គ្រួសារសពសិស្សលិចទូកដ ទទួលជំនួយបឋម ២៨ លានរៀល ខណៈម្ចាស់ទូកដ កំពុងសួរនាំបន្ថែម

លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានឱ្យ “កម្ពុជាថ្មី” ដឹងមុននេះថា ក្នុងកិច្ចការដឹកនាំកម្លាំងស្វែងរកជនរងគ្រោះដែលបាត់ខ្លួនក្នុងឧបទ្ទវហេតុ (លិចទូកដទទឹង) នៅ ភូមិកោះចំរើន ឃុំកំពង់ភ្នំ ស្រុកលើកដែក មកដល់ពេលនេះ ក្រុមការងារបានរកឃើញ ១២នាក់ ក្នុងនោះនៅរស់រានមានជីវិត ៤នាក់ បាត់បង់ជីវិត ៨នាក់ និងកំពុងបន្តស្វែងរកជនរងគ្រោះ ៣នាក់ទៀត ដែលកំពុងបាត់ខ្លួន។

លោកឧត្តមសេនីយ៍ទោ ឈឿន សុចិត្ត បានឱ្យដឹងបន្តថា មកដល់ពេលនេះ គ្រួសារសព ទទួលបានជំនួយឧបត្ថម្ភ ដោយមួយសព រដ្ឋបាលខេត្តជូន ២០លានរៀល លោកជំទាវ ឃួន សុដារី ជួយ ៤លានរៀល និងឯកឧត្ដម ហេង រតនា ជួយចំនួន ៤លានរៀល។

ចំពោះម្ចាស់ទូកដ ឬអ្នកបើកទូកដ ដែលដាក់លើសចំណុះនោះ ស្នងការនគរបាលខេត្តកណ្តាល រូបនេះ បានឱ្យដឹងបន្ថែមថា ជំនាញកំពុងសាកសួរនាំតាមនីតិវិធី ដោយមិនទាន់កំណត់ថា ពួកគាត់នឹងត្រូវបង់សំណង និងទទួលទោសដូចម្ដេចនៅឡើយទេ។

គួររំលឹកថា នៅម៉ោង ៧ :១០ យប់មិញ ថ្ងៃទី១៣ ខែតុលា ឆ្នាំ២០២២ មានករណីមនុស្ស ១៨នាក់ ជិះទូកដទទឹង ឆ្លងទន្លេ ហើយជួបឧបទ្ទវហេតុលិចទឹក។ ទីតាំងលិចស្ថិតនៅក្នុង ភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្តាល ដោយមនុស្សធំ ៣នាក់ និងសិស្ស ១៥នាក់ ពួកគេសុទ្ធជាក្មេងក្រីក្រ។ គ្រាន់តែទទួលដំណឹងភ្លាម អ្នកភូមិបាននាំគ្នារត់មកចាំយកកូននៅមាត់កំពង់ ស្របពេលកណ្តាលទន្លេដ៏ធំកំពុងតែខ្មួរខ្មាញ់ដោយទឹកហូរ និងអូប័រក្រុមសមត្ថកិច្ច បំពាក់ដោយបរិក្ខាសង្គ្រោះ មានពិលមុជងើបៗស្វែងរកជនរងគ្រោះ។

ម៉ោង ១០ យប់ កម្លាំងសមត្ថកិច្ចបានរាវរកឃើញ សិស្សសាលាចំនួន ៤នាក់។ រំលងអាធា្រត្រ រកឃើញ ២នាក់ទៀត ក្នុងចំណោមសិស្សសាលារងគ្រោះទាំង ៦នាក់នេះ គឺ នៅរស់រានមានជីវិត ២នាក់ និង ស្លាប់ ៤នាក់។ ទៀបភ្លឺរកឃើញសព ២នាក់ទៀត។ ម៉ោង ៨ : 0០ នាទី ព្រឹករកឃើញសព ២នាក់ទៀត សរុបរកឃើញ ៨សព។

ក្មេងស្រីម្នាក់ដែលនៅរស់រាន នាងឃើញហេតុការណ៍ផ្ទាល់ភ្នែក គឺទូកដាក់លើសចំណុះ ហើយលើទូកមានរឺម៉ឺក១ គឺសឹងតែទឹកហៀរចូលទូកទៅហើយ ហើយទូកខំជិះលឿនឱ្យឆាប់ដល់​គោលដៅ អកុសលមានទូកជិះបញ្ច្រាសមក រលកវាយចូលទូកដែលនាងកំពុងជិះ លិចតែម្តង។ នាងអាចរស់បាន គឺគ្មាននរណាជួយនាងឡើយ ដំបូងនាងសម្រេចចិត្តដោះកាតាបបោះចោល ហើយស្ទុះទៅឈរលើរឺម៉ឺកដែលនៅលើទូក ហើយហែលផ្ងារឡើងលើ ទាំងអត់ចេះហែលទឹក ហើយរលកដ៏ខ្មាញ់រុញនាងរហូតដល់គោកតែម្តង៕

អត្ថបទ៖ ច័ន្ទ វីរៈ