ឃាត់ខ្លួនក្រុមចាប់ជំរិតជនជាតិវៀតណាម​៥នាក់ ករណីចាប់បង្ខាំងធ្វើទារុណកម្មរហូតស្លាប់ជនរងគ្រោះម្នាក់ និងរបួស៤នាក់

ជនសង្ស័យជាជនជាតិវៀតណាមចំនួន៥នាក់ ក្នុងចំណោមបក្ខពួកសរុប១៣នាក់ ត្រូវបានកម្លាំងនគរបាលនៃស្នងការដ្ឋាននគរបាលខេត្តកណ្តាល សហការណ៍ជាមួយកម្លាំងពាក់ព័ន្ធស្រាវជ្រាវចាប់ឃាត់ខ្លួន ​បន្ទាប់ពីចាប់បង្ខាំង និងធ្វើទារុណកម្មលើជនរងគ្រោះ៥នាក់ និងបណ្ដាលឲ្យជនរងគ្រោះម្នាក់ស្លាប់។

ប្រតិត្តិការស្រាវជ្រាវបង្ក្រាប​ និងចាប់ខ្លួននេះបានធ្វើឡើងកាលពីថ្ងៃទី០៣ ខែកញ្ញា ឆ្នាំ២០២៣ ដោយកម្លាំងជំនាញនៃស្នងការដ្ឋាននគរបាលខេត្តកណ្តាល កម្លាំងនាយកដ្ឋាននគរបាលព្រហ្មទណ្ឌ កម្លាំងកងរាជអាវុធហត្ថខេត្តកណ្ដាល កម្លាំងជំនាញនៃស្នងការដ្ឋាននគរបាលខេត្តស្វាយរៀង កម្លាំងជំនាញនៃស្នងការដ្ឋាននគរបាលខេត្តព្រះសីហនុ និងកម្លាំងនគរបាលខេត្តអានយ៉ាង នៃសាធារណដ្ឋសង្គមនិយមវៀតណាម។

តាមរបាយការណ៍របស់ស្នងការដ្ឋាននគរបាលខេត្តកណ្ដាល ក្នុងប្រតិបត្តិការនេះបានឃាត់ខ្លួនជនសង្ស័យជាជនជាតិវៀត​ណាមចំនួន៥នាក់ ខណៈ៧នាក់កំពុងគេចខ្លួន ចំណែកមេក្លោងម្នាក់ឃាត់ខ្លួនបាននៅប្រទេសវៀតណាម។

របាយការណ៍បញ្ជាក់ថា កាលពីថ្ងៃទី២៥ ខែសីហា ឆ្នាំ២០២៣ ប្រហែលម៉ោង១២ថ្ងៃត្រង់ មានជនជាតិវៀតណាម២នាក់បានមកជួលផ្ទះនៅភូមិជ្រៃធំ សង្កាត់សំពៅពូន ក្រុងសំពៅពូន ខេត្តកណ្តាល ក្នុងតម្លៃ១,០០០ដុល្លារ ក្នុង១ខែ ដោយកក់​៥០០ដុល្លារ ប្រាប់ថា ស្អែកបានធ្វើឯកសារជួល។ លុះព្រឹកឡើងថ្ងៃទី២៦ ខែសីហា ឆ្នាំ២០២៣ នៅវេលាម៉ោងប្រហែល​១២​និង៣០នាទី ម្ចាស់ផ្ទះឡើងទៅសួរដើម្បីធ្វើកិច្ចសន្យាជួលផ្ទះ ស្រាប់តែឃើញសាកសពនៅក្នុងបន្ទប់ទឹក ក៏រាយការណ៍​ជូនសមត្ថកិច្ចមូលដ្ឋានដើម្បីចុះមកត្រួតពិនិត្យ។

តាមចម្លើយសារភាពរបស់ក្រុមជនសង្ស័យ ពួកខ្លួនបានធ្វើសកម្មភាពធ្វើទារុណកម្មទៅលើជនរងគ្រោះចំនួន៥នាក់ មានដូចជា ចងជើង ចងដៃ យកស្គុតបិតមាត់ និងបានធ្វើសកម្មភាពយកកាំភ្លើងភ្ជង់ជនរងគ្រោះ រួចបានយកស្បោងប្លាស្ទិច​ដុតបន្តក់លើជនរងគ្រោះ ហើយបានយកកូនកាំបិតចាក់ភ្លៅជនរងគ្រោះបណ្តាលឲ្យស្លាប់១នាក់ និងរងរបួសចំនួន៤នាក់ពិតមែន។

ជនរងគ្រោះដែលស្លាប់ក្នុងករណីនេះមានឈ្មោះ HOANG VANMUA ភេទប្រុស អាយុ៣៩ឆ្នាំ មានទីលំនៅភូមិម៉ាត់សឺ ឃុំជីមិញ ស្រុកជឺលិញ ខេត្តហាយ៉ៀង ប្រទេសវៀតណាម (ស្លាប់) (វិជ្ជមានសារធាតុញៀន)។ ចំណែកជនរងគ្រោះ៤នាក់ទៀតជាជនជាតិវៀតណាមដូចគ្នា​ របួសធ្ងន់ពីរនាក់ និងស្រាល២នាក់៕

អត្ថបទ៖ សុខុម