ចាប់ខ្លួនអតីតស្នងការរងខេត្តកណ្ដាល ពាក់ព័ន្ធករណីហិង្សា

កម្លាំងនគរបាលព្រហ្មទណ្ឌក្រសួងមហាផ្ទៃ បានសហការជាមួយកម្លាំងនគរបាលខេត្តកណ្តាល ធ្វើការចាប់ខ្លួនលោក ស្រេង សុខា ហៅទ្រី អតីតស្នងការរងនគរបាលខេត្តកណ្តាល ពាក់ព័ន្ធករណីហិង្សាលើអ្នកកាន់កាប់អចលនវត្ថុ។

តាមប្រភពព័ត៌មានច្បាស់ការណ៍ដែលទើបទទួលបាន លោក ស្រេង សុខា ត្រូវបានឃុំខ្លួនក្នុងពន្ធនាគារខេត្តកណ្តាល ហើយ នៅថ្ងៃទី១២ ខែមិថុនា ឆ្នាំ២០២២ នេះ ក្រោមការចោទប្រកាន់ពីបទ «ប្រើអំពើហិង្សាទៅលើអ្នកកាន់កាប់អចលនវត្ថុដោយសុចរិត» ប្រព្រឹត្តនៅភូមិកោះគរ សង្កាត់រកាខ្ពស់ ក្រុងតាខ្មៅ ខេត្តកណ្តាល កាលពីថ្ងៃទី៣០ ខែកក្កដា ឆ្នាំ២០២០ តាមមាត្រា២៥៣នៃច្បាប់ភូមិបាល ។

ការចាប់ខ្លួនលោក ស្រេង សុខា នេះ គឺយោងតាមដីកាបង្គាប់របស់លោក រស់ ផុនចាន់និមល ចៅក្រមស៊ើបសួរសាលាដំបូងខេត្តកណ្តាល ដែលបានចេញកាលពីថ្ងៃទី២៩ ខែវិច្ឆិកា ឆ្នាំ២០២១ ៕

អត្ថបទ៖ សុខុម