Update៖ សមត្ថកិច្ចប្រើរថយន្ដពន្លត់អគ្គិភ័យ​១៤គ្រឿងអន្តរាគមន៍ករណីអគ្គិភ័យនៅខណ្ឌជ្រោយចង្វារ

ករណីអគ្គិភ័យដែលឆេះផ្ទះប្រជាពលរដ្ឋនៅសង្កាត់ជ្រោយចង្វារ ខណ្ឌជ្រោយចង្វារ កាលពីវេលាម៉ោង៨និង៥០នាទីព្រឹក ថ្ងៃទី២១​ ខែវិច្ឆិកា​ ឆ្នាំ២០២៣ បណ្ដាលឆេះអស់មួយខ្នងទាំងស្រុង ដោយកម្លាំងសមត្ថកិច្ចជំនាញនៃការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានជួយអន្តរាគមន៍ប្រើប្រាស់ទឹកអស់១៤ឡានទើបគ្រប់គ្រងស្ថានការណ៍បាន។

តាមរបាយការណ៍របស់ការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញបានឲ្យដឹងថា ផ្ទះដែលត្រូវអគ្គិភ័យឆាបឆេះនេះជាប្រភេទសំណង់ឈើលើថ្មក្រោម ទំហំ ៨ម៉ែត្រ គុណ ១០ម៉ែត្រ ត្រូវបានអណ្ដាលភ្លើងឆាបឆេះអស់ទាំងស្រុង រួមទាំងសម្ភារគ្រឿងអគ្គីសនីសម្រាប់លក់ដូរមួយចំនួនធំ។

សូមបញ្ជាក់ថា ករណីអគ្គិភ័យខាងលើនេះ បានកើតឡើងកាលពីវេលាម៉ោង៨និង៥០នាទីព្រឹក ថ្ងៃទី២១​ ខែវិច្ឆិកា​ ឆ្នាំ២០២៣ នៅចំណុចផ្លូវទន្លេមេគង្គ ក្រុម០១ ភូមិគៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។ តាមការបញ្ជាក់ពីសមត្ថកិច្ចជំនាញ ករណីនេះគឺកើតឡើងដោយសារការឆ្លងចរន្តអគ្គីសនី៕