ក្រសួងកសិកម្ម នឹងចុះស្រាវជ្រាវករណីមន្ត្រីជលផលភ្ជង់កាំភ្លើងប្រជានេសាទ

ក្រសួងកសិកម្ម រុក្ខាប្រមាញ់ និងនេសាទកំពុងចាត់មន្ត្រីជំនាញ​ឱ្យចុះស្រាវជ្រាវ​ស៊ើបអង្កេតលើករណីមន្ត្រីជលផលដែលឈរជើងនៅចំណុច ព្រែកក្រ ក្នុងទឹកដីខេត្តពោធិ៍សាត់ប្រើប្រាស់កាំភ្លើងភ្ជង់ទៅលើប្រជានេសាទ ដោយគម្រាមថា នឹងចាប់បញ្ជូនទៅតុលាការ។

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោកជំទាវ អ៊ឹម រចនា បានបញ្ជាក់ថា ក្រសួងកំពុងចាត់មន្ត្រីជំនាញ​ឱ្យចុះស្រាវជ្រាវ​ស៊ើបអង្កេតលើករណីនេះ​ដើម្បីស្វែងរកខុសត្រូវឱ្យបានច្បាស់លាស់ ខណៈក្រសួងបានណែនាំ​ដល់មន្ត្រីជលផល​ និងអាជ្ញាធរចូលរួម​បង្ក្រាបបទល្មើននេសាទ​ក្នុងករណីដែលមិនចាំបាច់​មិនត្រូវប្រើប្រាស់អាវុធដើម្បីដោះស្រាយបញ្ហាជាមួយប្រជានេសាទនោះទេ។

កាលពីថ្ងៃទី ១៩ ខែសីហា កន្លងទៅថ្មីៗនេះ មានមន្ត្រីជលផលមួយក្រុមដែលឈរជើងនៅចំណុច ព្រែកក្រ ក្នុងទឹកដីខេត្ត ពោធិ៍សាត់ បានសហការជាមួយកម្លាំងសឹករង ប្រើប្រាស់កាណូតស្មាច់ចុះដេញចាប់ប្រជានេសាទ ដែលកំពុងរាយមងនៅចំណុចក្បាលតោល លើទឹកដីឃុំកោះជីវាំង ស្រុកឯកភ្នំ ខេត្តបាត់ដំបង៕

​