អាជ្ញាធរខេត្តសៀមរាប ណែនាំ​ប្រជានេសាទ​លៀស​ប្រើប្រាស់​ឧបករណ៍នេសាទ​ ឱ្យ​បាន​ត្រឹមត្រូវ​តាមច្បាប់

សៀមរាប ៖ លោក ធិននី សុទ្ធី នាយខណ្ឌរដ្ឋបាលជលផលសៀមរាប បានឱ្យដឹងថា ប្រជានេសាទ លៀស នៅក្នុងស្រុកសូទ្រនិគម និងស្រុកជីក្រែង ខេត្តសៀមរាប បច្ចុប្បន្ននេះ មានប្រមាណជា ៣៤០គ្រួសារ ហើយបន្ទាប់ពីក្រុមការងារបានចុះត្រួតពិនិត្យ ឃើញថា ប្រជាជានេសាទប្រមាណជា៨០% បាន​ធ្វើ​ការ​នេសាទ​ដោយ​ស្រប​ទៅ​តាម​ច្បាប់កំណត់ ហើយ​ក៏​នៅ​មាន​មួយចំនួន នៅតែមិនទាន់អនុវត្តបានត្រឹមត្រូវ។ លោកបានពន្យល់ថា តាមច្បាប់ជលផល ការនេសាទលៀស គឺ​ច្បាប់​កំណត់​ឱ្យ​ចាប់​យក​លៀង​ដែល​មាន​ទំហំចាប់ពីបីហ៊ុន(៣សង់ទីម៉ែត្រ)ឡើងទៅ។

ហើយការធ្វើនេសាទលៀសដោយប្រើឧបករណ៍ខុសច្បាប់ ដោយទូកម៉ាស៊ីនខ្នាតធំៗ ជាហេតុនាំឱ្យបំផ្លាញជីវៈចម្រុះ និងប្រព័ន្ធអេកូឡូស៊ី នៅបាតទន្លេសាប។នៅក្នុងការចុះត្រួតពិនិត្យនេះដែរ មន្រ្តីជំនាញ ក៏​បាន​ចាក់​លៀស​ដែល​មាន​ទំហំតូចចូលទន្លេសាបវិញចំនួន ១ ២០០ គីឡូក្រាមផងដែរ។

នៅថ្ងៃទី១៣ ខែមករា ឆ្នាំ២០២៦នេះ លោក អុឹង គឹមលាង អភិបាលរងខេត្តសៀមរាប បានដឹកនាំក្រុមការងារចម្រុះ ចុះពិនិត្យការធ្វើនេសាទ អូសលៀស ស្ថិតនៅ ឃុំកំពង់ឃ្លាំង ស្រុកសូទ្រនិគម ខេត្តសៀមរាប។ក្នុងគោលបំណងពិនិត្យមើលថា ពួក​គាត់​បាន​ប្រើប្រាស់​ឧបករណ៍​បានត្រឹមត្រូវតាមច្បាប់កំណត់ដែរឬទេ។

ជាមួយគ្នានេះ លោក អុឹង គឹមលាង ណែនាំឱ្យប្រជានេសាទលៀស ប្រើប្រាស់ឧបករណ៍នេសាទឱ្យតាមត្រឹមត្រូវតាមច្បាប់ ដោយចាប់យកតែលៀសធំៗ ដែលគ្រប់ខ្នាត ដើម្បីរក្សាលៀសនៅក្នុងតំបន់របស់យើងឱ្យកាន់តែសម្បូរ និងអាចធ្វើនេសាទ​នា​ពេល​ក្រោយៗ​បាន​ជា​បន្តបន្ទាប់ទៀត។ លោក​អភិបាល​រង​ក៏​បាន​ណែនាំ​ឱ្យមន្រ្តីជំនាញ ក៏ដូចជាស្ថាប័នពាក់ព័ន្ធទាំងអស់ត្រូវបន្តពង្រឹងការគ្រប់ និងទប់ស្កាត់ បង្រ្កាប ការធ្វើនេសាទលៀសដោយខុសច្បាប់ឱ្យកាន់តែមានប្រសិទ្ធភាព ជាពិសេសការនេសាទយកលៀសតូចៗ ដែលមិនទាន់គ្រប់ខ្នាត ត្រូវតែទប់ស្កាត់ឱ្យបាន ព្រោះការនេសាទយកលៀសតូចៗ និងការប្រើប្រាស់ឧបករណ៍ដោយខុសច្បាប់នេះ និងធ្វើឱ្យបាត់បង់ពូជលៀសអស់ក្នុងដែននេសាទរបស់ខេត្តយើង៕

ដោយ ៖ ជុន កុសល