Update៖ អគ្គិភ័យឆេះនៅខណ្ឌដង្កោ បណ្ដាលមកពីឆ្លងចរន្តអគ្គិសនី

អគ្គិភ័យបានឆាបឆេះរោងកម្មករ និងស្តុកអេតចាយមួយកន្លែងយ៉ាងសន្ធោសន្ធៅបង្កការភ្ញាក់ផ្អេីលដល់ប្រជាពលរដ្ឋ និងសមត្ថកិច្ចចុះអន្តរាគមន៍ភ្លាមៗ កាលពីវេលាម៉ោង១២និង៣០នាទីថ្ងៃត្រង់ ថ្ងៃទី២៣ ខែធ្នូ ឆ្នាំ២០២៣ នៅចំណុចផ្លូវលេខ ២១៧ ភូមិរលួស សង្កាត់ជើងឯង ខណ្ឌដង្កោ រាជធានីភ្នំពេញ។

សមត្ថកិច្ចបានឲ្យដឹងថា ម្ចាស់ទីតាំងឈ្មោះ អុឹម ស៊ីវន ភេទស្រី អាយុ៤៣ឆ្នាំ ជនជាតិខ្មែរ មុខរបរ: ទិញលក់អេតចាយ។
មូលហេតុ ឆ្លងចរន្តអគ្គិសនី។ ទីតាំងខាងលេីប្រភេទដែកប្រក់ស័ង្កសីទំហំ ០៦ម៉ែត្រ X ០៨ម៉ែត្រ។

សមត្ថកិច្ចបានបញ្ជាក់ថា ខូចខាតសម្ភារៈឆេះរោងកម្មករចំនួន១ រួមទាំងឆេះគ្រឿងអេតចាយអស់មួយចំនួនទៀត តែពុំបានឆេះរាលដាលដល់អ្នកក្បែរខាងឡើយ។

ក្នុងរង្វង់ប្រតិបត្តិការបង្ការគ្រោះអគ្គិភ័យខាងលេីនេះ រថយន្តការិយាល័យបង្ការនិងពន្លត់អគ្គិភ័យមកអន្តរាគមន៍ចំនួន ០៤គ្រឿង ប្រេីប្រាស់ទឹកអស់ចំនួន២ឡាន ស្មើរនឹង៨ម៉ែត្រគូប។ រថយន្តអគ្គិភ័យក្រុមហ៊ុនស្រាបៀរកម្ពុជាចំនួន ០១គ្រឿង ប្រើប្រាស់ទឹកអស់ចំនួន១ឡាន ស្មើនឹង ០៦ម៉ែត្រគូប។ នៅវេលាម៉ោង១៣និង២០នាទីរសៀល នាថ្ងៃខែឆ្នាំដដែលត្រូវបានគ្រប់គ្រង់ទាំងស្រុង៕

អត្ថបទ៖ សុខា