ខេត្តកំពង់ធំ​អាចប្រឈមជំនន់ទឹកភ្លៀង​អាជ្ញាធរអំពាវនាវ​ឲ្យពលរដ្ឋបង្កើនការប្រុងប្រយ័ត្នទ្វេដង

រដ្ឋបាលខេត្តកំពង់ធំ នៅថ្ងៃទី ៦ តុលានេះ បានប្រកាសពីការប្រឈមនឹងជំនន់ទឹកភ្លៀងជាថ្មីទៀត ដោយសារភ្លៀងបន្តធ្លាក់រៀងរាល់ថ្ងៃធ្វើឲ្យកម្ពស់ទឹកស្ទឹងសែនកើនឡើង។

សេចក្ដីជូនដំណឹងរបស់រដ្ឋបាលខេត្ត ស្ដីពីស្ថានភាពជំនន់ទឹកភ្លៀងក្នុងខេត្តកំពង់ធំបញ្ជាក់ថា ក្រសួងធនធានទឹកបានព្យាករណ៍កាលពីថ្ងៃទី ៤ ខែតុលាថា តំបន់ខ្ពង់រាប មានខេត្តឧត្តរមានជ័យ ខេត្តព្រះវិហារអាចមានភ្លៀងធ្លាក់ក្នុងកម្រិតពីតិចទៅច្រើន ដោយផ្អែកតាមស្ថានភាពនេះ ទឹកស្ទឹងនឹងហូរមកដល់ផ្នែកខាងក្រោមជាបន្តបន្ទាប់ក្នុងរយៈពេល ៣ ទៅ ៧ ថ្ងៃខាងមុខ ដែលធ្វើឲ្យកម្ពស់ទឹកស្ថានីយស្ទឹងសែនអាចឡើងដល់កម្រិតប្រកាសអាសន្ន។

​រដ្ឋបាលខេត្តកំពង់ធំបញ្ជាក់ថា ភ្លៀងបានបន្តធ្លាក់ជារៀងរាល់ថ្ងៃ ដូច្នេះបណ្ដារស្រុកផ្សេងទៀត​ក៏អាចប្រឈមនឹងជំនន់ទឹកភ្លៀងផងដែរ។ ជាមួយគ្នានោះ រដ្ឋបាលខេត្តក៏អំពាវនាវដល់ប្រជាពលរដ្ឋ​ឲ្យបង្កើនការប្រុងប្រយ័ត្នខ្ពស់ចំពោះជំនន់ទឹកភ្លៀង ដើម្បីចៀសវាងគ្រោះថ្នាក់ផ្សេងៗដែលអាចកើតមានឡើងជាយថាហេតុ៕