អគ្គិភ័យឆាបឆេះផ្ទះចំនួន ៣ ខ្នង ក្នុងក្រុងបាត់ដំបង

លំនៅឋានរបស់ប្រជាពលរដ្ឋចំនួន ៣ ខ្នង ដែលស្ថិតក្នុងក្រុងបាត់ដំបងត្រូវបានអគ្គីភ័យឆាបឆេះខ្ទេចខ្ទី ដែលសមត្ថកិច្ចបានដាក់ការសង្ស័យថា អាចបណ្តាលមកពីការឆ្លងចរន្តអគ្គិសនី។

ហេតុការណ៍នេះបានកើតឡើង កាលពី ថ្ងៃទី ២៦ ខែ វិច្ឆិកា ឆ្នាំ ២០២៣ វេលាម៉ោង ០៤ និង២០នាទី ល្ងាចនៅត្រង់ចំណុច ក្រុមទី ១០  ភូមិស្លាកែត សង្កាត់ស្លាកែត ក្រុងបាត់ដំបង ខេត្តបាត់ដំបង ដោយបណ្តាលឲ្យឆេះផ្ទះចំនួន ៣ ខ្នង ។

ផ្ទះប្រជាពលរដ្ឋដែលរងគ្រោះគឺ ១.ឈ្មោះ រី ចន្ធី ភេទ  ស្រី អាយុ ៥៥ ឆ្នាំ ឆេះផ្ទះ ១ ខ្នង ទំហំ៥ម×៧ម សង់អំពី​ឈើ​លើ​ថ្មក្រោម ដំបូងស័ង្កសី សម្ភារប្រើប្រាស់ក្នុងផ្ទះ និង ម៉ូតូសង់កូរ៉េ ចំនួន ១គ្រឿង ត្រូវភ្លើងឆាបឆេះគ្មានសល់ ២.ឈ្មោះ សម សុស្ថាបនា ភេទ ប្រុស អាយុ ៤២ ឆ្នាំ ឆេះផ្ទះ ១ខ្នង ទំហំ៥ម×៧ម សង់អំពីឈើលើ ថ្មក្រោម ដំបូងស័ង្កសី និងសម្ភារប្រើប្រាស់ក្នុងផ្ទះឆេះខ្ទេច និង ៣.ឈ្មោះ ម៉ី ម៉ៃ ភេទ ស្រី អាយុ ៦៥ ឆ្នាំ ឆេះផ្ទះ ១ខ្នង ទំហំ៥ម×៧ម សង់អំពីឈើ ដំបូងស័ង្កសី(ឆេះរោលប្រមាណ១០%)។       

សមត្ថកិច្ចបានចេញរថយន្តពន្លត់អគ្គិភ័យចំនួន ៥គ្រឿង ដើម្បីជួយអន្តរាគមន៍ ដោយសមត្ថកិច្ចបានសន្និដ្ឋានថា មូលហេតុ  ឆ្លងចរន្តអគ្គិសនី ឯទំហំនៃការខូចខាតគឺមិនទាន់វាយតម្លៃបានទេ៕

អត្ថបទ : សោ និយមរ័ត្ន