៦ខែឆ្នាំនេះ អគ្គិភ័យកើតឡើងជាង៣៣០លើក បណ្តាលឱ្យមនុស្សស្លាប់ និងរបួសជាង៤០នាក់

គ្រោះអគ្គិភ័យនៅក្នុងរយៈពេល៦ខែឆ្នាំ២០២៣នេះបានកើតឡើងជាង៣៣០លើកនៅទូទាំងប្រទេសបណ្តាលឱ្យមនុស្សស្លាប់ និងរបួសជាង៤០នាក់ និងបំផ្លាញផ្ទះជិត៤០០ខ្នង ព្រមទាំងអគារផ្សេងៗមួយចំនួនទៀត។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយមានប្រសាសន៍នៅព្រឹកថ្ងៃទី០៧​កក្កដា នេះថា រយៈពេល៦ខែនេះគ្រោះអគ្គិភ័យបានកើតឡើងចំនួន៣៣៧លើកបណ្តាលឱ្យឆេះផ្ទះចំនួន៣៧២ខ្នង តូបផ្សារ៥៩តូបឃ្លាំងទំនិញ៨កន្លែង សាលារៀន១ខ្នង រោងចក្រសិប្បកម្ម៦កន្លែងអគាររដ្ឋបាល៦កន្លែងស្លាប់មនុស្ស១៤នាក់និងរបួស២៧នាក់។

លោកបានបន្តថា ក្នុងចំណោមអគ្គិភ័យទាំង៣៣៧លើកក្នុងនោះកើតនៅរាជធានីភ្នំពេញច្រើនជាងគេមានចំនួន៦២លើកបណ្តាលឱ្យឆេះផ្ទះចំនួន៥៦ខ្នង តូបផ្សារ១៣តូបឃ្លាំងទំនិញ៧កន្លែង រោងចក្រសិប្បកម្ម២កន្លែកន្លែងស្លាប់មនុស្ស៣នាក់និងរបួស៧នាក់។ ក្រៅពីនេះខេត្តកំពង់ចាមមានអ្នកស្លាប់ចំនួន៣នាក់ ខេត្តព្រះសីហនុ ខេត្តស្វាយរៀង និងខេត្តតាកែវមានអ្នកស្លាប់ចំនួន២ៗនាក់ខេតតកណ្តាល១នាក់និងខេត្តស្ទឹងត្រែង១នាក់។

លោកបានបន្តទៀតថា គ្រោះអគ្គិភ័យរយៈពេល៦ខែឆ្នាំនេះបើប្រៀបធៀបទៅនឹងរយៈពេល៦ខែដូចគ្នាឆ្នាំ២០២២កន្លងទៅឃើញថា មានការកើនឡើង ខណៈ៦ខែឆ្នាំមុនគ្រោះអគ្គិភ័យបានកើតឡើងចំនួន២៥១លើកបណ្តាលឱ្យមនុស្សស្លាប់១១នាក់និងរងរបួស៣២នាក់ព្រមទាំងបំផ្លាញផ្ទះសម្បែងប្រជាពលរដ្ឋប្រមាណ៤៤៥ខ្នង។

បើតាមលោកឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការពន្លត់អគ្គិភ័យនិងសង្គ្រោះនៃអគ្គស្នងការដ្ឋាននគរបាលជាតិធ្លាប់បានបញ្ជាក់្យដឹងថាដើមចមដែលនាំឲ្យមានគ្រោះអគ្គិភ័យកើតឡើងគឺបណ្ដាលមកពីការឆ្លងចរន្តអគ្គិសនីចំនួន៤១.៥៥ភាគរយ,ប្រើប្រាស់ភ្លើងចំនួន៣៨.២៤ភាគរយនិងក្ដាប់មិនបានចំនួន២០.២១ភាគរយ៕

អត្ថបទ៖ សំអឿន