អគ្គិភ័យឆេះរោងចក្រស្បែកសត្វនៅខណ្ឌដង្កោ

អគ្គិភ័យមួយបានឆាបឆេះរោងចក្រផលិតកែច្នៃរោមសត្វ និងស្បែកសត្វ មួយកន្លែងបង្កការភ្ញាក់ផ្អេីលដល់ប្រជាពលរដ្ឋ និងសម្ថកិច្ចចុះអន្តរាគមន៍កាលពីវេលាម៉ោង ០៩៖ ៣០ នាទីយប់ថ្ងៃទី ១៩ ខែសីហា ឆ្នាំ២០២៣ ស្ថិតនៅភូមិព្រៃសំព័រ សង្កាត់ក្រាំងពង្រ ខណ្ឌដង្កោ រាជធានីភ្នំពេញ។

ម្ចាស់រោងចក្រឈ្មោះ ZHAO MEIQING ភេទស្រី អាយុ ៤០ឆ្នាំ ជនជាតិចិន។ ដោយរោងចក្រនេះជាប្រភេទសំណង់ ជញ្ជាំងស័ង្កសីប្រក់ដំបូលស័ង្កសី (ទំហំ8mX25m) ត្រូវបានអគ្គិភ័យឆាបឆេះសម្ភារ និងកម្ទេចអង្កាមអស់ទាំងស្រុង តែពុំបានឆេះរាលដាលដល់ផ្ទះអ្នកក្បែរខាងឡើយ។

ប្រភពព័ត៌មានពីអាជ្ញាធរមូលដ្ឋានបានឱ្យដឹងថា ករណីអគ្គិភ័យខាងលេីនេះ គឺបណ្ដាលមកពីឆ្លងចរន្តអគ្គិសនីទេីបមានការឆាបឆេះយ៉ាងសន្ធោសន្ធៅបែបនេះ តែមិនបង្កគ្រោះថ្នាក់ដល់មនុស្សនោះឡេីយ។

ចំពោះការប្រើប្រាស់រថយន្ដពន្លត់អគ្គិភ័យមានចំនួន១៤គ្រឿង ក្នុងនោះមានក្រុមរថយន្តពន្លត់អគ្គិភ័យ៧១១( កងពលតូចលេខ៧០) ចំនួន០៣គ្រឿង, ក្រុមរថយន្តការិយាល័យពន្លត់អគ្គិភ័យ ចំនួន ០៧គ្រឿង និងក្រុមរថយន្ដពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ ០៤គ្រឿង ខណៈពន្លត់ចប់នៅម៉ោង ១១ យប់៕

អត្ថបទ៖ សុខា