សន្តិសុខសង្គម

លេងល្បែងជល់មាន់ជុំគ្នា តុលាការដោះលែង ៦ នាក់ ឃុំខ្លួនម្នាក់

បានផុស

៣ years មុន

នៅ

ថ្ងៃសៅរ៍ ១ កក្កដា ២០២៣

ដោយ

លោក លឹម សុគន្ធារ៉ា ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី ២៩ ខែមិថុនា ឆ្នាំ ២០២៣ បានចេញដីកាសម្រេចឃុំខ្លួន”ភ្នាក់ងារលេងល្បែងស៊ីសងខុសច្បាប់”ម្នាក់ ដាក់ពន្ធនាគារជាបណ្ដោះអាសន្ន។ ចំណែក ៦ នាក់ទៀត ត្រូវបានតំណាងអយ្យការដោះលែងឲ្យមានសេរីភាពវិញ តែកំណត់យកថ្ងៃទី ២៧ ខែកក្កដា ឆ្នាំ ២០២៣ ខាងមុខ ដើម្បីបើកសវនាការជំនុំជម្រះតាមច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនជាប់ចោទដែលត្រូវចៅក្រមឃុំខ្លួនឈ្មោះ ហុង សំអុន ភេទប្រុស អាយុ ២៣ ឆ្នាំ មុខរបរ កម្មករសំណង់ ស្នាក់នៅផ្ទះជួលគ្មានលេខ ផ្លូវបេតុង ភូមិតាងួន ២ សង្កាត់កាកាបទី ១ ខណ្ឌពោធិ៍សែនជ័យ រាជធានីភ្នំពេញ។

ជនត្រូវចោទបានដាក់ឲ្យស្ថិតនៅក្រោមការពិនិត្យ ពីបទ«ភ្នាក់ងារស៊ីសងល្បែងខុសច្បាប់» ដែលប្រព្រឹត្តនៅចំណុចដីឡូត៍គ្មានលេខ ផ្លូវលំ ភូម-សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ កាលពីថ្ងៃទី ២៤ ខែមិថុនា ឆ្នាំ ២០២៣ បទល្មើសព្រហ្មទណ្ឌមានចែងឲ្យផ្ដន្ទាទោសតាមបញ្ញត្តិមាត្រា ៥ នៃច្បាប់ ស្ដីពីការបង្ក្រាបល្បែងស៊ីសង។

កាលពីថ្ងៃទី ២៤ ខែមិថុនា ឆ្នាំ ២០២៣ កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បានចុះបង្ក្រាបករណីល្បែងស៊ីសងជល់មាន់ដោយខុសច្បាប់មួយកន្លែង ស្ថិតនៅចំណុចដីឡូត៍ គ្មានលេខ ផ្លូវលំ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ដោយធ្វើការឃាត់ខ្លួនមនុស្សចំនួន ៧ នាក់ ទាំងអ្នកលេង អ្នកមើលផ្លូវ និងមាន់ ៥ ក្បាល (ងាប់ ២ ក្បាល)។ ក្រោយបង្ក្រាប សមត្ថកិច្ច បានកសាងសំណុំរឿងបញ្ជូនជនសង្ស័យ និងវត្ថុតាង ទៅសាលាដំបូងរាជធានីភ្នំពេញ។

សំណុំរឿងនេះបានស្ថិតនៅលោក ឆាយ ហុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បើកការស៊ើបសួរ។ ជនសង្ស័យត្រូវបានសមត្ថកិច្ចដឹកជញ្ជូនទៅមក ៣ ទៅ ៤ ថ្ងៃ ទើបតំណាងអយ្យការសម្រេចដោះលែងជនជាប់ចោទ ៦ នាក់ ឲ្យត្រឡប់ទៅផ្ទះវិញ ហើយបញ្ជូនមកម្នាក់ ឲ្យចៅក្រមសម្រេចតាមច្បាប់។ ទីបំផុត ចៅក្រមស៊ើបសួរ បានសម្រេចចេញដីកាឃុំខ្លួនអ្នកមើលផ្លូវឲ្យប្រព្រឹត្តល្បែងស៊ីសងខុសច្បាប់នេះ៕

អត្ថបទ ៖ មករា