សន្តិសុខសង្គម

បុរស ២ នាក់ យកប្រពន្ធរួមគ្នា ព្រោះតែភ្លើងប្រច័ណ្ឌ ប្ដីចុងកាប់ប្ដីដើមបែកក្បាល

បានផុស

៥ ខែ មុន

នៅ

ថ្ងៃពុធ ២៨ កញ្ញា ២០២២

ដោយ

រឿងរ៉ាវស្នេហាត្រីកោណបុរសពីរនាក់ យកប្រពន្ធរួមគ្នារួមគ្នាអស់រយៈពេលជាច្រើនឆ្នាំ ចុងក្រោយប្តីចុងទាញកាំបិតខ្វែវកាប់ប្តីដើម បណ្តាលឲ្យរងរបួសធ្ងន់បែកក្បាលដេរ ៨ ថ្នេរព្រោះតែភ្លើងប្រច័ណ្ឌ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីប្តីចុងកាប់ប្តីដើមនេះ បានកើតឡើងនៅម៉ោង ៩ និង ៣០ នាទី កាលពីយប់ថ្ងៃទី ២៧ ខែកញ្ញា ឆ្នាំ ២០២២ កន្លងមកនេះ ស្ថិតក្នុងក្រុមហ៊ុន HLH នៅភូមិច្រកទៀក ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ។

អធិការនគរបាលស្រុកឱរ៉ាល់ បានឲ្យដឹងថា ជនរងគ្រោះមានឈ្មោះ យ៉ាង សាវន ភេទប្រុស អាយុ ៥៤ ឆ្នាំ ជាប្តីដើមត្រូវបានជនដៃដល់ឈ្មោះ ព្រិន ផាន់ណា ភេទប្រុស អាយុ ៣៤ ឆ្នាំ ត្រូវជាប្តីចុងកាប់បណ្តាលឲ្យរងរបួសធ្ងន់។ ប្រភពបានបន្តទៀតថា រវាងជនរងគ្រោះ និងជនដៃដល់រួមទាំងប្រពន្ធ គឺស្នាក់នៅរោងជាមួយគ្នាជាច្រើនឆ្នាំមកហើយ។ នគរបាលបានបន្តទៀតថា ស្ត្រីដែលយកប្តីពីររួចរស់នៅជាមួយគ្នានោះ មានឈ្មោះ ក.ខ អាយុ ៣២ ឆ្នាំ ស្នាក់ភូមិ-ឃុំកើតហេតុ។

ជនដៃដល់ឈ្មោះ ព្រិន ផាន់ណា ជាប្តីចុងបានសារភាពថា រូបគាត់ពិតជាបានយកកាំបិតខ្វែវវាយទៅលើឈ្មោះ យ៉ុង សាវន ត្រូវជាប្ដីដើមប្រាកដមែន ដោយសារប្តីដើមបង្ករឿងក្នុងគ្រួសារ និងយកកូនរត់ចេញពីរោងកន្លែងស្នាក់នៅគួបផ្សំរឿងប្រច័ណ្ឌបន្ថែមទៀត ក៏ខឹងទ្រាំមិនបានកាប់តែម្តង។

បច្ចុប្បន្នជនសង្ស័យ ត្រូវបានមន្ត្រីជំនាញអធិការនគរបាលស្រុកឱរ៉ាល់សាកសួរ និងកសាងសំណុំរឿងបញ្ជូនទៅស្នងការដ្ឋាននគរបាលខេត្តកំពង់ស្ពឺ ដើម្បីចាត់ការតាមនីតិវិធីច្បាប់៕

អត្ថបទ៖ ភួង រដ្ឋា