Connect with us

សន្តិសុខសង្គម

ក្រោយបាត់ភ័យ! ឧកញ៉ា អ៊ាន សៀវម៉ី ប្រាប់សមត្ថកិច្ចថា ខ្លួនបាត់បង់ខ្សែកពេជ្រ ៣ខ្សែតម្លៃជិត ២លាន

បានផុស

នៅ

អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ​ បានចេញសេចក្ដីបំភ្លឺទាក់ទងទៅនឹងការបិទបញ្ចប់ការសាកសួរ ជនរងគ្រោះ ឧកញ៉ា អ៊ាន សៀវម៉ី​ អំពីការបាត់បង់ទ្រព្យសម្បត្តិជាក់ស្តែង​ លើករណីជនសង្ស័យមួយក្រុមដែលបានចូលប្លន់ ដល់ក្នុងផ្ទះជនរងគ្រោះ​នៅបុរីម៊ូន​ ថោន​ ( Moon Town ) កាលពីវេលាម៉ោង​ ១០ និង៣០នាទីព្រឹក ថ្ងៃទី ១៩​ ខែធ្នូ​ ឆ្នាំ២០២១​។

លោកវរសេនីយ៍ឯក សាន សុខសីហា អ្នកនាំពាក្យ នៃស្នងដ្ឋាននគរបាលរាជធានីភ្នំពេញ បានប្រាប់កម្ពុជាថ្មី នៅព្រឹកថ្ងៃទី ២១ ខែធ្នូនេះថា បន្ទាប់ពីកើតហេតុ​ កម្លាំងចម្រុះនៃការិយាល័យព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញ​ កម្លាំងនៃអធិការដ្ឋាននគបាលខណ្ឌពោធិ៍សែនជ័យ​ បានសហការជាមួយកម្លាំងចម្រុះ នាយកដ្ឋានព្រហ្មទណ្ឌក្រសួងមហាផ្ទៃ​ បានចុះដល់កន្លែងកើតហេតុ ដើម្បីធ្វើកំណត់ហេតុស្រាវជ្រាវ ចំពោះករណីប្លន់នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯក សាន សុខសីហា បានឲ្យដឹងទៀតថា ជាជំហានដំបូងសមត្ថកិច្ចជំនាញ បានធ្វើសាកសួរជនរងគ្រោះលើករណីនេះ​ ជាពិសេសចំពោះទ្រព្យសម្បត្តិដែលបានបាត់បង់​ ដោយបន្ទាប់ពីកើតហេតុភ្លាមៗ ឧកញ៉ា អ៊ាន សៀវម៉ី​ ដែលជាជនរងគ្រោះនៅមានអារម្មណ៍តក់ស្លុត​ ភ័យខ្លាច​ និងមិនទាន់បានពិនិត្យឲ្យបានច្បាស់​លាស់អំពីការបាត់បង់ទាំងនេះ​ ទើបរហូតមកដល់ថ្ងៃទី ២០​ ខែធ្នូ​ ឆ្នាំ ២០២១​ សមត្ថកិច្ចចម្រុះបានធ្វើការសាកសួរបញ្ចប់ ជាមួយជនរងគ្រោះ​លើការបាត់បង់សរុបនេះ​។ 

អ្នកនាំពាក្យរូបនេះ បានបញ្ជាក់ថា បន្ទាប់ពីជនរងគ្រោះសម្រួលអារម្មណ៍​ បាត់ភ័យខ្លាច​ និងបានត្រួតពិនិត្យច្បាស់លាស់ អំពីទ្រព្យសម្បត្តិដែលបានបាត់បង់​ ដោយបានបញ្ជាក់តម្លៃជាមួយហាងលក់ពេជ្រដែលឧកញ៉ា អ៊ាន សៀវម៉ី តែងតែ ទិញយកមកប្រើប្រាស់​ គឺតាមចម្លើយរបស់ជនរងគ្រោះសម្ភារៈ ដែលបានបាត់បង់រួមមាន៖ ខ្សែកពេជ្រធំ​ចំនួន ៣ខ្សែ​ និងគ្រឿងអលង្កា (ពេជ្រ) មួយចំនួនទៀត​ យោងទៅលើវិក័យបត្រទិញ-លក់ គិតជាទឹកប្រាក់សរុបប្រហែលជា​ ១.៦ ទៅ​១.៩លាន​ដុល្លារអាមេរិក និងទូរស័ព្ទដៃម៉ាក​ I phone ចំនួន​ ២គ្រឿងផងដែរ​។

គួរជម្រាបជូនដែរថា ក្រុមចោរប្លន់ផ្ទះឧកញ៉ា អ៊ាន សៀវម៉ី ដែលជាអ្នកលក់អនឡាញល្បីឈ្មោះ ត្រូវបានកម្លាំងអាវុធហត្ថរាជធានីភ្នំពេញ បង្ក្រាបបានហើយ កាលពីយប់មិញ។  

ទំព័រហ្វេសប៊ុក របស់កងអាវុធហត្ថរាជធានីភ្នំពេញ បានឲ្យដឹងថា ក្រោមការចង្អុលបង្ហាញពីលោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស នាយប់ថ្ងៃទី ២០ ខែធ្នូ ឆ្នាំ ២០២១នេះ កម្លាំងអាវុធហត្ថរាជធានីភ្នំពេញដឹកនាំដោយលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងមេបញ្ជាការកងរាជអាវុធហត្ថរាជធានីភ្នំពេញ បានសម្រុកចូលសម្បុកក្រុមចោរប្លន់ផ្ទះ ឧកញ៉ា អ៊ាន សៀវម៉ី ប្រមូលបានគ្រឿងពេជ្រត្រឡប់មកវិញ និងដកហូតអាវុធចំនួន ៥ដើម (វែង ១ដើម ខ្លី ៤ដើម)។ ក្នុងចំណោមនោះ ក៏មានលោក សុខសុវណ្ណ វឌ្ឍនាសាប៊ុង ហៅ William Guang ប្រធានគណបក្សខ្មែរក្រោក ដែលសង្ស័យ​ជាប់ពាក់ព័ន្ធករណី ជាមួយក្រុមចោរប្លន់ឧកញ៉ា អ៊ាន សៀវម៉ី ផងដែរ។

កម្លាំងអាវុធហត្ថភ្នំពេញ កំពុងបន្តនិតិវិធីលើមនុស្សពាក់ព័ន្ធ ក្នុងចំណោមមនុស្សដែលឃាត់ខ្លូនចំនួន ១២នាក់(ប្រុស ៩នាក់ ស្រី ៣នាក់)៕

អត្ថបទ៖ ឃួន សុភ័ក្រ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម