបញ្ហាពាក្យសំដីបង្កឲ្យកើតមានជម្លោះទាស់ទែងគ្នា រហូតជនសង្ស័យបានយកដបស្រាវាយក្បាលជនរងគ្រោះពីក្រោយខ្នង។

ករណីខាងលើនេះត្រូវបានភាគីដែលអះអាងថាជាជនរងគ្រោះបានដាក់ពាក្យបណ្ដឹងប្តឹងទៅសមត្ថកិច្ចរហូតដល់តុលាការមានចំណាត់ការយ៉ាងក្តៅគគុកមកដល់ពេលនេះ ដែលសំណុំរឿងអ្នកចម្រៀងរូបនេះ ទំនងមិនអាចគេចផុតពីការឃុំខ្លួនដាក់ពន្ធនាគារជាបណ្ដោះអាសន្ន ដើម្បីរង់ចាំកាត់ទោសទៅតាមផ្លូវច្បាប់នោះឡើយ៕